ဇေအောင်/People’s Spring
မန္တလေးတိုင်း၊ မိုးကုတ်ဗျူဟာအမှတ်(၁၂၂၂) တပ်ရင်း၌ ခေါင်းဆောင်ကစ၍ ရဲဘော်များ ကျင့်ဝတ်ဖောက်ဖျက်ပါက တိုင်ကြားနိုင်ပြီး ထိရောက် စွာ အရေးယူဆောင်ရွက်ပေးမည်ဟု အဆိုပါတပ်ရင်းက ထုတ်ပြန်ကြေညာသည်။
အမှတ်(၁၂၂၂)တပ်ရင်းသည် ပြည်သူအပေါ် ကျင့်သုံးရမည့် စည်းကမ်း၊ ကျင့်ဝတ်များနှင့် တပ်တွင်းချမှတ်ထားသော စည်းကမ်း၊ကျင့်ဝတ်များကို အမြဲမပြတ် စောင့်ထိန်းလိုက်နာနေသော တပ်ဖြစ်ကြောင်း၊ တပ်ရင်းတွင် ရဲဘော်အင်အား တိုးလာပြီး COC(Chain Of Command) သက်ရောက်မှုနှင့် စည်းကမ်းချက် အားနည်းချက်များ ရှိလာမည်ကို စိုးရိမ်ကြောင်း အမှတ်(၁၂၂၂)တပ်ရင်းက အသိပေးသည်။
ထို့ကြောင့် ပြည်သူများအနေဖြင့် ရဲဘော်များ လူထုအပေါ်တွင် ကိုယ်အမူအရာဖြင့်ဖြစ်စေ၊ နှုတ်အမူအရာဖြင့် ဖြစ်စေ ရိုင်းပြစွာစော်ကားမှုများ ရှိလာပါက တပ်ရင်း Facebook Page နှင့် တပ်ရင်းခေါင်းဆောင်များထံ ဆက်သွယ်တိုင်ကြားနိုင်ကြောင်း အမှတ်(၁၂၂၂)တပ်ရင်းက ထပ်မံအသိပေးသည်။
Public Service Announcement
ခေါင်းဆောင်ကစ၍ ရဲဘော်များ ကျင့်ဝတ်ဖောက်ဖျက်သည်ကို တွေ့ရှိပါက ပြစ်မှုပြစ်ဒဏ် ပေါ်မူတည်၍ ထိရောက်စွာ အရေးယူဆောင်ရွက် ပေးမည်ဟု အမှတ်(၁၂၂၂)တပ်ရင်းက ကတိပြုသည်။
“လူထုနဲ့ရဲဘော်တွေ တိုက်ရိုက်ထိတွေ့တဲ့အခါမှာ Error(ချို့ယွင်းမှု)လေးတွေ ရှိလာတယ်။ ဒါက ကျွန်တော်တို့တပ်မှ မဟုတ်ဘူး။ အခြားတပ်တွေမှာလည်း ရှိတယ်။ နယ်မြေဒေသအခြေအနေရ လိုက်မကြည့်နိုင်တဲ့အခါ ဂိတ်တွေဖွင့်တဲ့အခါမျိုးမှာ လူထုနဲ့ ကျွန်တော်တို့ စစ်သားတွေ ဆက်ဆံရတယ်။ ဆက်ဆံရတဲ့အခါမှာ ကျွန်တော်တို့နိုင်ငံရဲ့ ပညာရေးအားနည်းချက်လည်း ပါကောင်းပါတာပေါ့။ အဲအချိန်မှာ ရဲဘော်တွေမှာ အမှားလေးတွေရှိလာတာ ကျွန်တော်တို့ ပြန်လည်ကြားသိရတယ်ပေါ့။ အဲဒီအချိန်မှာ ဘယ်သူ့တိုင်လို့တိုင်ရမှန်းမသိဘူး။ ဘယ်လိုဆက်သွယ်ရမှန်းမသိတဲ့ ပြည်သူလူထုတွေလည်း ရှိတယ်။ အဲအတွက် ကြောင့် အခုလို ထုတ်ပြန်ရခြင်းဖြစ်ပါတယ်။”ဟု အမှတ်(၁၂၂၂)တပ်ရင်း၏ တာဝန်ရှိသူက ပြောသည်။
ထို့အပြင် မဟာမိတ်တပ်များအပေါ်တွင် ရိုင်းပြစွာ ကျူးလွန်ခဲ့လျှင်လည်း လာရောက်တိုင်ကြားနိုင်ကြောင်း အမှတ်(၁၂၂၂)တပ်ရင်းကထပ်မံ အသိပေးထားသည်။
အမှတ်(၁၂၂၂)တပ်ရင်းသည် မိုးကုတ်မြို့နယ်၌ အခြေစိုက်ထားသော်လည်း စဥ့်ကူးနှင့် သပိတ်ကျင်းမြို့နယ်များ၌ပါ တိုက်ခိုက်ရေးတာဝန်များ ထမ်းဆောင်နေသည်။
