ထားမြတ်/People’s Spring
ချင်းအမျိုးသားတပ်မတော်(CNA)က တီးတိန်မြိုခံပြည်သူတစ်ဦးဖမ်းဆီးသတ်ဖြတ်ခဲ့ကြောင်း ပြည်သူ့ကာကွယ်ရေးတပ်(PDF) ဇိုလဲန်းက ထုတ်ပြန်ခဲ့ပြီး ကျူးလွန်သူများအရေးယူပေးရန် အရေးကြီးဟု အဖွဲ့တာဝန်ရှိသူတစ်ဦးက ပြောသည်။
တီးတိန်မြို့ စကောလမ်းရပ်ကွက်နေ တာလန့်ခန့်ဆွင်းဆိုသည့် အမျိုးသားတစ်ဦးသည် တွန်းဇံမြို့သို့ သွားရောက်စဉ် တုန်းတွောင်းကျေးရွာအနီး၌ CNA တပ်ဖွဲ့များက ဒီဇင်ဘာ ၉ရက်တွင် ဖမ်းဆီးခဲ့ပြီး ဒီဇင်ဘာ ၁၀ရက် နံနက်တွင် အဖမ်းခံရသူ သေဆုံးခဲ့သည်ဟု PDF ဇိုလဲန်းက ထုတ်ပြန်သည်။
ဖမ်းဆီးခံရသူသည် စိတ်ကျန်းမာရေး ချို့ယွင်းသူဖြစ်ကြောင်း ၊ CNA တပ်ဖွဲ့ဝင်များက ရိုက်နှက်နှိပ်စက်ရာ လက်လွန်သေဆုံးသွားကြောင်း PDF ဇိုလဲန်းက ဖော်ပြခဲ့သော်လည်း ယင်းနှင့်ပတ်သက်၍ CNA ၏ တုံ့ပြန်မှုရရှိရန် အဖွဲ့ ပြောရေးဆိုခွင့် ရှိသူ ဆလိုင်းထက်နီထံ မေးမြန်းထားဆဲဖြစ်သည်။
Public Service Announcement
ထိုသို့ သေဆုံးမှုအတွက် တရားမျှတမှုနှင့် တာဝန်ယူမှု၊ တာဝန်ခံမှုရှိစေရန် ကျူးလွန်သူများကို တရားဥပဒေအရ ထိရောက်စွာ အရေးယူပေးရန် PDF ဇိုလဲန်းက ထုတ်ပြန်ခဲ့ပြီး ချင်းလူမျိုး အချင်းချင်း အကြောင်းမဲ့ သတ်ဖြတ်မှုများရပ်တန့်ရန် သတိပေးကြောင်း ဖော်ပြသည်။
“ကျူးလွန်သူများကို ထိရောက်စွာ အရေးယူပေးဖို့ အရေးကြီးပါတယ်။” ဟု PDF ဇိုလဲန်း တာဝန်ရှိသူတ စ်ဦးက ပြောသည်။
PDF ဇိုလဲန်းသည် ချင်းညီနောင်အဖွဲ့ဝင် ဒေသကာကွယ်ရေးတပ်ဖွဲ့ဖြစ်ပြီး CNAအပါအဝင် ဒေသကာကွယ်ရေးတပ်ဖွဲကများဖြင့် စုဖွဲ့ထားသည့် ချင်းပြည်ကောင်စီတပ်များနှင့် ယခင်ကလည်း ပြဿနာ အချို့ရှိခဲ့သည်။
ချင်းညီနောင်၊ မဟာမိတ် ရက္ခိုင့်တပ်တော်(AA)တို့ ပါဝင်သည့် ပူးပေါင်းတပ်များနှင့် ချင်းပြည်ကောင်စီ ပူးပေါင်းတပ်များအကြား ယခင်ကလည်း ပြဿနာအချို့ တိုက်ပွဲအချို့ ရှိခဲ့သည်။
