ရခိုင်မှစစ်ရှုံးပြန်လာပြီး ရှိမ်းမကားပို့ခံရတဲ့တပ်မ (၃၃)စစ်​ကြောင်း အုန်းနှဲဘုတ်ရွာတိုက်ပွဲမှာ သေဆုံးထိခိုက်သူများပြား၊ ၁၂ ဦးခန့်အလံဖြူ​ထောင်

■၁၂၀ ခန့်ပါ စစ်​ကြောင်းကို PDFများတိုက်ခိုက်၍၄၀ ခန့်သာကျန်ဟု PDF အချို့​ပြော

■ဝက်လက်မြို့နယ်အခြားတ​နေရာတွင်လည်းစစ်တပ်စစ်​ကြောင်းတစ်​ကြောင်းကိုPDFများတိုက်ခိုက်၍စစ်​ကြောင်းပျက်သွားဟုကနဦးသတင်းရ

ရှိန်း/People’s Spring

Public Service Announcement

ဝက်လက်မြို့နယ်၊အရှေ့တောင်ဘက်က အုန်းနှဲဘုတ်ကျေးရွာတိုက်ပွဲမှာ စစ်ကောင်စီရဲ့ တပ်မ ၃၃ စစ်​​ကြောင်းဟာ ဆယ်နဲ့ချီသေဆုံးခဲ့ပြီး စစ်သား ၁၂ဦးခန့် ဟာ PDF ​တွေထံမှာအလံဖြူထောင်လက်နက်ချခဲ့တယ်လို့တော်လှန်ရေးတပ်နဲ့ ​ဒေသခံအချို့ဆီကသိရပါတယ်။

ဇန်နဝါရီလ၄ရက်နေ့က စစ်ကိုင်းမြို့ရဲ့နာမည်ကြီးတပ်မ (၃၃) တပ် က ရှိမ်းမကားရွာကရဲစခန်းကိုအထိုင်ချဖို့အတွက် ဖောကား ၃စီးနဲ့ ဆားတောင်ကျေးရွာဘက်ကိုဝင်လာပြီး ရွာနန်းရွာက​ဒေသခံ၄ ဦးကိုဓါးစာခံအဖြစ် ဖမ်းဆီးပြီးစစ်ကြောင်းထိုးလာတာလို့သိရပါတယ်။

အဲဒီစစ်ကြောင်းဟာ ဇန်နဝါရီ ၄ ရက်မှာ အုန်နှဲဘုတ်ကျေးရွာအတွင်းဝင်ရောက်လာပြီး ရွာပတ်လည်ကနေအိမ်၊ဘုန်းကြီးကျောင်းနဲ့စာသင်ကျောင်းတွေမှာတပ်စွဲခဲ့ပါတယ် ။ ဓါးစာခံ၄ဦးကို​တော့ ညပိုင်းမှာပဲပြန်လွှတ်ပေးခဲ့တယ်လို့ သိရပါတယ်။

ဒီနေ့ (ဇန်နဝါရီ ၅) မနက်၅နာရီလောက်မှာ အဲဒီကျေးရွာကို PDFတပ်ရင်းတွေအပါအဝင် အညာတော်လှန်ရေးအင်အားစုတွေ စုပေါင်းတိုက်ခဲ့တဲ့ အတွက် တိုက်ပွဲ အပြင်းအထန် ဖြစ်ခဲ့တယ်လို့ တိုက်ပွဲမှာပါဝင်ခဲ့တဲ့တော်လှန်ရေးတပ်ဖွဲ့ဝင်တဦးကပြောပါတယ်။

တိုက်ပွဲက ဇန်နဝါရီ ၅ ရက် နေ့လယ် ၁နာရီဝန်းကျင်မှာ ပြီးခဲ့ပြီး တိုက်ပွဲအတွင်းကစစ်ကောင်စီတပ်ကသေဆုံးသူတွေကို နေအိမ်တွေထဲထည့်ကာမီးရှို့ပြီး အ​လောင်း​တွေ​ဖျောက်ခဲ့တယ်လို့ PDF​တချို့က​ပြောပါတယ်။

“သတင်းအရအင်အား၁၂၀လောက်ပါတယ်လို့သိရတယ်။အခုထွက်သွားနိုင်တာက ၄၀ လောက်ပဲထွက်သွားနိုင်တယ်။အလံဖြူပြပြီး အလင်းဝင်လာတာ ၁၂ယောက်လောက်ရှိမယ် “လို့ PDFတဦးကပြောပါတယ်။

အလံဖြူ​ထောင်ပြီးအလင်းဝင်လာတဲ့သူတွေရဲ့ ပြောကြားချက်အရ ဒီစစ်တပ်ဟာ ရခိုင်ကနေ စစ်ရှုံးပြီး ပြန်လာသူတွေဖြစ်ကာ ရှိမ်းမကားကျေးရွာရဲစခန်းကို အထိုင်ချဖို့ တာဝန်နဲ့သွားရသူတွေဖြစ်တယ်လို့သိရကြောင်းလည်း ရဲဘော်ကပြန်ပြောပြပါတယ်။

စစ်ကိုင်းတပ်မ ၃၃ဟာ စစ်ကောင်စီရဲ့ အကြမ်းဆုံးတပ်မလို့သတ်မှတ်ခံထားရပြီး တပ်မမှူးတွေလက်နက်မချရသေးတဲ့ တပ်မ ၃ခုထဲမှာတခုအပါအဝင်ဖြစ်ပါတယ်။ တပ်ရင်းမှူး​တွေလက်နက်မခရ​သေးတဲ့ ကျန် တပ်ရင်း နှစ်ခုက အင်းမမြို့အခြေစိုက် တပ်မ ၆၆ နဲ့ ပဲခူးအခြေစိုက်တပ်မ ၇၇ တိူ့ဖြစ်ပါတယ် ။

ဒါအပြင် တပ်မ ၃၃ ဟာချင်းပြည်နယ် ၊ထန်တလန်မြို့ကို မီးရှို့ခဲ့တဲ့ တပ်မဖြစ်ပါတယ် ။ KIA နဲ့ ပူး​ပေါင်းတပ်​တွေရဲ့ ဗန်း​မော်မြို့သိမ်း ထိုးစစ်မှာ စစ်တပ်က စစ်ကူထပ်ပို့တာမှာလည်း တပ်မ (၂၂) နဲ့ တပ်မ (၃၃) ကစစ်သား​တွေပါဝင်တယ်လို့ စစ်​ရေးရင်းမြစ်တဦးက​ပြောပါတယ် ။

ဖမ်းဆီးခံထားရသူတွေထဲမှာ စစ်ကောင်စီအရာရှိ​တွေပါ ၊မပါကိုတော့ လူထု​နွေဦးကသေချာအတည်ပြုနိုင်ခြင်းမရှိသေးပါဘူး။ စစ်သုံ့ပန်း​​တွေကို စစ်ဆေးပြီးရင် သက်ဆိုင်ရာတပ်ရင်းကထုတ်ပြန်မယ်လို့သိရပါတယ်။

ဒီတိုက်ပွဲအတွင်း စစ်ကောင်စီတပ်က လေကြောင်းတိုက်ခိုက်မှု ၃ကြိမ်ပြုလုပ်ခဲ့သလို မတ္တရာမြို့ကနေ ဟောင်ဝစ်ဆာနဲ့ပစ်ကူတွေလည်းပြုလုပ်ခဲ့ပါတယ်။

ဒါအပြင် ဝက်လက်မြို့နယ်​ထဲကအခြားတနေရာမှာလည်းရွှေဘိုဘက်ကလာတဲ့စစ်ကြောင်းနဲ့ ဒီနေ့တိုက်ပွဲဖြစ်ပွားခဲ့ပြီး စစ်ကောင်စီစစ်ကြောင်းတခုလုံးသေဆုံးကြောင်း သတင်းရထား​ပေမယ့် အ​သေးစိပ်ကို​တော့ အတည်မပြုနိုင်သေးပါဘူး။