■သွင်းကုန်ဈေးနှုန်းများ ပိုကြီးလာတော့မည်ဟု လုပ်ငန်းရှင်များပြော
တာရာ/People’s Spring
စစ်ကောင်စီက သွင်းကုန်များကို အခွန်ကောက်ရာတွင် ယခင်သတ်မှတ်ထားသည့် တစ်ဒေါ်လာ ၂၁၀၀ အစား ဗဟိုဘဏ်သတ်မှတ်ထားသည့် ဈေးကွက်ပေါက်ဈေးအတိုင်းပြောင်းလဲကောက်ခံမည်ဖြစ်ကြောင်း စစ်ကောင်စီထိန်းချုပ်ထားသည့် အကောက်ခွန်ဦးစီးဌာနက ထုတ်ပြန်လိုက်သည်။
ထိုသို့ငွေလဲနှုန်း တိုးမြင့်လိုက်ခြင်းကို ၂၀၂၅ခုနှစ် ဇန်နဝါရီ ၁ ရက်စတင်မည်ဖြစ်ပြီး အကျိုးဆက်အနေဖြင့် သွင်းကုန်ဈေးနှုန်းများ ဈေးပိုကြီးမားလာမည်ဖြစ်ကြောင်း သွင်းကုန်လုပ်ငန်းရှင်များကပြောသည်။
“ဒီပုံစံနဲ့ဆိုသွင်းကုန်တွေကဈေးနှုန်း နှစ်ဆလောက်တက်သွားလိမ့်မယ်။ ပို့ကုန်ရငွေကိုလည်း အရင်လို ၂၁၀၀ (ကျပ်) မဟုတ်ဘဲ။ ဈေးကွက်ပေါက်ဈေးအတိုင်း လဲပေးရင်တော့ နည်းနည်းသက်သာလိမ့်မယ်”ဟု ပို့ကုန်လုပ်ငန်းရှင်တစ်ဦးကပြောသည်။
Public Service Announcement
စစ်ကောင်စီ ဗဟိုဘဏ်က ရည်ညွန်းဈေးတစ်ဒါ်လာကို ကျပ် ၂၁၀၀ သတ်မှတ်ထားပြီး ဒီဇင်ဘာ ၂၈ ရက်တွင် ဈေးကွက်ငွေလဲနှုန်းက တစ်ဒေါ်လာ ၃၆၀၀ ကျပ် နှုန်းရှိသည်ဟု စစ်ကောင်စီဗဟိုဘဏ်က သတ်မှတ်ထားသည်။သို့သော် ပြင်ပဈေးကွက်တွင် တစ်ဒေါ်လာကို ၄၅၃၀ကျပ် ပေါက်ဈေးရှိနေသည်။
“သွင်းကုန်တွေက အခုချိန်မှာ သယ်ယူစရိတ်နဲ့ ငွေလဲနှုန်း မတည်ငြိမ်တာတွေကြောင့် ဈေးကြီးမြင့်နေတဲ့ အချိန်မှာ အခုလို သတ်မှတ်တာ ဈေးကွက်ထဲမှာ ကုန်ဈေးနှုန်း ကြီးတာကို အရှိန်တွင်းတင်ပေးလိုက်တာပါပဲ”ဟု စီးပွားရေးလုပ်ငန်းရှင်တစ်ဦးကပြောသည်။
စစ်ကောင်စီက ပို့ကုန်ရငွေ၏ ၃၅ ရာခိုင်နှုန်းကို တစ်ဒေါ်လာ ၂၁၀၀ ကျပ်ဖြင့် ဘဏ်များကို ရောင်းချခိုင်းပြီး ကျန် ၆၅ရာခိုင်နှုန်းကို ဗဟိုဘဏ်က သတ်မှတ်ထားသည့် ဈေးကွက်ငွေလဲနှုန်းအတိုင်း ရောင်းချခိုင်းထားသည်။
စစ်ကောင်စီက ဒေါ်လာနှင့် နိုင်ငံခြားငွေ အကုန်နည်းစေရန် ဆိုကာ ပြည်ပ မှ ဆေးဝါး အပါအဝင် သွင်းကုန်များကို ကန့်သတ်ထား၍ ပြည်တွင်း၌ သွင်းကုန်ပစ္စည်းများ ရှားပါးပြတ်လတ်၊ဈေးကြီးမှုကြုံနေရကြောင်း ပြည်သူများက ပြောသည်။
