ဟန်နွေ/People’s Spring
မွန်ပြည်နယ်၊ ရေးမြို့နယ် အာယုတောင်ကျေးရွာရှိ စစ်ကောင်စီ လက်အောက်ခံ ပြည်သူ့စစ်အဖွဲ့ကို ရေးဘီလူးတပ်ဖွဲ့က ယနေ့(နိုဝင်ဘာ ၂၃ရက်)ဝင်ရောက်ပစ်ခတ်တိုက်ခိုက်ခဲ့ရာ ပြည်သူ့စစ်အဖွဲ့ခေါင်းဆောင် လင်းဦး ဒဏ်ရာပြင်းထန်စွာ ရရှိခဲ့ပြီး ပြည်သူ့စစ်များ သေဆုံးထိခိုက်ရှိခဲ့ကြောင်း ရေးဘီလူးအဖွဲ့ခေါင်းဆောင်က ပြောသည်။
ပြည်သူ့စစ်အင်အား ၃၀ခန့်ရှိသည့် လင်းဦးပြည်သူ့စစ်အဖွဲ့ကို နိုဝင်ဘာ ၂၃ရက် နံနက် ၈နာရီ ၄၅ မိနစ်ခန့်တွင် ရေးဘီးလူးတပ်ဖွဲ့က သွားရောက်တိုက်ခိုက်ခဲ့သည်ဟု ဆိုသည်။
“သူ့ကို ဝင်ရောက်ရှင်းလင်းခဲ့တဲ့ နေရာကတော့ သူ့ရဲ့ ရုံးအရှေ့နားမှာ တိုက်ပွဲဖြစ်ပွားခဲ့တယ်” ဟု ရေးဘီလူးခေါင်းဆောင်က ပြောသည်။
Public Service Announcement
အဆိုပါ တိုက်ခိုက်မှုကြောင့် ပြည်သူ့စစ်ခေါင်းဆောင် လင်းဦးအပါအဝင် ၅ဦးထက်မနည်း ထိခိုက်ခဲ့သည်ဟု ဆိုသည်။
“ ကျ(သေဆုံး)တာက ၄၊ ၅ဦးလောက်ရှိမယ်။ သူကျတော့ ဒဏ်ရာပြင်းထန်တယ်။ လည်ပင်းထိတယ်။ ညာဘက်လက်ထိတယ်။ ဘယ်ဘက်လက်ထိတယ်။ ဗိုက်ထိတယ်။ ပေါင်ထိတယ်။ ပတ်ပတ်လည် တပြင်လုံးထိထားတာ။ အခုလောလောဆယ်တော့ မသေသေးဘူးပေါ့။ သေဖို့တော့ ရာခိုင်နှုန်းများတယ်လို့ သတင်းရထားတယ်” ဟု ရေးဘီလူးခေါင်းဆောင်က ပြောသည်။
လင်းဦးပြည်သူ့စစ်အဖွဲ့ကို သွားရောက်ပစ်ခတ်တိုက်ခိုက်ခဲ့သည့် ရုပ်သံမှတ်တမ်းကိုလည်း ရေးဘီလူးအဖွဲ့ ခေါင်းဆောင်က လူမှုကွန်ရက်၌ ဖော်ပြထားသည်။
ရေးဘီလူးအဖွဲ့သည် ယခင်ကလည်း လင်းဦးပြည်သူ့စစ် အဖွဲ့အပါအဝင် ရေးမြို့နယ်အတွင်းရှိ စစ်ကောင်စီတပ်၊ ရဲ၊ စစ်ကောင်စီ လက်အောက်ခံ ပြည်သူ့စစ်များကို တိုက်ခိုက်မှုများ လုပ်ဆောင်ခဲ့သည့် ကာကွယ်ရေးတပ်ဖွဲ့တစ်ခု ဖြစ်သည်။
