▪︎စစ်ကောင်စီတပ် အထိနာ၍ ဝမ်ပေါင်အနီးကျေးရွာများအား စစ်ကြောင်းထိုးမီးရှို့နေဟုဆို
ဇေအောင်/People’s Spring
တရုတ်ဝမ်ပေါင်ကုမ္ပဏီ လုံခြုံရေးယူပေးထားသော စစ်ကောင်စီတပ်နှင့် တော်လှန်ရေးတပ်ဖွဲ့များ တိုက်ပွဲဖြစ်ပွားပြီး စစ်ကောင်စီတပ်အထိနာ၍ ဝမ်ပေါင်အနီးကျေးရွာများ စစ်ကြောင်းထိုးမီးရှို့နေကြောင်း ဒေသခံများက ပြောသည်။
ယနေ့(ဒီဇင်ဘာ၁၃ရက်) နံနက်အစောပိုင်းက စစ်ကိုင်းတိုင်း၊ ဆားလင်းကြီးမြို့နယ်ရှိ တရုတ် ဝမ်ပေါင်ကုမ္ပဏီဝင်းအတွင်းမှ စစ်ကောင်စီတပ်နှင့် တော်လှန်ရေးတပ်ဖွဲ့များ ပစ်ခတ်မှုဖြစ်ပွားခဲ့ရာ စစ်ကောင်စီတပ် ထိခိုက်မှုများခဲ့ကြောင်း ဒေသခံများက ပြောသည်။
“တိုက်ပွဲမှာ စစ်ကောင်စီဘက်ကတော့ အထိနာတယ်။အရေအတွက်ကတော့ အတိကျမသိရသေးဘူး။”ဟု ကာကွယ်ရေးအဖွဲ့များနှင့် နီးစပ်သူတစ်ဦးက ပြောသည်။
Public Service Announcement
တိုက်ပွဲကြောင့် ဝမ်ပေါင်ကုမ္ပဏီအနီး ဆားလင်းကြီးမြို့နယ်မြောက်ခြမ်းရှိ ကျေးရွာ ၆ ရွာမှ ဒေသခံများ ထွက်ပြေးတိမ်းရှောင်နေရကြောင်း၊ မုံရွာဘက်ခြမ်းမှလည်း လက်နက်ကြီးများဖြင့် ပစ်ကူပေးနေကြောင်း ချင်းတွင်းမြစ်ကမ်းဘေးကျေးရွာများသပိတ်ကော်မတီမှ ကိုအောင်ခန့်ဇော်က ပြောသည်။
“လက်နက်ကြီးထုတာ ပြည်သူတွေတော့မထိဘူးလို့ သိရတယ်။ စစ်ကြောင်းက အခုအဲပတ်ဝန်းကျင်မှာပဲ။ ဝမ်ပေါင်နဲ့နီးတယ် အဲရွာတွေက။”ဟု ကိုအောင်ခန့်ဇော်က ပြောသည်။
စစ်ကောင်ီတပ်သည် ညနေပိုင်းတွင် အိုမကျေးရွာ ဝင်ရောက်မီးရှို့ဖျက်ဆီးခဲ့ပြီး စစ်ကြောင်းရှိနေဆဲဖြစ်၍ မီးလောင်ပျက်စီးမှုအခြေအနေ မသိရသေးကြောင်း ဒေသခံများက ပြောသည်။
တိုက်ပွဲဖြစ်စဥ်ကို ဒေသတွင်းတော်လှန်ရေးအဖွဲ့များထံ ဆက်သွယ်မေးမြန်းရန် ကြိုးစားသော်လည်း လက်တလောဆက်သွယ်၍ မရသေးပေ။
စစ်ကောင်စီတပ်၊ တရုတ်ဝမ်ပေါင်နှင့် ယန်စီကုမ္ပဏီတို့ ပူးပေါင်း၍ ကြေးနီစီမံကိန်းကို ၂၀၂၂ နှစ်လယ်ပိုင်း မှစတင်ကာ ပြန်လည်လည်ပတ်ရန် ကြိုးစားခဲ့သည်။
ဝမ်ပေါင်ကုမ္ပဏီမှ စစ်ကောင်စီတပ်သည် စီမံကိန်းအနီးကျေးရွာများအား စစ်ကြောင်းထိုး၊သတ်ဖြတ်မီးရှို့မှုများကို ၂၀၂၁ ဒီဇင်ဘာကတည်းကပင် ကျူးလွန်ခဲ့သည်။ ပြည်သူများအား လူသားဒိုင်းအဖြစ် ဖမ်းဆီးခေါ်ဆောင်သွားခြင်း၊ အကြမ်းဖက်သတ်ဖြတ်ခြင်းများ ပြုလုပ်ခဲ့သည်။ ထို့အပြင် လက်နက်ကြီးများဖြင့် ပစ်ခတ်ခဲ့၍ ပြည်သူထိခိုက်သေဆုံးမှုများ ရှိခဲ့သည်။
မြန်မာနိုင်ငံတွင် သတ္တုတူးဖော်ရေးလုပ်ကိုင်နေသည့် တရုတ်နိုင်ငံမှ ဝမ်ပေါင်ကုမ္ပဏီကို အမေရိကန်နှင့်ဗြိတိန်တို့က ၂၀၂၁တွင် ဒဏ်ခတ်အရေးယူထားသည်။
