ဟာနာဆန်/People’s Spring
ယနေ့(နိုဝင်ဘာ ၇ ရက်) နံနက် ၆နာရီခွဲခန့်က မြိုင်မြို့မြောက်ဘက် ချောင်းဆုံဂိတ်မှ ဆိုင်ကယ်ဖြင့် စျေးဝယ်ထွက်လာသော စစ်ကောင်စီလက်အောက်ခံ ဒုရဲမှူး ချစ်စမ်းမောင်နှင့် ရဲတပ်သားတစ်ဦးအား ပစ်ခတ်တိုက်ခိုက်ရာ နှစ်ဦးလုံး သေဆုံးခဲ့ကြောင်း မြိုင်မြို့နယ်ပြည်သူ့ကာကွယ်ရေးအဖွဲ့(ပကဖ)က ရုပ်သံမှတ်တမ်းနှင့်တကွ ထုတ်ပြန်သည်။
ထို့အပြင် ၎င်းတို့ ကိုင်ဆောင်လာသည့် MA -3 သေနတ် တစ်လက်ကို သိမ်းဆည်းနိုင်ခဲ့ကြောင်း မြိုင်ပကဖက အသိပေးသည်။
ဖြစ်စဥ်နှင့်ပတ်သက်၍ မြိုင်ပကဖအဖွဲ့ထံ ဆက်သွယ်မေးမြန်းရန်ကြိုးစားသော်လည်း လက်တလောဆက်သွယ်၍ မရသေးပေ။
Public Service Announcement
အဆိုပါပစ်ခတ်မှု မြိုင်မြို့နယ် ပကဖတပ်ရင်း (၁) ခွဲ (၃)နှင့်အတူ Jokerပြောက်ကျားတပ်ဖွဲ့ တို့မှ ပူးပေါင်းတိုက်ခိုက်ခဲ့ခြင်းဖြစ်သည်။
မြိုင်ပကဖသည် မြိုင်မြို့နယ်နှင့် မြို့ပေါ်နယ်မြေများအား စိုးမိုးထားပြီး စစ်ကောင်စီတပ်အား ရိက္ခာဖြတ်တောက်ခြင်း၊ ဆက်သွယ်ရေးဖြတ်တောက်ခြင်းနှင့် မျက်ခြေမပြတ် စောင့်ကြည့်လှုပ်ရှားတိုက်ခိုက်ခြင်းများ လုပ်ဆောင်ထားကြောင်း မြိုင်ပကဖက အသိပေးထားသည်။
နိုဝင်ဘာ ၆ ရက်ကလည်း မြိုင်မြို့နယ်၊ တွင်းမပျူစောထီးကျေးရွာမှ ကင်းပတ်ထွက်လာသော ပျူစောထီးအဖွဲ့ဝင်များအား တော်လှန်ရေးတပ်ပေါင်းစုများက စောင့်ဆိုင်းတိုက်ခိုက်ခဲ့ရာ ပျူစောထီး သုံးဦးသေဆုံးပြီး သေနတ် ၃လက်နှင့်ခဲယမ်းများ သိမ်းဆည်းနိုင်ခဲ့ကြောင်း M.V.P Revoulation Force အဖွဲ့က ပြောသည်။
