အိမ်သွင်/People’s Spring
အာရက္ခတပ်တော်(AA) ၏ ထိုးစစ်ဆင်နေသည့်ဂွမြို့နယ်နှင့်ဆက်စပ်နေသော ဧရာဝတီတိုင်း၊ ရေကြည်မြို့နယ်ရှိအမြောက်တပ်-အမတ(၃၄၄)တွင်စစ်ကောင်စီက လေယာဉ်ကွင်းတစ်ခု အရေးပေါ် ဆောက်လုပ်နေသည်။
“လေယာဉ်ကွင်းဆောက်လုပ်ရေးစီမံကိန်းက အားချင်းလုပ်တာ။ ရခိုင်ဘက်မှာ ဆက်လို့မရတော့ ရေကြည်မှာ အရေးပေါ်လုပ်နေတာ။ အမြောက်တပ်နဲ့ စီမံကိန်းဘက်ကို လူတွေ ဖြတ်ခွင့်မပေးဘူး” ဟု ဒေသခံတစ်ဦးကပြောသည်။
ဆောက်လုပ်နေသည်မှာ လေယာဉ်ကွင်းအသေးစားဖြစ်ကြောင်းသိရပြီး အခြားအချက်အလက်များကိုမသိရသေးပေ။
Public Service Announcement
ရေကြည်မြို့သည် စစ်ကောင်စီလက်အောက်ခံ ဧရာဝတီတိုင်းဝန်ကြီးချုပ်၏ ဇာတိမြို့ဖြစ်ပြီး လုံခြုံရေးအထူးတင်းကြပ်ထားသလို အာရက္ခတပ်တော်( AA)နှင့် PDF များ၏တိုက်ခိုက်လာနိုင်ခြေကို တုန့်ပြန်ရန်ဆိုကာ ခံစစ်ပြင်ထားသည်ဟု သတင်းရရှိသည်။
ရေကြည်မြို့နယ်ပြည်သူ့ကာကွယ်ရေးအဖွဲ့က ဒေသခံများ လုံခြုံရေးသတိရှိရန်၊ စစ်ရေးသတင်းများမျှဝေကြရန် တိုက်တွန်းထားသည်။
ဂွ-ငါးသိုင်းချောင်း-ရေကြည်လမ်းသည် တစ်ဆက်တည်းရှိပြီးလက်ရှိတွင် AA က ဂွမြို့သိမ်းတိုက်ပွဲဆင်နွှဲနေသည်။ ဂွမြို့တွင် စစ်ရေးရှုံးနိမ့်နေသည့်စစ်ကောင်စီ ဧရာဝတီတိုင်းဘက်ခြမ်းတွင် အင်အားအများအပြားတိုးထားသည်။
လက်ရှိတွင် စစ်ကောင်စီက ပုသိမ်လေတပ်စခန်းကိုအသုံးပြု၍ လေကြောင်းတိုက်ခိုက်မှုများပြုလုပ်နေသည်။
ရေကြည်မြို့နယ်နှင့် မ်ိုင်၅၀ခန့်ဝေးသော ဟင်္သာတမြို့တွင်လည်း လေယာဉ်ကွင်းရှိပြီး အသုံးပြုခြင်းမရှိသေးပေ။အဆိုပါ လေယာဉ်ကွင်းသည် ဟင်္သာတမြို့၊ ခလရ(၁၈) အနီး၌တည်ရှိသည်။ ခလရ(၁၈)မှ စစ်ကောင်စီတပ်ဖွဲ့ဝင်အများအပြားသည် ရခိုင်ပြည်နယ်တိုက်ပွဲသို့ စေလွှတ်ခြင်းခံရပြီး နိုဝင်ဘာ၂၄ရက်နေ့က ဂွမြို့နယ်တိုက်ပွဲတွင် စစ်ကြောင်းတခုလုံး ချေမှုန်းတိုက်ခိုက်ခံခဲ့ရသည်။
စစ်ကောင်စီသည် ငါးသိုင်းချောင်းတံတားအနီးတွင်လည်း တပ်စွဲထားကာ လက်နက်ကြီးများတပ်ဆင်ထားကြောင်းသတင်းရရှိသည်။ ဂွမြို့နယ်ဘက်သို့ လက်နက်ကြီးပစ်ခတ်မှုများရှိနေသည်ဟု ဒေသခံများကပြောသည်။
ထို့အပြင် ရခိုင်ပြည်နယ်နှင့် ဧရာဝတီတိုင်းနယ်စပ် ရခိုင်ရိုးမနေရာအများစုတွင် မြေမြုပ်မိုင်းအများအပြားထောင်ထား၍ အရပ်သားများအတွက် အန္တရာယ်အလွန်ကြီးမားနေသည်ဟု ဒေသခံများကပြောသည်။
“ဂွမြို့မှာတော့ တိုက်ပွဲတွေဆက်လက်ပြီးတော့ ပြင်းထန်နေတယ်။ ပြီးလို့ရှိရင် ဂွမြို့ကနေ ဧရာ၀တီတိုင်းဘက်ကို ကျော်တဲ့ ဂွ-ငသိုင်းချောင်းလမ်းပေါ့။အဲဒီ ရိုးမတောင်ပေါ်မှာ တိုက်ပွဲတွေဆက်လက်ပြီး ပြင်းထန်နေတာရှိပါတယ်”ဟုAA ပြောရေးဆိုခွင့်ရှိသူ ခိုင်သုခက People’s Spring သို့ပြောသည်။
(ရေကြည်မြို့နှင့်အနီးဝန်းကျင်ဒေသကို Google Earth တွင်တွေ့ရမှု /ရေကြည်မြို့အဝင်ဆိုင်းဘုတ်/ ရခိုင်ပြည်နယ်စစ်ရေးအခြေအနေပြ အင်ဖိုဂရပ်)
