ဟန်နွေ/People’s Spring
ကရင်အမျိုးသားအစည်းအရုံး(KNU) ညောင်လေးပင်ခရိုင် မုန်း(မူး)မြို့နယ်တွင် စစ်ကောင်စီတပ်က လက်နက်ကြီးဖြင့် ပစ်ခတ်၍ (၇၅)နှစ်အရွယ် အဘိုးအိုအပါအဝင် အရပ်သား ၂ဦး သေဆုံးခဲ့ရကြောင်း KNUဗဟိုက ယနေ့ (နိုဝင်ဘာ ၂၀ရက်) ထုတ်ပြန်သည်။
နိုဝင်ဘာ ၁၇ရက်က အာဏာသိမ်းစစ်ကောင်စီတပ်၏ ခမရ(၃၀၇)ရွှေဝါတပ်ရင်းက မုန်းမြို့နယ် ရွာကြီးအင်ကျေးရွာကို လက်နက်ကြီးဖြင့် ပစ်ခတ်ခဲ့ရာ ရွာကြီးအင်းကျေးရွာမှ ဦးပြူးကျော် အသက်(၅၅)နှစ်နှင့် ဦးဝဲကြည် အသက်(၇၅)နှစ်တို့ သေဆုံးခဲ့ရပြီး နှစ်ဦးဒဏ်ရာရရှိခဲ့ကြောင်း ဖော်ပြသည်။
ညောင်လေးပင်ခရိုင်တွင် စစ်ကောင်စီက ဒရုန်း၊ လက်နက်ကြီးပစ်ခတ်မှုများ ဆက်တိုက်ပြုလုပ်ခဲ့ရာ နိုဝင်ဘာ ၁၅ရက်မှ ၁၉ရက် ၅ရက်တာအတွင်း ကျေးရွာများကို ပစ်မှတ်ထားပြီး လက်နက်ကြီး အလုံး ၈၀ကျော်ပစ်ခတ်ခဲ့ကြောင်း KNUက ထုတ်ပြန်သည်။
Public Service Announcement
ထို့ပြင် စာသင်ကျောင်းကို ပစ်မှတ်ထားပြီးလည်း လက်နက်ကြီးဖြင့်ပစ်ခတ်ခဲ့သည်ဟု ဆိုသည်။
ကျောက်ကြီးမြို့နယ် တောကြောင်ပေါက်ရွာကို စစ်ကောင်စီက နိုဝင်ဘာ ၁၉ရက်တွင် လက်နက်ကြီးဖြင့်ပစ်ခတ်ခဲ့ရာ နေအိမ်နှင့် ကျေးရွာဆေးပေးခန်း ပျက်စီးမှုရှိခဲ့ကြောင်း၊ ထို့ပြင် တောကြောင်ပေါက်ကျေးရွာ စာသင်ကျောင်းကို စစ်ကောင်စီက ဒရုန်းဖြင့် ပစ်ခတ်ခဲ့၍ (၁၀)နှစ်အရွယ် ကျောင်းသူ ၂ဦး ဒဏ်ရာရခဲ့ကြောင်း KNUက ထုတ်ပြန်သည်။
စစ်ကောင်စီတပ်က ကျောက်ကြီးမြို့နယ်အတွင်းရှိ ကျေးရွာများသို့ လက်နက်ကြီးများဖြင့် ပစ်ခတ်ခြင်းအပြင် စစ်ကြောင်းထိုးဝင်ရောက် စစ်ရေးလှုပ်ရှား၍ ဒေသခံများ ထွက်ပြေး တိမ်းရှောင်ခဲ့ကြရသည်ဟု ဆိုသည်။
စစ်ကောင်စီတပ်များသည် ကျောက်ကြီးမြို့နယ် နောင်ကုန်းကျေးရွာနှင့် ရွာကြီးအင်းကျေးရွာသို့ စစ်ကြောင်းထိုးဝင်ရောက်ခဲ့သောကြောင့် ကျေးရွာတွင်းရှိ ဒေသခံပြည်သူလူထုများ ထိတ်လန့်ကြောက်ရွံ့ပြီး ဘေးလွတ်ရာသို့ ထွက်ပြေးတိမ်းရှောင်ခဲ့ရာ လူဦးရေ ၆ထောင်ကျော်ရှိသည်ဟု အသိပေးထားသည်။
