စစ်ဆင်ရေးဒုတိယနေ့တွင် စစ်ကောင်စီတပ်စွဲရာ နေရာ ၅ခုကို သိမ်းပိုက်နိုင်၊ အလင်းဝင်သူများရှိဟု သတင်းရင်းမြစ် ပြော
စစ်ဆင်ရေးဒုတိယနေ့တွင် စစ်ကောင်စီတပ်စွဲရာ နေရာ ၅ခုကို သိမ်းပိုက်နိုင်၊ အလင်းဝင်သူများရှိဟု သတင်းရင်းမြစ် ပြောဟန်နွေ/People’s Spring
ကချင်လွတ်လပ်ရေးတပ်မတော်(KIA)နှင့် မဟာမိတ်များက မြို့သိမ်းတိုက်ပွဲဆင်နွှဲနေသည့် ကချင်ပြည်နယ် ဗန်းမော်နှင့် မံစီမြို့၌ ယနေ့ (ဒီဇင်ဘာ ၅ရက်)တွင် တိုက်ပွဲဆက်လက်ပြင်းထန်နေပြီး KIAပူးပေါင်းတပ်များက အောင်မြင်မှုများရရှိနေကြောင်း ကချင်စစ်ရေးသတင်းရင်းမြစ်အချို့က ပြောသည်။
KIA ပူးပေါင်းတပ်သည် ဒီဇင်ဘာ ၄ရက် နံနက်အစောတွင် မံစီမြို့ရှိ စစ်ကောင်စီ လက်ကျန်တပ်စခန်းအချို့နှင့် စကခ(၂၁)အခြေစိုက်ရာ ဗန်းမော်မြို့ရှိ စစ်ကောင်စီတပ်စခန်းများကို ပြင်းပြင်းထန်ထန် ထိုးစစ်ဆင်ခဲ့ရာ ယမန်နေ့တစ်ရက်အတွင်း စစ်ကောင်စီတပ်စွဲရာ နေရာ ၁၀ခုကို သိမ်းပိုက်ရခဲ့သည်ဟု စစ်ရေးသတင်းရင်းမြစ်က ပြောသည်။
ထို့ပြင် ယနေ့ (ဒီဇင်ဘာ ၅ရက်)တိုက်ပွဲတွင်စစ်ကောင်စီတပ်စွဲရာနေရာ ၅ခုကို ထပ်မံသိမ်းပိုက်နိုင်ခဲ့သည်ဟု စစ်ရေးသတင်းရင်းမြစ်က အသိပေးသည်။
Public Service Announcement
“အလင်း၀င်သူများရှိ။ဗန်းမော်မြို့နေရာ အများစုရှင်းလင်း၀င်ရောက်နေရာယူပြီး။ စကခ၂၁သို့ ယခုY12မှ ခဲယမ်းထုပ် များချပေးနေပါတယ်” ဟု စစ်ရေးသတင်းရင်းမြစ်က အသိပေးသည်။
အခြား ကချင်စစ်ရေးသတင်းရင်းမြစ်တစ်ဦးကိုလည်း ယနေ့ ဗန်းမော်မြို့တိုက်ပွဲ အခြေအနေမေးမြန်းရာ ထူးခြားမှုရှိသော်လည်း စစ်ကောင်စီ၏ လေကြောင်းရန်ကြောင့် အသေးစိတ် အခြေအနေများ အသိပေး၍ မရဟု ပြောသည်။
“ ဗန်းမော်ကတော့ ကျနော်တို့ဘက်က အခုက တော်တော်ရာခိုင်နှုန်း ၆၅ ရာခိုင်နှုန်းလောက်အောင်မြင်ပြီ။ အသေးစိတ်တော့ ကျနော်မပြောပါရစေနဲ့။ ဘာဖြစ်လို့လဲဆိုတော့ လေယာဉ်က တောက်လျှောက်တက်နေတာအဲဒီဘက်မှာ။ ဒီညနေလည်းပဲ တောက်လျှောက်တက်တယ် လေယာဉ်က ။ဗုံးကြဲတဲ့ အသံမကြားဘဲလာဝဲဝဲ လုပ်နေတာ။ မနေ့ကတော့ တနေကုန်။ ဒီနေ့လည်း နေ့လည်လောက်တော့ လေးငါးခါတော့ လာကြဲသွားတယ်။ မနေ့ညဆို ခြောက်ခါလောက်လာကြဲသွားတယ်။ ကျနော်လည်း အဲဒီလို သတင်းရတယ်နော”ဟု ကချင်စစ်ရေးသတင်းရင်းမြစ်က ပြောသည်။
ဗန်းမော်နှင့် မံစီမြို့သိမ်းတိုက်ပွဲ အခြေအနေနှင့်ပတ်သက်ပြီး KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူအား ဆက်သွယ်မေးမြန်းထားရာ အဆက်အသွယ်မရသေးပေ။
KIA အနေဖြင့် စစ်ရေးသတင်းများကို အချိန်နှင့်တပြေးညီ အသိပေး ထုတ်ပြန်ခြင်းမပြုသကဲ့သို့ တိုက်ပွဲအတွင်း ထိခိုက်ကျဆုံးနှင့် လက်နက်ခဲယမ်းရရှိမှု၊ စစ်သုံ့ပန်း ဖမ်းဆီးရရှိမှု အသေးစိတ် အခြေအနေများ သတင်းထုတ်ပြန်လေ့မရှိပေ။
