မြင်းခြံမြို့နယ်ကို စစ်ကောင်စီ လေကြောင်းတိုက်ခိုက်

အိမ်သွင်/People’s Spring

မန္တလေးတိုင်း၊ မြင်းခြံမြို့နယ်တွင် တိုက်ပွဲဖြစ်ပွားခြင်းမရှိဘဲ အရပ်သားနေထိုင်ရာ ကျေးရွာနှစ်ရွာကို စစ်ကောင်စီက ဂျက်ဖိုက်တာနှစ်စီးဖြင့် လေကြောင်းတိုက်ခိုက်ခဲ့သည်။

မြင်းခြံမြို့နယ် ရုံဒိုးရွာနှင့်ရွာသစ်ကျေးရွာအနီး နှစ်နေရာကို ယနေ့(အောက်တိုဘာ ၃၀ရက်) ညနေပိုင်း၌ စစ်ကောင်စီက လေကြောင်းမှတိုက်ခိုက်ခဲ့ခြင်းဖြစ်သည်။

” ဘာတိုက်ပွဲမှမရှိဘဲနဲ့ အလွတ်ကြီးဖြစ်သွားတာပါ”ဟု ဒေသခံတစ်ဦးက ပြောသည်။

Public Service Announcement

ယနေ့ ညနေ ၃နာရီ၁၅မိနစ်ခန့်တွင် တိုက်ခိုက်သွားခြင်းဖြစ်သည်။အဆိုပါ ကျေးရွာနှစ်ရွာတွင် အရပ်သားများပြားရှိနေပြီး လေကြောင်းတိုက်ခိုက်မှုကြောင့် ထိခိုက်မှုအခြေနေကို မသိရသေးပေ။

စက်တင်ဘာ ၂၂ရက်ကလည်း မြင်းခြံမြို့နယ်၊ ချေဆေးကျေးရွာကို စစ်ကောင်စီတပ်က ဗုံးကြဲတိုက်ခိုက်ရာ ဒေသခံအမျိုးသမီးတစ်ဦးသေဆုံးပြီး သုံးဦး ဒဏ်ရာရရှိခဲ့သည်။

မြင်းခြံခရိုင်အတွင်း မြင်းခြံ၊ နွားထိုးကြီး၊ တောင်သာမြို့နယ်များရှိ စစ်ကောင်စီတပ်စခန်းများကို ပြည်သူ့ကာကွယ်ရေးတပ်ဖွဲ့များက ပြီးခဲ့သည့် ဩဂုတ်တွင် မြင်းခြံခရိုင်အထူး စစ်ဆင်ရေး(MDSO)ဖြင့် တိုက်ခိုက်ခဲ့သည်။

ထိုသို့တိုက်ခိုက်ခံရပြီးနောက် အဆိုပါမြို့နယ်များကို စစ်ကောင်စီက လေကြောင်းတိုက်ခိုက်ခြင်း၊ မြေပြင်စစ်ကြောင်းထိုးခြင်းများ ပြုလုပ်နေသည်။