ဇေအောင်/People’s Spring
စစ်ကိုင်းတိုင်း၊ မုံရွာမြို့တွင် မီတာမဆောင်၍ဆိုကာ စစ်တပ်က နေအိမ်များအပါအဝင် မီးသတ်ရုံး၊ ရပ်ကွက်ရုံးများရှိ လျှပ်စစ်မီတာပုံးများ လိုက်လံဖြုတ်သိမ်းနေကြောင်း မြို့ခံများက ပြောသည်။
ယခု နိုဝင်ဘာလကုန်ပိုင်းတွင် မုံရွာမြို့ပေါ်ရှိ ဘုရားကြီး၊ အောင်ချမ်းသာ၊ ဘုန်းစိုး၊ ဆူးလေကုန်း၊ ရုံးကြီး၊ မြို့သစ်၊ အောင်ရိပ်သာ အစရှိသည့်ရပ်ကွက်များမှ မီတာမဆောင်သည့် နေအိမ်များအား စစ်တပ်၊ထွေအုပ်နှင့် အရပ်ဝတ် လက်နက်ကိုင်များ အင်အား ၂၀ခန့်ဖြင့် မီတာပုံးများလိုက်လံဖြုတ်သိမ်းနေကြောင်း အဆိုပါမြို့ခံများက ပြောသည်။
“လေးငါးရက်လောက်ရှိပြီ။ မီတာတွေဖြုတ်တာရက်စက်တယ်။ အိမ်ပိတ်ထားတဲ့အိမ်က လေးသိန်းတဲ့။ အိမ်မပိတ်ဘူး ဒီတိုင်းသုံးနေတဲ့အိမ်က ပိုက်ဆံရှိရင်ဆယ်သိန်း။ ပိုက်ဆံမရှိရင် ၇ သိန်း။ နည်းနည်းချမ်းသာသွားရင် ၁၇သိန်း၊ သိန်း ၂၀ အဲလိုတောင်းတာ။”ဟု မုံရွာမြို့ခံ အမျိုးသားတစ်ဦးက ပြောသည်။
Public Service Announcement
မီတာပုံးအဖြုတ်ခံရမှုတွင် မီးသတ်ရုံးနှင့် ရပ်ကွက်ရုံးများလည်း ပါဝင်ကြောင်း မုံရွာကင်းထောက်များအဖွဲ့က ပြောသည်။
“ဒီမနက် အင်းစောင်းထဲ ရပ်ကွက်ရုံး၊ မီးသတ်ရုံးက မီတာတွေပါဖြုတ်သွားတယ်။”ဟု အဆိုပါအဖွဲ့က ပြောသည်။
အာဏာသိမ်းပြီးနောက် စစ်ကောင်စီအား ဘဏ္ဍာငွေဖြတ်တောက်သည့် လှုပ်ရှားမှုအဖြစ် လျှပ်စစ်မီတာခများ မပေးဆောင်ရန် လှုပ်ရှားမှုများ ပြုလုပ်ခဲ့ရာ မုံရွာမြို့နေပြည်သူများမှာ လေးနှစ်နီးပါး မီတာခပေးဆောင်ခြင်းမရှိဘဲ ပါဝင်ခဲ့ကြကြောင်း သိရသည်။
စစ်ကောင်စီက မီတာခများ အတင်းအကျပ်ကောက်ခံနေသော်လည်း လျှပ်စစ်မီးရရှိမှာ မုံရွာမြို့ပေါ်၌ တစ်ရက်လျှင် ၃နာရီခန့်သာရရှိကြောင်း မြို့ခံများက ပြောသည်။
၂၀၂၂ ဇွန်လအတွင်းက မုံရွာမြို့တွင် မီတာပုံးများလိုက်ဖြုတ်နေသည့် မုံရွာမြို့နယ်လျှပ်စစ်မန်နေဂျာရုံးမှ လက်ထောက်ကြီးကြပ်ရေးမှူးဦးနိုင်ဆန်းလင်းနှင့်ဒုလက်ထောက်ကြီးကြပ်ရေးမှူးဦးနေဝင်းထွန်းတို့ သေနတ်ဖြင့်ပစ်ခံရပြီး တစ်ဦး ကျည်ထိမှန်ဒဏ်ရာရခဲ့သေးသည်။
