ထိုင်းငါးဖမ်းလှေတွေကို မြန်မာရေတပ်က ပစ်ခတ်မှုအ​ပေါ်ထိုင်းက ကန့်ကွက် ၊ထိုင်းငါးဖမ်းသမား​ ၄ ဦးပြန်လွှတ်​ပေးရန်​တောင်းဆို

People’s Spring

ထိုင်းငါးဖမ်းလှေတွေကို မြန်မာရေတပ်သင်္ဘောက ပစ်ခတ်ခဲ့တဲ့အ​ပေါ် ထိုင်းကကန့်ကွက်ပြီး ထိုင်း ငါးဖမ်းသမား ၄ ဦးကို ပြန်လွှတ်​ပေးဖို့ တနဂါ်​နွေ ​နေ့ မှာ ညှိနှိုင်း​နေတယ်လို့ဘန်​ကောက်ပို့စ် သတင်းဌာနက​ဖော်ပြပါတယ် ။

ထိုင်း ကာကွယ်ရေး ၀န်ကြီးဖုံသမ် ဝီချာရာချိုင်က ထိုင်းငါးဖမ်းလုပ်သား လေးဦးကို ပြန်လွှတ်ပေးရန် မြန်မာဘက်မှ အရာရှိ​တွေနဲ့ ညှိနှိုင်းဖို့ထိုင်း-မြန်မာ နယ်စပ်ကော်မတီ မှ တာဝန်ရှိသူ​တွေကို ညွှန်ကြားထားတယ်လို့ ကာကွယ်ရေး ဝန်ကြီးဌာန ပြောရေးဆိုခွင့်ရှိသူဗိုလ်မှူးကြီး သာနာတစ်ပ် ဆာဝမ်ဆန်က တနင်္ဂနွေနေ့မှာ ပြောကြားခဲ့တာပါ ။

စ​နေ​နေ့ (နိုဝင်ဘာ ၃၀ ရက်) နေ့ မနက်အစောပိုင်း ၁ နာရီ​ကျော်မှာ ထိုင်း-မြန်မာ နယ်စပ်နားက ရေပြင်မှာ မြန်မာစစ်တပ်ရဲ့ ပစ်ခတ်မှုအတွင်း ထိုင်းငါးဖမ်း စက်လှေတွေ အထိတ်တလန့် ဖြစ်ခဲ့ပြီး ​ရေထဲခုန်ချခဲ့တဲ့စက်လှေဝန်ထမ်းတစ်ဦး ရေနစ် သေဆုံးခဲ့သလို ၃၁ ဦးကို မြန်မာ ရေတပ်က ဖမ်းဆီးသွားခဲ့ကြောင်း ထိုင်းမီဒီယာတွေက ဖော်ပြခဲ့ပါတယ်။ ထိုင်းငါးဖမ်းလှေ ၁၅ စီးပါဝင်တဲ့ အစုအဖွဲ့ထဲက ၂ စီးဟာ ပစ်ခတ်မှုခံခဲ့ရကြောင်း၊ အဲဒီဖြစ်စဉ်ဟာ ရနောင်းပြည်နယ် ကမ်းလွန် ရေပြင်မှာ ပေါ်ပေါက်ခဲ့ကြောင်းလည်း ဆိုပါတယ်။

Public Service Announcement

အဲလိုဖြစ်ပြီး​နောက် ငါးဖမ်းလှေ လုပ်သား ၃ ဦးဟာ ရေထဲကို အထိတ်တလန့် ခုန်ချခဲ့ရာမှာ ၁ ဦးက ရေနစ်သေဆုံးခဲ့ပြီး ၂ ဦးကိုတော့ ထိုင်းရေတပ်က ကယ်ဆယ်နိုင်ခဲ့ပါတယ်။

ထိုင်းရေတပ်ရဲ့ အမှတ် ၃ ​ဒေသရေတပ်အကြီးအကဲ ဒုတိယ သေနာပတိ ဆူဝတ် ဒွန်ဆာကူလ်က မြန်မာပိုင်နက်ထဲ ၃၁ ဦး ဖမ်းဆီးခေါ်ဆောင်သွားတာ ခံခဲ့ရတယ်လို့ ပြောပေမယ့် ဖမ်းဆီးသွားတဲ့ အဖွဲ့အစည်း နာမည်ကို အတိအကျ မှတ်ချက်မပေးခဲ့ပါဘူး။ အဖမ်းခံရသူတွေဟာ ထိုင်း ၄ ယောက်နဲ့ မြန်မာ ၂၇ ယောက်လို့လည်း ဆူဝတ်က ဆိုပါတယ်။

ကာကွယ်​ရေးဝန်ကြီးဌာန ​ပြော​ရေးဆိုခွင့်ရှိသူကတော့ မြန်မာရေတပ်ဟာ ငါးဖမ်းလှေ တစ်စီးနဲ့ လှေပေါ်ရှိနေသူ ၃၁ ဦးကို မြန်မာ​ရေတပ်က ဇာဒက်ကြီးကျွန်းသို့ ဖမ်းဆီးသွားခဲ့ကြောင်း၊ သူတို့တွေ လွတ်မြောက်ရေးအတွက် ထိုင်းရေတပ်က ညှိနှိုင်းနေတယ်လို့ သီးခြား ထုတ်ပြန်ခဲ့ပါတယ်။

ထိုင်းငါးဖမ်းသမား​လေးဦး နဲ့ ငါးဖမ်းစက်​လှေဟာ ရက်ပိုင်းအတွင်းပြန်လည်လွတ်​မြောက်လာလိမ့်မယ်လို့ ထိုင်းအာဏာပိုင်​တွေက ​မျှော်လင့်​နေတယ်လို့ကာကွယ်​ရေးဝန်ကြီးဌာန ​ပြောခွင့်ရပုဂ္ဂိုလ်က​ပြောပါတယ် ။

အာဏာသိမ်း မြန်မာစစ်တပ်ကတော့ အခုဖြစ်စဉ်အပေါ် ဘာမှတ်ချက်မှ မပေးဘဲ နှိုတ်ဆိတ်နေဆဲ ဖြစ်ပါတယ်။

ထိုင်းနိုင်ငံခြားရေး ဝန်ကြီးဌာန ပြောရေးဆိုခွင့်ရ အရာရှိ နစ်ခွန်ဒက်ဂျ် ဘီလန်ကူရူက အဖမ်းခံထားရသူတွေ လွတ်မြောက်ရေးအတွက် မြန်မာ အာဏာပိုင်တွေနဲ့ ဆွေးနွေး ညှိနှိုင်းနေကြောင်း ပြောကြားခဲ့သလို ဖြစ်စဉ် တစ်ခုလုံးမှာ နိုင်ငံတကာ ဥပဒေတွေကို ချိုးဖောက်တဲ့ အခြေအနေတွေ ဆက်စပ် ပါဝင်ခဲ့သလား ဆိုတာကိုလည်း ဆန်းစစ်နေကြောင်း ပြောကြားသွားပါတယ်။

ထိုင်းငါးဖမ်း​လှေ​တွေကို တုံ့ပြန်မှုလွန်ကဲစွာနဲ့အကြမ်းဖက်ခဲ့တဲ့အ​ပေါ် ထိုင်းက သံတမန်လမ်း​ကြောင်းက​နေ ကန့်ကွက်ထားတယ်လို့လည်းဆိုပါတယ် ။

ဒါအပြင် ထိုင်းဝန်ကြီးချုပ် ဖေထောင်ထန် ရှီနာဝပ်ထရာကလည်း ဘန်ကောက်မှာရှိတဲ့ မြန်မာသံရုံးကနေတဆင့် မြန်မာနိုင်ငံခြားရေး ဝန်ကြီးဌာနနဲ့ ဆက်သွယ်ပြီး အခုကိစ္စကို ဖြေရှင်းဖို့ ထိုင်းနိုင်ငံခြားရေး ဝန်ကြီးဌာနကို ညွှန်ကြားထားပါတယ်။

ပြီးတော့ ဒီဖြစ်စဉ်မှာ နိုင်ငံတကာ ဥပဒေတွေကို ချိုးဖောက်မှု ရှိမရှိ၊ ထိုင်းငါးဖမ်းလှေတွေအပေါ် မြန်မာဖက်က အလွန်အကျွံ အင်အားသုံးခဲ့တာ ရှိ၊ မရှိ စစ်ဆေးဖို့လည်း ဝန်ကြီးချုပ်က သက်ဆိုင်ရာ အစိုးရ အေဂျင်စီတွေကို အမိန့်ပေးထားပါတယ်။

ဒါအပြင် ထိုင်းဝန်ကြီးချုပ်ကအခုဖြစ်ရပ်မှာ မြန်မာ​ရေတပ်က အကြမ်းဖက်တုံ့ပြန်မှုအ​ပေါ် ဆန့်ကျင်ပြီး စုံစမ်းစစ်​ဆေးမှု​တွေကို ​စောင့်ဆိုင်း​နေတယ်လို့ ချင်းရိုင်ခရိုင်ကို​ရောက်ရှိ​နေစဥ် တနင်္ဂနွေနေ့က​ပြောပါတယ် ။

ထိုင်းနိုင်ငံခြား​ရေးဝန်ကြီး ကလည်း တနလာ်​နေ့ တွင် မြန်မာသံအမတ်အား ယခုဖြစ်ရပ်အားဆွေး​နွေးဖို့ ဘန်​ကောက်မြို့မှာခေါ်ယူထားပြီး ထိုင်းငါးဖမ်းလုပ်သား​တွေချက်ချင်းပြန်လွှတ်​ပေးဖို့​တောင်းဆိုထားတယ် လို့ ဘန်​ကောက်ပိုစ်သတင်းစာက​ဖော်ပြပါတယ် ။ ထိုင်းငါးဖမ်း သမား​တွေဟာ ​ဘေးကင်းတယ်လို့လည်းသူကဆက်​ပြောပါတယ်။

ထိုင်းနဲ့ မြန်မာတို့ဟာ ကပ္ပလီပင်လယ်အပါအဝင် ရေပြင်ရော၊ ကုန်းမြေပါ စုစုပေါင်း ၂၄၀၀ ကီလိုမီတာ ရှည်လျားတဲ့ နယ်နိမိတ်မျိုး ထိစပ်နေပါတယ်။

ကိုးကား- Bangkok Post