မေ/People’s Spring
နေအိမ်ထဲအထိ ပေါ်တာဝင်ဆွဲတာတွေဖြစ်နေတဲ့ ပုဂံမြို့မှာ ၂၀၂၄ နှစ်သစ်ကူးရုံးပိတ်ရက်အတွက် ဟိုတယ်အားလုံး ဘိုကင်ပြည့်နေပြီလို့ ခရီးသွားလာကြမယ့်သူတွေက ပြောပါတယ်။
မန္တလေးမြို့ကနေ သွားရောက်လည်ပတ်ဖို့ပြင်ဆင်နေသူတစ်ဦးက “အခန်းရှာနေတာမရတော့ဘူး။ဘုန်းကြီးကျောင်းတွေတော့ လိုက်ချိတ်နေတာ။ရရင်တော့ ဒီနှစ် နှစ်ကူးကပုဂံပေါ့”လို့ပြောပါတယ်။
ပုဂံမြို့ကိုဒီဇင်ဘာလ၁၁ရက်နေ့ မနက်၃နာရီမှာ နေအိမ်ထဲအထိဝင်ပြီး လူစာရင်းစစ်ကာ လူငယ်တွေကိုစစ်မှုထမ်းဖို့အတွက်ပေါ်တာဆွဲသွားတယ်လို့ဒေသခံတွေက ပြောပါတယ်။
Public Service Announcement
“အရင်ကဆို သတင်းရရင် အကုန်ရှောင်တိမ်းအိပ်ကြတာ။ပြီးတော့ရွာတွေဘက်ဆွဲတာများတယ်။ဒီတခေါက်ကိုမြို့ပေါ်က အိမ်တွေလိုက်ဆွဲတာ။တော်တော်ပါသွားတယ်”လို့ ပုဂံဒေသခံအမျိုးသမီးတစ်ဦးကပြောပါတယ်။
ဒါ့အပြင် ညောင်ဦးမြို့အနီး ဗျတ္တပန်းဆက်လမ်းဘေးက ကျေးရွာတွေကိုလည်း ညဘက်တွေမှာ ဝင်ရောက်စီးနင်းပြီးပေါ်တာဆွဲခဲ့တယ်လို့ ဒေသခံတစ်ဦးက ပြောပါတယ်။
“ရွာဝင်စီးလို့ ကျွန်တော်တို့ ၃ရက်လောက်တောထဲ သွားအိပ်ရသေးတယ်။ရွာထိပ်စစ်ကားရောက်မှသိတာ။နေ့ခင်းကြီးဝင်စီးတာ”လို့ ညောင်ဦးမြို့နယ်က ဒေသခံတစ်ဦးက ပြောပါတယ်။
အဲဒီရွာမှာတော့ အမျိုးသားတွေအားလုံးထွက်ပြေးကြတာမို့ ဖမ်းဆီးခံခဲ့ရသူမရှိဘူးလို့ ဆိုပါတယ်။
ပြီးခဲ့တဲ့ သီးတင်းကျွတ်ပွဲတော်ကာလရုံးပိတ်ရက်များအတွင်းမှာ ပုဂံမြို့ကိုလာရောက်လည်ပတ်သူတွေကို ညောင်ဦးခရိုင်-ပကဖ(ပုဂံပြည်ဘီလူးတပ်)က သတိပေးမှုပြုလုပ်ခဲ့ပါသေးတယ်။
ပုဂံမြို့ကို အပျော်ခရီးထွက်လာမယ့်ပြည်သူတွေအနေနဲ့ စစ်ကောင်စီယာဥ်တန်းတွေနဲ့ အဝေးဆုံးနေပေးကြဖို့နဲ့ ဒလန်တွေပိုင်ဆိုင်တဲ့ စားသောက်ဆိုင်တွေမှာ စားသောက်တာတွေ မလုပ်ကြဖို့ သတိပေးပေးခဲ့ပါတယ်။
ရှေးဟောင်းပုဂံမြို့ တဘက်ကမ်း ပခုက္ကူမြို့နယ်၊ မြစ်ခြေမြို့မှာလည်း တိုက်ပွဲတွေ မကြာခဏ ဖြစ်နေပါတယ်။ ဒါ့အပြင် အခုလပိုင်းတွေအတွင်းမှာ ပုဂံ၊ညောင်ဦးမြို့က စစ်ကောင်စီခန့် အုပ်ကြီးတွေနဲ့ သတင်းပေးပျူစောထီးတွေကို ပစ်ခတ်ရှင်းလင်းတာတွေလည်း ပြုလုပ်နေပါတယ်။
စစ်ကောင်စီတပ်က မန္တလေးတိုင်းအတွင်း ၎င်းတို့စိုးမိုးထားတဲ့မြို့နယ်တွေကို စစ်မှုထမ်းဖို့အတွက်ပေါ်တာဆွဲတာတွေပြုလုပ်နေပြီး မန္တလေးမြို့မှာ လူငယ်၁၂၀ကျော်ပေါ်တာဆွဲခံထားရတယ်လို့ မန္တလေးသပိတ်အင်အားစုက ထုတ်ပြန်ထားပါတယ်။
