အိမ်သွင်/People’s Spring
၈၈အရေးတော်ပုံကာလတွင် ဒီချုပ်ပါတီခေါင်းဆောင်ဒေါ်အောင်ဆန်းစုကြည်၏လုံခြုံရေး တာဝန်ယူခဲ့သည့် သုံးရောင်ခြယ်ကျောင်းသားသမဂ္ဂအဖွဲ့ဝင် နိုင်ငံရေးအကျဉ်းသားဟောင်း ကိုမြတ်စံ ယနေ့နံနက်ပိုင်းတွင် နှလုံးအမောဖောက်၍ ကွယ်လွန်သွားကြောင်း သတင်းရရှိသည်။
မိတ်ဆွေအပေါင်းအသင်းများကြား လူချစ်လူခင်ပေါ်များသည့် ကိုမြတ်စံသည် စိန့်ပေါလ်ကျောင်းသားဟောင်းဖြစ်ပြီး ကွယ်လွန်ချိန်တွင် အသက်(၅၉)နှစ်အရွယ်ရှိပြီ ဖြစ်သည်။
ယနေ့ (ဒီဇင်ဘာ ၆ရက်) နံနက် ၆နာရီခွဲတွင် ရန်ကုန်မြို့နေအိမ်၌ နှလုံးအမောဖောက်၍ ကွယ်လွန်သွားခြင်းဟု ကိုမြတ်စံ၏ မိတ်ဆွေတစ်ဦးက ပြောသည်။
Public Service Announcement
” ထောင်ထဲက ဒဏ်တွေလေဗျာ။ သူ ထောင်နှစ်ရှည်နေခဲ့ရတာ။ လွတ်ကာနီးမှ ထပ်ပြီး အမှုတွေတိုးပြီး ထောင်ထပ်ချခံခဲ့ရတာ”ဟု ကိုမြတ်စံ၏မိတ်ဆွေက ပြောသည်။
၈၈ အရေးတော်ပုံကာလတွင် ဒီချုပ်ပါတီခေါင်းဆောင်ဒေါ်အောင်ဆန်းစုကြည်၏ လူထုနှင့်တွေ့ဆုံပွဲများတွင် လုံခြုံရေးယူရန်အတွက် ဖွဲ့စည်းခဲ့သည့် သုံးရောင်ခြယ်ကျောင်းသားသမဂ္ဂအဖွဲ့တွင် ကိုမြတ်စံကဦးဆောင်ပါဝင်ခဲ့သည်။
ယင်းအချိန် စစ်အစိုးရက ကိုမြတ်စံကို ဖမ်းဆီးပြီး နိုင်ငံရေးပုဒ်မများဖြင့် နှစ်ရှည်ထောင်ဒဏ်ချမှတ်ခဲ့သည်။ ပြန်လွတ်မြောက်လာချိန်၌ ခါးနာဝေဒနာနှင့် အခြားအသေးစားကျန်းမာရေးချို့ယွင်းများရင်ဆိုင်ခဲ့ရကြောင်း သိရသည်။
ကိုမြတ်စံ၏ မိတ်ဆွေဖြစ်သော တေးရေးဆရာနိုင်မြန်မာက” မြတ်စံရေ ဒါငါတို့သွားရမယ့်လမ်းလား။
ငါတို့ကို မသိချင်ယောင်ဆောင်နေတဲ့ နိုင်ငံတော်ကြီးကို လှည့်ကြည့်မနေပါနဲ့တော့ကွာ။ မင်းသွားစရာရှိတဲ့အရပ်ကိုသာ သွားပါတော့ငါ့ညီရေ။ ဘာများလွမ်းစရာရှိလို့လည်းကွာ။ နာစရာတွေနဲ့ဒင်းကြမ်းပြည့်နေတဲ့ နိုင်ငံကြီးပါကွာ”ဟု လူမှုကွန်ရက်တွင် ရေးသားထားသည်။
ကိုမြတ်စံကွယ်လွန်ခြင်းအတွက် မိသားစုနှင့်ထပ်တူဝမ်းနည်းရကြောင်း ၈၈ မျိုးဆက်ကျောင်းသားဟောင်း ဦးမြအေးကလည်း လူမှုကွန်ရက်တွင် ရေးသားထားသည်။
