သုည/People’s Spring
စစ်ကိုင်းတိုင်းက သပိတ်အဖွဲ့တွေ၊ ဒေသခံပြည်သူတွေက စစ်အုပ်စုက စစ်အာဏာရှင်ကို ဆန့်ကျင်ကြဖို့ လှုံ့ဆော်တဲ့ သပိတ်လှုပ်ရှားမှုတွေ ဒီကနေ့ (ဇန်နဝါရီ ၆)မှာ အသီးသီး ပြုလုပ်ခဲ့ကြပါတယ်။
စစ်ကိုင်းတိုင်း ဆားလင်းကြီးမြို့နယ် စျေးတစ်ခုမှာလည်း ချင်းတွင်းမြစ်ကမ်းဘေးကျေးရွာများသပိတ်နဲ့ ၅/လက်ပံတောင်းသပိတ်တို့ ပူးပေါင်းပြီး “တောင်တန်းမြေပြန့်အတူချီ ဖက်ဆစ်တပ်ကိုအမြစ်ဖြတ်မည်” စာသားနဲ့ ချီတက်ဆန္ဒပြခဲ့ပါတယ်။
လက်ပံတောင်းတောင်ဒေသမှာလည်း အာဏာရှင်ဆန့်ကျင်ရေးလူထုသပိတ်အင်အားစုက ဦးဆောင်ကာ “၂ဝ၂၅ နှစ်သစ်မှာစစ်အာဏာရှင်နိဂုံးချုပ်ဖို့ လူထုစွမ်းအားနဲ့ တိုက်ဖျက်စို့” ခေါင်းစဥ်နဲ့ စစ်အာဏာရှင်ဆန့်ကျင်ရေး လူထုသပိတ် လှုပ်ရှားမှုပြုလုပ်ခဲ့ပါတယ်။
Public Service Announcement
ယင်းမာပင်မြို့နယ် လယ်စိုက်ခင်းတနေရာမှာလည်း ရွာပေါင်းစုံသပိတ်ကော်မတီနဲ့ အောင်လံလွှင့်မည် ဒေါင်းသွေးနီသပိတ်စစ်ကြောင်းတို့ ပူးပေါင်းကာ စစ်အာဏာရှင်ဆန့်ကျင်ရေး တောင်ယာသပိတ် ပြုလုပ်ခဲ့ကြပါတယ်။
ယင်းမာပင်မြို့နယ် ကျေးရွာတစ်ရွာမှာလည်း ရွာပေါင်းစုံသပိတ်ကော်မတီဝင် ကိုကျော်ဝင်းအောင် ကွယ်လွန်ခြင်း (၃) လပြည့်အဖြစ် သွေးမအေးတဲ့ရွှေနွယ်သွေးသပိတ်နဲ့ ဒေသခံလူထုတို့ ပူးပေါင်းကာ အလေးနီပြုဦးညွတ်ရင်း စစ်အာဏာရှင်ဆန့်ကျင်ရေး ဆန္ဒပြခဲ့ကြပါတယ်။
ဓာတ်ပုံ – စစ်ကိုင်းဒေသသပိတ်အင်အားစု၊ လက်ပံတောင်းသပိတ်၊ Aung Khant Zaw
