ဆိုင်းမင်း/People’s Spring
မန္တလေး အိုးဘိုအကျဉ်းထောင်မှာ ဖမ်းဆီးအကျဉ်းချထားတဲ့ NLD အစိုးရ လျှပ်စစ်ဝန်ကြီး ဦးဝင်းခိုင် ကျန်းမာရေးဆိုးရွားလာတာကြောင့် ဆေးရုံ မှာ အရေးပေါ်ကုသမှု ခံယူနေချိန်မှာ စစ်ကောင်စီက လွတ်ငြိမ်းပေး လိုက်တယ်လို့ သိရပါတယ်။
အသက် ၇၃ နှစ်အရွယ် ဦးဝင်းခိုင် ထောင်တွင်းမှာ ကျန်းမာရေးဆိုးရွာလာလို့ မန္တလေးဆေးရုံကြီး အထူး ကြပ်မတ်ကုသဆောင်မှာ ကုသမှု ခံယူနေချိန် ဒီနေ့မနက်ပိုင်းမှာ စစ်ကောင်စီ က လွတ်ငြိမ်းခွင့် လာရောက်ဖတ်ကြားတာလို့ မန္တလေး စစ်ကောင်စီအုပ်ချုပ်ရေးပိုင်းနဲ့ နီးစပ်သူထံကသိရပါတယ်။
ဦးဝင်းခိုင်ရဲ့ နောက်ဆုံးအခြေအနေကိုတော့မသိရသေးပါဘူး။
Public Service Announcement
ဦးဝင်းခိုင်ဟာ NLD အစိုးရ လက်ထက်မှာ လျှပ်စစ်နဲ့ စွမ်းအင်ဝန်ကြီး ဌာန ပြည်ထောင်စုဝန်ကြီး အဖြစ်ခန့်အပ်ခံရသူဖြစ်ပြီး စစ်တပ်အာဏာသိမ်းတဲ့နေ့မှာပဲ ဖမ်းခံရသူဖြစ်ပါတယ်။
အဲဒီနောက် အဂတိလိုက်စားမှုပုဒ်မတွေနဲ့ထောင်ဒဏ် ၂၈ နှစ်ချခံရပါတယ်။
အကျဉ်းကျခံနေရချိန် မှာ ထောင်တွင်းကျန်းမာရေးစောင့်ရှောက်မှု လုံလုံလောက်လောက်မရခဲ့ဘူးလို့ သိရပါတယ်။
အောက်တိုဘာလ ပထမ ပတ်အတွင်းကလည်း NLD ပါတီ ဒုတိယဥက္ကဋ္ဌ ဒေါက်တာဇော်မြင့်မောင် ကျန်းမာရေးဆိုးရွားလာပြီး မန္တလေးဆေးရုံကြီးအထူးကြပ်မတ်ကုသဆောင်မှာ ကုသမှုခံယူရင်းဆုံးပါးခါနီးအချိန်ရောက်မှ စစ်ကောင်စီက ဆေးရုံမှာ လွတ်ငြိမ်းခွင့် လာရောက်ဖတ်ကြားခဲ့ပါတယ်။
