တော်လှန်ရေးအဖွဲ့များအပါအဝင် မူးယစ်ဆေးရောင်းဝယ်သုံးစွဲပါက ဖမ်းဆီးအရေးယူမည်ဟု မြိုင်ပကဖသတိပေး
ဟာနာဆန်/People’s Spring
မကွေးတိုင်း၊ မြိုင်မြို့နယ်ရှိ ရေနံမှော်များတွင် မူးယစ်ဆေးဝါး ရောင်းချသုံးစွဲမှုများပြားနေပြီးတော်လှန်ရေးအဖွဲ့များအပါအဝင် ပြည်သူများ မူးယစ်ဆေးဝါးရောင်းဝယ်သုံးစွဲပါက ဖမ်းဆီးအရေးယူမည်ဟု မြိုင်မြို့နယ်ပြည်သူ့ကာကွယ်ရေးအဖွဲ့(ပကဖ)က သတိပေးကြေညာသည်။
နိုင်ငံရေးရှုပ်ထွေးနေသည့်ကာလကို အခွင့်ကောင်းယူကာ မြိုင်မြို့နယ်အတွင်း မူးယစ်ဆေးဝါးများ ရောင်းဝယ်သုံးစွဲနေကြောင်း၊ ပြည်သူလူထုအတွင်းဖြစ်စေ၊ PDF တပ်ရင်းများ၊ ပကဖများ၊ ဒေသတွင်းတပ်များမှဖြစ်စေ ရောင်းဝယ်သုံးစွဲမှုမရှိစေရေး ကြားကာလ ဒေသန္တရဥပဒေတစ်ရပ်ထုတ်၍ ဖမ်းဆီးအရေးယူနိုင်ရန် ဆောင်ရွက်သွားရမည်ဖြစ်ကြောင်း မြိုင်ပကဖက ဒီဇင်ဘာ ဒုတိယပတ်အတွင်းက ထုတ်ပြန်အသိပေးသည်။
မူးယစ်ဆေးဝါးရောင်းဝယ်သုံးစွဲသူများ ဖမ်းဆီးရမိပါက ငွေဒဏ်၊ အချုပ်ဒဏ်နှင့် နယ်နှင်ဒဏ်များအထိပေးရန်၊ မူးယစ်ဆေးဝါးရောင်းချခြင်းကြောင့် ရရှိလာသည့် ငွေကြေးနှင့်ပိုင်ဆိုင်သည့်ဥစ္စာပစ္စည်းများကိုလည်း ပြည်သူပိုင်သိမ်းစည်းမည်ဟု မြိုင်ပကဖက သတိပေးသည်။
Public Service Announcement
ထို့အပြင် တော်လှန်ရေးအဖွဲ့များ မူးယစ်ဆေးဝါးရောင်းဝယ်သုံးစွဲပါက တစ်ဖွဲ့နှင့်တစ်ဖွဲ့ ထောက်ထားခြင်းမရှိဘဲ ဖမ်းဆီးရန်လိုအပ်ကြောင်း မြိုင်ပကဖက ပြောသည်။
“မူးယစ်ဆေးဝါးနဲ့ အဖွဲ့ထဲကသူတွေမပတ်သက်အောင်ပေါ့။ ပတ်သက်တာမရှိပါဘူး။ မရှိပေမဲ့သို့လောသို့လောနဲ့ဆိုရင် ကိုယ့်လူတွေပါ ပါမှာစိုးလို့သတိပေးထားတာပါ။”ဟု မြိုင်ပကဖ ခေါင်းဆောင် ကိုလက်ယျာက ပြောသည်။
မူးယစ်ဆေးဝါးများသည် ရေနံမှော်များရှိသည့် ကျေးရွာများနှင့် အနီး ဝန်းကျင်ကျေးရွာများ၊ မှော်ပေါက်သည့်တောတောင်များ၌ လူသူစည်ကား၍ ငွေကြေးပေါများစွာ သုံးစွဲနိုင်ပြီး လူငယ်လူရွယ်လူကြီးများ ရောင်းချသုံးစွဲနေသည်ဟု တိုင်ကြားလာကြောင်း၊ ထို့ကြောင့်
မူးယစ်ဆေးဝါးများ ရောင်းဝယ်သုံးစွဲမှုမရှိစေရေး ဖမ်းဆီးသွားမည်ဖြစ်ကြောင်း မြိုင်ပကဖက ထပ်မံသတိပေးသည်။
မြိုင်ပကဖသည် မြိုင်နယ်အတွင်း လောင်းကစားဝိုင်းများကိုလည်း အရေးယူမည်ဟု သတိပေးကြေညာထားသည်။
