ဇေအောင်/People’s Spring
စစ်ကိုင်းတိုင်း၊ ပုလဲမြို့တိုက်ပွဲအတွင်း စစ်ကောင်စီတပ်က လေကြောင်းမှတိုက်ခိုက်နေ၍ ဒေသခံပြည်သူထောင်နှင့်ချီထွက်ပြေးတိမ်းရှောင်နေရပြီး စားနပ်ရိက္ခာနှင့် ဆေးဝါးများလည်း အရေးပေါ်လိုအပ်နေသည်။
နိုဝင်ဘာ ၁၁ရက်က စတင်ခဲ့သည့် ပုလဲမြို့ပေါ် တိုက်ပွဲအတွင်း စစ်ကောင်စီတပ်က နိုဝင်ဘာ ၁၃ ရက် နံနက်ပိုင်းတွင် MI35 ဖြင့် အချိန်တစ်နာရီကျော်ကြာ လေကြောင်းတိုက်ခိုက်ခဲ့ကြောင်း၊ ထို့အပြင် နံနက် ၁၁ နာရီ မိနစ် ၅၀ခန့်တွင်လည်း တံတားဦးလေတပ်မှ ဂျက်ဖိုက်တာ တစ်စီးဖြင့် လေကြောင်းတိုက်ခိုက်မှု ထပ်မံပြုလုပ်ခဲ့ရာ ပြည်သူအချို့ ထိခိုက်သေဆုံးမှုများရှိကြောင်း စစ်ကိုင်းပြည်သူဖေးမကူကွန်ရက်အဖွဲ့က ပြောသည်။
လေကြောင်းတိုက်ခိုက်မှုများကြောင့် ပုလဲမြို့ပေါ်နှင့် အနီးရှိ ကျေးရွာများဖြစ်သော အလယ်ဘုံ၊အေးကုန်း၊ သာယာကုန်း၊ ချောင်းကန်၊ ကံကြီး၊ ညောင်ကန်၊ ညောင်ကုန်း၊ မန်းကျီးခွ၊ ဇောင်ချမ်းကုန်း၊ မြကုန်း၊ ရိုး အစရှိသည့် ကျေးရွာများမှ အိမ်ထောင်စုပေါင်း ၂,၁၀၀ကျော်မှ ပြည်သူ ၉,၀၀၀ကျော် ထွက်ပြေးတိမ်းရှောင်နေရကြောင်း စစ်ကိုင်းပြည်သူဖေးမကူကွန်ရက်အဖွဲ့က ပြောသည်။
Public Service Announcement
“ လေကြောင်းတိုက်ခိုက်မှု ဆက်လက်ပြုလုပ်နေတဲ့အတွက် ပုလဲမြို့အနီးနားမှ ကျေးရွာများထပ်မံတိမ်းရှောင်ရဖွယ်ရှိပြီး အရေးပေါ်စစ်ရှောင်ဦးရေလည်း ထပ်မံများပြားလာဖွယ် ရှိပါတယ်။” ဟု စစ်ကိုင်းပြည်သူဖေးမကူကွန်ရက်အဖွဲ့ တာဝန်ရှိသူက ပြောသည်။
အဆိုပါ စစ်ရှောင်ပြည်သူများအတွက် စားနပ်ရိက္ခာနှင့် ဆေးဝါးများလည်း အရေးပေါ်လိုအပ်နေကြောင်း သတင်းရရှိသည်။
ပုလဲမြို့သိမ်းတိုက်ပွဲကို ဗမာအမျိုးသားတော်လှန်ရေးတပ်မတော်(BNRA)က ဦးဆောင်ပြီး ဂျန်ဇီလူငယ်မျိုးဆက်တပ်တော်(GZA)နှင့် YSOတပ် ပူးပေါင်းတပ်တို့က နိုဝင်ဘာ ၁၁ ရက် နံနက်ကစ၍ အပြင်းအထန် တိုက်ခိုက်ခဲ့ခြင်း ဖြစ်သည်။
ထို့အပြင် ပုလဲမြို့ကို အတိုင်းအတာတစ်ခုထိ ထိန်းချုပ်ထားနိုင်ပြီဟု ဗမာအမျိုးသားတော်လှန်ရေးတပ်မတော်(BNRA)ခေါင်းဆောင် ဗိုလ်နဂါးက လူထုနွေဦးသို့ ယမန်နေ့က ပြောထားသည်။
ယမန်နေ့တိုက်ပွဲအတွင်း စစ်ကောင်စီတပ်က လေကြောင်းမှ အနည်းဆုံး၁၀ကြိမ်ထက်မနည်း တိုက်ခိုက်ခဲ့သည်ဟု ဗိုလ်နဂါးက ပြောသည်။
နိုဝင်ဘာ ၁၁ ရက်က စစ်တပ်၏ လေကြောင်းတိုက်ခိုက်မှုကြောင့် ဒေသခံပြည်သူ ၇ ဦးခန့် သေဆုံးခဲ့ရကြောင်း ပုလဲမြို့နယ် လူသားစာနာတာဝန်ခံက ပြောသည်။
ပြီးခဲ့သည့် ဇူလိုင်အတွင်းကလည်း ပုလဲမြို့ကို ကာကွယ်ရေးတပ်ဖွဲ့များက တိုက်ခိုက်ခဲ့သော်လည်း လက်နက်ခဲယမ်းမလုံလောက်၍ဆိုကာ ပြန်လည်ဆုတ်ခွာပေးခဲ့သည်။
