အိမ်သွင်/People’s Spring
ရခိုင်ပြည်နယ်၊ ပုဏ္ဏားကျွန်းမြို့နယ်ရှိ ယိုးတရုတ်ကျေးရွာကို စစ်ကောင်စီက ယနေ့(ဒီဇင်ဘာ ၃၁ရက်)နေ့လည်တွင် လေကြောင်းမှ ဗုံးကြဲတိုက်ခိုက်၍ ဒေသခံသုံးဦးသေဆုံးပြီး ကိုးဦးဒဏ်ရရှိခဲ့ကြောင်း သတင်းရရှိသည်။
နေ့လည် ၁နာရီကျာ်က ဂျက်ဖိုက်တာဖြင့် ဗုံးသုံးလုံးကြဲချ တိုက်ခိုက်ခြင်းဟု ဒေသခံစစ်ဘေးရှောင်များအား အကူအညီပေးနေသူတစ်ဦးက ပြောသည်။
” တပ်တော်က ငြိမ်းချမ်းရေးကမ်းလှမ်းထားချိန်မှာ စစ်ကောင်စီက လေကြောင်းတိုက်ခိုက်မှုလုပ်လာတာပါ။ ဒီဖြစ်ရပ်ကြောင့် သုံးဦးသေဆုံးသွားသလို ဒဏ်ရာရသူတွေလည်း များပါတယ်။ ဒေသခံတွေဟာ လေကြောင်းကနေ ထပ်ပစ်ခံရမှာ စိုးရိမ်နေရပါတယ်”ဟု စစ်ဘေးရှောင်များအား အကူအညီပေးနေသူတစ်ဦးက ပြောသည်။
Public Service Announcement
အဆိုပါတိုက်ခိုက်မှုကြောင့် အမျိုးသမီးနှစ်ဦး၊ အမျိုးသားတစ်ဦးသေဆုံးပြီး သံဃာတော်တစ်ပါးအပါအဝင် ကိုးဦးဒဏ်ရာရခဲ့သည်။ ယိုးတရုတ်ကျေးရွာစာသင်ကျောင်း၊ဘုန်းကြီးကျောင်းနှင့် လူနေအိမ်အချိို့လည်း ပျက်စီးခဲ့သည်။
ပုဏ္ဏားကျွန်းမြို့သည် စစ်တွေမြို့နှင့်ဆက်စပ်နေသည်။ စစ်တွေမြို့အနီးဝန်းကျင်တွင် အာရက္ခတပ်တော်(AA)နှင့် စစ်ကောင်စီတပ် စစ်ရေးတင်းမာနေသည်။
AAသည် ရခိုင်ပြည်နယ်တွင် ကျောက်ဖြူ၊ မာန်အောင်နှင့် စစ်တွေမြို့တို့ကိုသာ သိမ်းယူရန်ကျန်ရှိတော့ပြီး ကျန်မြို့နယ်များကို သိမ်းပိုက်ထိန်းချုပ်ထားနိုင်ပြီဖြစ်သည်။ လက်ရှိ ပြည်တွင်းရေး အခင်းအကျင်း၊ အဖြစ်အပျက်များကို စစ်ရေးဖြင့် ဖြေရှင်းသည်ထက် နိုင်ငံရေးနည်းလမ်းများဖြင့်ဖြေရှင်းရန် အသင့်ရှိကြောင်း AAက ဒီဇင်ဘာ၂၉ရက်တွင် ကြေညာထားသည်။
ထိုသို့ကြေညာပြီးနောက် စစ်ကောင်စီက AAမုန်းတီးရေး လှုံ့ဆော်မှုများပြုလုပ်နေသလို အရပ်သားပြည်သူရှိရာနေရာများကို လေကြောင်းမှပါ တိုက်ခိုက်ခြင်းဖြစ်သည်။
“စစ်တပ်ကို ကျတော်တို့ လုံးဝမယုံပါ။တပ်တော်က ပိုသိမှာပါ”ဟု ပုဏ္ဍားကျွန်းမြို့ခံတစ်ဦးက ပြောသည်။
