အိမ်သွင်/People’s Spring
ကချင်ပြည်နယ်၊ ဖားကန့်မြို့ရှိ စစ်ကောင်စီတပ်၏ ဗျူဟာကုန်းကို ရဟတ်ယာဉ်ဖြင့် လက်နက်ခဲယမ်းရိက္ခာများချပေးပြီး ဗျုဟာကုန်းဝန်းကျင်နေရာအချို့ကို လေကြောင်းမှဗုံးကြဲတိုက်ခိုက်ခဲ့သည်။
ဖားကန့်မြို့၊ မော်ဝမ်းရပ်ကွက်ရှိ စစ်ကောင်စီတပ်ဗျူဟာကုန်းကို နိုဝင်ဘာ ၁၀ရက် နေ့လယ်ပိုင်းတွင် လေကြောင်းမှ လက်နက်ခဲယမ်းများဖြည့်တင်းခဲ့ခြင်းဖြစ်သည်။
” ရဟတ်ယာဉ်တစ်စီးက အောက်ကို ဆင်းတယ်။လက်နက်ခဲယမ်းတွေချပေးသွားတယ်။ နောက်တစ်စီးက လုံခြုံရေးယူပေးတယ်။ ပြီးတော့ ဗျူဟာပတ်ဝန်းကျင်ကို ဗုံးကြဲတယ်”ဟု ကချင်လွတ်လပ်ရေးတပ်မတော်(KIA)နှင့် နီးစပ်သည့်သတင်းရဲမြစ်တစ်ဦးက ပြောသည်။
Public Service Announcement
ဗုံးကြဲတိုက်ခိုက်မှုကြောင့် ထိခိုက်မှုရှိ၊ မရှိကို မသိရသေးပေ။
လက်ရှိတွင် KIAနှင့်PDF ပူးပေါင်းတပ်များက ဆိုင်းတောင်ကျေးရွာ ထိန်းချုပ်ထားပြီး မြို့ခံများနှင့် ဒေသခံများအတွက် လေကြောင်းနှင့် လက်နက်ကြီးအန္တရာယ် သတိပေးထားသည်။
ဆိုင်းတောင်ကျေးရွာအတွင်းရှိ Lucky Man ဟိုတယ်၌ တပ်စွဲထားသည့်စစ်ကောင်စီတပ်နှင့် ဆိုင်းတောင်ရဲစခန်းကို ပြီးခဲ့သည့်စက်တင်ဘာလဆန်းတွင် KIAနှင့် PDF ပူးပေါင်းတပ်က စတင်တိုက်ခိုက်ခဲ့ပြီး သိမ်းပိုက်ထိန်းချုပ်ထားခြင်းဖြစ်သည်။
စစ်ကောင်စီက ဖားကန့်ဒေသ၌ လက်နက်နှင့် လူအင်အားဖြည့်တင်းနေ၍ စစ်ရေးသတင်းများ နားစွင့်နေရန်နှင့် လုံခြုံရေးသတိပြုကြရန် ကာကွယ်ရေးတပ်ဖွဲ့များက သတိပေးထားသည်။
စစ်ကောင်စီသည် ပြီးခဲ့သည့် အောက်တိုဘာလကုန်ကလည်း ဖားကန့်မြို့ပေါ်တွင် လေယာဉ်ဖြင့် ကင်းထောက်ခဲ့ပြီး KIA တပ်မဟာ(၉)ကို ဗုံးကြဲတိုက်ခိုက်ခဲ့သည်။ အဆိုပါလေကြောင်းတိုက်ခိုက်မှုအတွင်း ထိခိုက်မှုမရှိခဲ့ကြောင်း သတင်းရရှိသည်။
လက်ရှိတွင် ဖားကန့်ဒေသ၌ ထိပ်တိုက်ရင်ဆိုင်တိုက်ပွဲမဖြစ်ပွားသော်လည်း ကချင်ပြည်နယ်အတွင်း စစ်ကောင်စီလက်အောက်ခံ နယ်ကြားစောင့်တပ် ထိန်းချုပ်ထားသည့်မြို့များကို KIAနှင့်PDF ပူးပေါင်းတပ်ဖွဲ့များက တိုက်ခိုက်သိမ်းပိုက်နေသည်။
