ပခုက္ကူနှင့် ရေစကြိုတွင် စစ်သားနှစ်ဦးအလင်းဝင် လာ၊ ကျပ်သိန်း ၄၀စီ ပေးအပ်

ဟာနာဆန်/People’s Spring

မကွေးတိုင်း၊ ပခုက္ကူနှင့် ရေစကြိုမြို့နယ်တွင် လက်နက်ခဲယမ်းများ ယူဆောင်ပြီး အလင်းဝင် လာသည့် စစ်သား နှစ်ဦးအား ကျပ်သိန်း ၄၀စီပေးအပ်ခဲ့ကြောင်း ရေစကြိုမြို့နယ်တောင်ပိုင်းပြည်သူ့ကာကွယ်ရေးတပ်ဖွဲ့တာဝန်ခံ ကိုအောင်မောင်းက ပြောသည်။

ပြီးခဲ့သည့် အောက်တိုဘာ ၁၇ရက်က ပခုက္ကူစက်မှုဇုန်စစ်ဆေးရေးဂိတ်တွင် တာဝန်ထမ်းဆောင်နေသည့် ပခုက္ကူမြို့၊ အမှတ်(၂၅၉) ခြေလျင်တပ်ရင်းမှ တပ်သား ပြည့်ဖြိုးအောင်နှင့် ပခုက္ကူမြို့နယ် မြောက်လူးကန် အထိုင်စခန်းတွင် တာဝန်ထမ်းဆောင်နေသော စလင်းမြို့၊ အမှတ်(၂၅၅)ခြေလျင်တပ်ရင်းမှ တပ်သား ကောင်းမင်းခန့်တို့ အလင်းဝင်လာခဲ့ခြင်းဖြစ်ကြောင်း ရေစကြိုတောင်ပိုင်းပြည်သူ့ကာကွယ်ရေးတပ်ဖွဲ့(Southern YSO PDF) အဖွဲ့က အသိပေးသည်။

၎င်းတို့နှစ်ဦးယူဆောင်လာသော MA1 သေနတ် ၂ လတ်၊ကျည်ဘောက် ၆ ဘောက်၊ ကျည်ဆံ ၁၂၀ တို့အား PDF အဖွဲ့ထံ အပ်နှံခဲ့ကြောင်း၊ ထို့ကြောင့် ရဲဘော် ၂ ဦးအား တစ်ဦးလျှင် ကျပ်သိန်း ၄၀စီပေးခဲ့ကြောင်း Southern YSO PDF အဖွဲ့ တာဝန်ခံက ပြောသည်။

Public Service Announcement

ယခုအချိန်ထိ Southern YSO PDFအဖွဲ့ ထံအလင်းဝင်ရောက်လာသော စစ်သား အများအပြားရှိနေပြီး အချို့အား ၎င်းတို့နေထိုင်လိုသော ဒေသသို့ ပို့ဆောင်ပေးထားကြောင်း၊ အချို့ကမူ အာဏာရှင်တော်လှန်ရေး လုပ်ငန်းစဉ်များအတွင်း ပူးပေါင်းပါဝင်နေကြောင်း Southern YSO PDF အဖွဲ့က အသိပေးသည်။

ထို့ကြောင့် စစ်ကောင်စီလက်အောက်မှ ဝန်ထမ်းများအနေဖြင့် ပြည်သူရင်ခွင်ခိုလှုံကြရန် ရေစကြိုတောင်ပိုင်းပြည်သူ့ကာကွယ်ရေးတပ်ဖွဲ့ (Southern YSO PDF)က တိုက်တွန်းထားသည်။