အိမ်သွင်/People’s Spring
ရခိုင်ပြည်နယ်၊ တောင်ကုတ်မြို့တွင် စစ်တပ်၏ နောက်ဆုံးကျန်သော အမှတ် (၅) စစ်ဆင်ရေးကွပ်ကဲမှုဌာနချုပ် (စကခ ၅) ကို အာရက္ခတပ်တော်(AA)ကအပြီးသတ်ာသိမ်းယူလိုက်ပြီးနောက် စစ်သားများမှာ တောလမ်းအတိုင်း ပဲခူးတိုင်းအတွင်းရှိ ပြည်မြို့ ၊ဥသျှစ်ပင်မြို့များဘက်သို့ ထွက်ပြေးနေကြကြောင်း ဒေသခံအချို့က ပြောသည်။
တောင်ကုတ်မြို့မှစကခ(၅)ကို AA က ဒီဇင်ဘာ ၁၄ ရက်တွင်အပြီးသတ် သိမ်းယူလိုက်ပြီး တစ်မြို့လုံးအား ထိန်းချုပ်လိုက်ပြီဖြစ်သည်။
“တောင်ကုတ်ကျသွားတော့ စစ်တပ်က ပြည်ဘက်တို့ ဥသျှစ်ပင်တို့ဘက်ကို တောလမ်းကနေ ထွက်ပြေးလာတယ်လို့ သိရတယ်။ နောက်ပြီး ပြည်ကို ဌာနဆိုင်ရာ ဝန်ထမ်းတွေပါအများကြီးရောက်လာတယ်။ စစ်တပ်ကတော့ တမြို့လုံး ခြေရှုပ်နေတယ်”ဟုပြည်မြို့ခံတဦးကပြောသည်။
Public Service Announcement
ရခိုင်ပြည်နယ်မှ ထွက်ပြေးနေသည့်စစ်ကောင်စီတပ်ဖွဲ့ဝင်များသည် သစ်မောင်ခိုသယ်ဆောင်သူများ၏အကူအညီကို ယူနိုင်ဖွယ်ရှိပြီး AA အနေဖြင့် သစ်မှောင်ခိုသမားများကိုပါ တင်းတင်းကျပ်ကျပ်စစ်ဆေးရန် ဧရာဝတီတိုင်း နှင့်ရခိုင်ပြည်နယ် နယ်စပ်မှ ဒေသခံအချို့က အကြံပြုသည်။
AA က တောင်ကုတ်မြို့တွင် နောက်ဆုံးကျန်သောစကခ(၅)ကို ဒီဇင်ဘာလ ၁၄ရက် ညနေ ၄ နာရီ ၁၀ မိနစ်ခန့်တွင် အပြီးသတ် တိုက်ခိုက်သိမ်းယူပိုက်ခဲ့ပြီး ထွက်ပြေးနေသောစစ်ကောင်စီတပ်ဖွဲ့ဝင်များကို လိုက်လံရှင်းလင်းနေသည်ဟု အာရက္ခတပ်တော်(AA)ပြောခွင့်ရ ခိုင်သုခက ဒေသတွင်းသတင်းဌာနဖြစ်သောArakan Princess Mediaကို ဒီဇင်ဘာ ၁၅ ရက်တွင်အတည်ပြုဖြေကြားထားသည်။
တောင်ကုတ်မြို့နယ်မှ စစ်ကောင်စီစခန်း၁၀ ခုကို တိုက်ခိုက်သိမ်းယူပြီးအဓိကစခန်းဖြစ်သည့် စကခ (၅) တပ်မဌာနချုပ် နှင့် စကခ (၅)လက်အောက်ရှိ ခမရ (၃၄၆) နှင့် ခမရ (၅၄၄)ကို ဆက်လက်ထိုးစစ်ဆင်တိုက်ခိုက်နေသည်ဟု AAက နိုဝင်ဘာ ၂၉ ရက်တွင်သတင်းထုတ်ပြန်ခဲ့သည်။ နိုဝင်ဘာ ၂၉ ရက်နောက်ပိုင်းတိုက်ပွဲများတွင်ခမရ (၃၄၆) နှင့် ခမရ (၅၄၄)ကို AAက ထပ်မံသိမ်းယူခဲ့သည်။
စကခ(၅)ကိုAAက ဒီဇင်ဘာလဆန်းတွင် ပိတ်ဆို့ထားခဲ့ပြီး လက်နက်ချရန်ကမ်းလှမ်းခဲ့သော်လည်း ဒီဇင်ဘာလ၉ရက်နေ့အထိ လက်နက်မချ၍ ထိုးစစ်ဆင်တိုက်ခိုက်ခဲ့ခြင်းဟု ရခိုင်စစ်ရေး သတင်းရင်းမြစ်က ပြောသည်။
AA သည် ဒီဇင်ဘာလ၈ရက်နေ့ကလည်း မောင်တောမြို့မှ နောက်ဆုံးလည်းကျန်စခန်းဖြစ်သည့် နခခ(၅)ကိုကိုတိုက်ခိုက်သိမ်းယူပြီး မောင်တောဒေသတခုလုံးကိုထိန်းချုပ်ခဲ့သည်။ ယင်းတိုက်ပွဲ၌ စစ်ဆင်ရေးကွပ်ကဲမှုဌာနချုပ်(စကခ -၁၅) စကခမှူးဗိုလ်မှူးချုပ်သူရိန်ထွန်းနှင့် စစ်သုံ့ပန်းအများအပြားကိုဖမ်းဆီးခဲ့သည်။
တောင်ကုတ်မြို့သိမ်းတိုက်ပွဲနှင့်ပတ်သက်၍ အသေးစိတ်အခြေအနေကိုမသိရှိရသေးပေ။ AA က မကြာခင် ကြေညာဖွယ်ရှိသည်ဟု ရခိုင်စစ်ရေးသတင်းရင်းမြစ်ကပြောသည်။
လတ်တလောတွင်အမ်းမြို့ရှိ နောက်ဆုံးလက်ကျန်ဖြစ်သော အနောက်ပိုင်းတိုင်းစစ်ဌာနချုပ်(နပခ)ကို AAက အပြင်းအထန်ထိုးစစ်ဆင်တိုက်ခိုက်နေသည်။တချိန်တည်းတွင် ဂွမြို့နယ်တွင် ဂွမြို့ပေါ်ရှိ စစ်တပ်စခန်းများကို AA ကစတင်ထိုးစစ်ဆင်တိုက်ခိုက်နေပြီဖြစ်သည်။
ထိုကြောင့် AA သည် ရခိုင်ပြည်နယ်တွင် မြို့နယ် ၁၂ မြို့နယ် နှင့် ချင်းပြည်နယ် ပလက်ဝ မြို့နယ်တို့ကို သိမ်းပိုက်ထိန်းချုပ်ထားသည်။ အမ်းနှင့် ဂွမြို့နယ်တို့ကိုသိမ်းပိုက်ပြီးပါက ရခိုင်ပြည်နယ်တွင် ၁၇ မြို့နယ်အနက် ၁၄ မြို့နယ်ကိုအလုံးစုံသိမ်းပိုက်ပြီးဖြစ်မည်ဖြစ်သည်။ AA ထိုးစစ်ဆင်သိမ်းပိုက်ရန် ရခိုင်ပြည်နယ်တွင်စစ်တွေ၊ကျောက်ဖြူ ၊မာန်အောင်မြို့နယ်တို့သာကျန်ရှိတော့သည်။
(ရခိုင်ပြည်နယ် စစ်ရေးအခြေအနေ နှင့် ဒေသချင်းထိစပ်နေသောမြို့နယ်များပြအင်ဖိုဂရပ်/ စကခ(၅)မြေပုံ/ မောင်တောနခခ (၅)တိုက်ပွဲမှ AAတပ်ဖွဲ့ဝင်များ။ဓါတ်ပုံ-AA Info Desk)
