လက်နက် ၁၀လက်ရ၊ တော်လှန်ရေးရဲဘော် ၂ဦး ကျဆုံးဟု အသိပေး
ဟန်နွေ/People’s Spring
ပြည်သူ့ကာကွယ်ရေးတပ်မတော်၊ တောင်ပိုင်းစစ်ဒေသ၌ တပတ်အတွင်း စစ်ကောင်စီတပ်အား တိုက်ခိုက်မှု ၂၁ကြိမ်ရှိခဲ့ကြောင်း တောင်ပိုင်းစစ်ဒေသက ယနေ့(ဒီဇင်ဘာ ၂၁ရက်) ထုတ်ပြန်သည်။
ဒီဇင်ဘာ ၁၄ မှ ဒီဇင်ဘာ ၂၀ရက်ထိ ၇ရက်တာကာလအတွင်း ရန်သူစစ်ကောင်စီတပ်အား တောင်ပိုင်းစစ်ဒေသ၊ ပြည်သူ့ကာကွယ်ရေးတပ်မတော်(PDF)နှင့် တော်လှန်ရေးပူးပေါင်းအဖွဲ့က သွားရောက်တိုက်ခိုက်ခဲ့ခြင်းဖြစ်ပြီး တိုက်ခိုက်မှုများအနက် အပြန်အလှန် ထိတွေ့ပစ်ခတ်မှု ၈ကြိမ်နှင့် စခန်းသိမ်းတိုက်ပွဲ ၂ကြိမ် ပါဝင်သည်ဟု အသိပေးသည်။
အဆိုပါတိုက်ပွဲများအတွင်း စစ်ကောင်စီတပ်သား ၂၉ ဦးသေဆုံးပြီး ၂၅ဦး ဒဏ်ရာရရှိခဲ့ကြောင်း၊ စစ်ကောင်စီတပ်ထံမှ MA အမျိုးအစား ၇ လက်၊ G3 ၂ လက်၊ ၆၀ မမ ပြောင်းတို တစ်လက် စုစုပေါင်းလက်နက်မျိုးစုံ ၁၀လက်နှင့်ကျည်၊ ခဲယမ်းများရရှိခဲ့သည်ဟု ဆိုသည်။
Public Service Announcement
တိုက်ပွဲများအတွင်း တော်လှန်ရေးပူးပေါင်းတပ်ဖွဲ့များဘက်က ရဲဘော် ၂ဦး ကျဆုံးခဲ့ပြီး ၁၁ဦး ဒဏ်ရာရရှိကာ ဒရုန်းတစ်စီး ပျက်စီးခဲ့သည်ဟုဆိုသည်။
တောင်ပိုင်းစစ်ဒေသနယ်မြေတွင် ကရင်၊ မွန်၊ တနင်္သာရီ၊ ပဲခူး ဒေသများ ပါဝင်ရာ ယင်းဒေသတွင်း စစ်ရေး အခြေအနေများကို အပတ်စဉ် ထုတ်ပြန်အသိပေးလျက်ရှိသည်။
ပြီးခဲ့သည့် တစ်ပတ်အတွင်းတိုက်ပွဲများအနက် ဒီဇင်ဘာ ၁၇ရက်က PDFနှင့် မွန်၊ ကရင် တော်လှန်ရေးတပ်များ ပူးပေါင်းပြီး မွန်ပြည်နယ် ရေးမြို့နယ် ကွမ်ကျိုက်ရွာ စစ်ကောင်စီတပ်စခန်းကို သိမ်းပိုက်ခဲ့ပြီး တနင်္သာရီတိုင်း ရေဖြူညမို့နယ် ကံပေါက်ဒေသရှိ ရေကန်တောင်တပ်စခန်းကိုလည်း ပူးပေါင်းတပ်က သိမ်းပိုက်ခဲ့သည်။ အဆိုပါတိုက်ပွဲများအတွင်း စစ်ကောင်စီတပ်က အရာရှိ အပါအဝင် သေဆုံးထိခိုက်မှု၊ လက်နက်ခဲယမ်းရရှိမှုများ ရှိခဲ့ကြောင်း တိုက်ပွဲတွင်ပါဝင်သည့် PDF ဒေါနတပ်ရင်းက အသိပေးထားသည်။
ရေဖြူမြို့နယ်အတွင်း စစ်ကောင်စီစစ်ကြောင်းက စစ်ရေးလှုပ်ရှားမှု ဆက်ရှိနေ၍ တော်လှန်ရေး ပူးပေါင်းတပ်များက လည်း ပြန်လည်တိုက်ခိုက်ရန် ပြင်ဆင်မှုများ ပြုလုပ်ထားကြောင်း ဒေါနတပ်ရင်း စစ်ကြောင်းမှူး စောဒါးကိုက ယမန်နေ့ ဒီဇင်ဘာ ၂၀ရက်တွင် ပြောထားသည်။
