ဇေအောင်/People’s Spring
စစ်ကိုင်းတိုင်း၊ ဆားလင်းကြီးမြို့နယ်တွင် ပျူစောထီးအားကောင်းရာ ကံကြီးကုန်းကျေးရွာသို့ ရိက္ခာပို့ပြီးပြန်လာသည့် ချင်းတွင်းမြစ်အတွင်းမှ စစ်ကောင်စီရေယာဥ်နှစ်စီးအား တော်လှန်ရေးအဖွဲ့များက တိုက်ခိုက်ခဲ့သည်။
ယနေ့ (ဒီဇင်ဘာ ၁၁ ရက်) နံနက်ပိုင်းက မုံရွာမြို့၊ အုန်းပင်ဆိပ်ကမ်းမှ ချင်းတွင်းမြစ်ကြောင်းအတိုင်း အောက်ဘက်သို့ စုန်ဆင်းလာသော စစ်ကောင်စီ၏ အမြန်ရေယာဉ်နှစ်စီးသည် ကံကြီးကုန်းကျေးရွာသို့ လက်နက်ခဲယမ်းများနှင့် ရိက္ခာများ ချပြီး မုံရွာသို့ပြန်လည် ဆန်တက်လာခဲ့သည်။
ထိုအချိန် ချင်းတွင်းမြစ်တနေရာမှ ရှေ့ထွက်ပြောင်းတိုက်များ၊ အဖူးထွက်ပြောင်းတိုက်များနှင့် လက်နက်ငယ်များဖြင့် ပစ်ခတ်တိုက်ခိုက်ခဲ့ကြောင်း ချင်းတွင်းဒိုင်းနမိုက်ပြည်သူ့ကာကွယ်ရေးတပ်ဖွဲ့(Salingyi)ဦးဆောင်သူ ကိုဗိုက်က ပြောသည်။
Public Service Announcement
“ထိခိုက်မှုတော့ ရှိနိုင်တယ်။ အနောက်ဘက်ကမ်းကော မုံရွာဘက်ကမ်းကော ညှပ်တိုက်တာဆိုတော့လေ။ သတင်းပေးတာနောက်ကျလို့ အစုန်မှာမလုပ်လိုက်ရဘဲ အဆန်မှာ ဆားလင်းကြီးတနေရာကနေ ဖြတ်တိုက်တာ။”ဟု ကိုဗိုက်က ပြောသည်။
စစ်ကောင်စီ အမြန်ရေယာဉ်နှစ်စီးကလည်း လက်နက်ကြီး၊ လက်နက်ငယ်များဖြင့် ရမ်းသမ်းပစ်ခတ်၍ ဆန်တက်သွားကာ မုံရွာဆိပ်ကမ်းသို့ ပြန်လည်ရောက်ရှိသွားကြောင်း သိရသည်။
အဆိုပါတိုက်ခိုက်မှုကို ချင်းတွင်းဒိုင်းနမိုက်ပြည်သူ့ကာကွယ်ရေးတပ်ဖွဲ့ (Salingyi) နှင့် ယင်းမာပင်ခရိုင်တပ်ရင်း(၃၅) တပ်ခွဲ(၃) တောင်ပံနီအထူးပြောက်ကျားတပ်ဖွဲ့ ၊ မျိုးဆက်သစ် ၊ပြည်သူ့လုံခြုံရေးအဖွဲ့ ပလဖ တို့ပူးပေါင်းကာ တိုက်ခိုက်ခဲ့ခြင်းဖြစ်သည်။
စစ်ကောင်စီသည် မုံရွာနှင့် ချောင်းဦးမြို့နယ်အတွင်းရှိ ပျူစောထီးအားကောင်းရာ ကျေးရွာများအား ရိက္ခာပို့ရန် မြေပြင်မှယာဥ်တန်းများဖြင့် သွားတိုင်း မိုင်းဆွဲတိုက်ခိုက်ခံနေရ၍ ရေကြောင်းမှတဆင့် ပို့ဆောင်နေခြင်းဖြစ်သည်။
