အိမ်သွင်/People’s Spring
ပုလောမြို့၊ အမှတ်(၂)ရပ်ကွက်ရှိ စစ်ကောင်စီ စစ်ဖက် ရေးရာလုံခြုံရေးတပ်ဖွဲ့(စရဖ)ရုံးအားဝင်ရောက်စီးနင်းရာ စစ်ကောင်စီတပ်ဖွဲ့ဝင်များထွက်ပြေးသွားသောကြောင့် စာရွက်စာတမ်းနှင့်လက်နက်ခဲယမ်းအချို့သိမ်းဆည်းပြီး ရုံးအားမီးရှို့ဖျက်ဆီးခဲ့ကြောင်းပြည်သူ့ကာကွယ်ရေးတပ်မတော်၊ မြိတ်ခရိုင်အမှတ်(၁)တပ်ရင်းက သတင်းထုတ်ပြန်သည်။
ပုလောမြို့၊ စရဖရုံးကို ယမန်နေ့ (ဇန်နဝါရီလ ၆ရက်) ည၁၁နာရီ၁၀မိနစ်တွင် စတင်ပစ်ခတ်ပြီး စီးနင်းတိုက်ခိုက်ခဲ့ခြင်းဟု မြိတ်ခရိုင်အမှတ်(၁)တပ်ရင်းက ထုတ်ပြန်ထားသည်။
အဆိုပါရုံးမှ စစ်ကောင်စီတပ်ဖွဲ့ဝင်များက သေနတ် ၆ချက် ပြန်လည်ပစ်ခတ်ပြီး ထွက်ပြေးသွားခဲ့သည်ဟုသိရသည်။
Public Service Announcement
“အဲဒီရုံးမှာအင်အားနည်းတယ်။ နောက်ပြီး အချိန်မရွေးတိုက်ခိုက်ခံရနိုင်တယ်ဆိုတာသူတို့သိလောက်တယ်။ ဒါကြောင့် မခုခံဘဲပြေးတာ” ဟု မြိတ်ခရိုင်အမှတ်(၁)တပ်ရင်းနှင့် နီးစပ်သူကပြောသည်။
စရဖရုံးအား ဝင်ရောက်ရှာဖွေရာ သေနတ်ကျည်ဘောက်နှစ်ခုနှင့် ကျည်ဆံ ၁၀၀၊ စာရွက်စာတမ်းများ သိမ်းဆည်းရမိခဲ့ပါသည်ဟု သတင်းထုတ်ပြန်ထားသည်။
တနင်္သာရီတိုင်းအတွင်း ယခုရက်ပိုင်း၌ တနင်္သာရီမြို့နယ်နှင့် လောင်းလုံးမြို့နယ်တွင်လည်း စစ်ရေးတင်းမာနေသည်။
လောင်းလုံးမြို့နယ်ကျောက်နီမော်ကျေးရွာမှ စစ်ကောင်စီစခန်းများကို ဒီဇင်ဘာလ၂၃ရက်နေ့မှစတင်၍ ထားဝယ်ခရိုင်တပ်ပေါင်းစုကတိုက်ခိုက်ခဲ့သည်။ စခန်းတခုအား သိမ်းပိုက်နိုင်ခဲ့ပြီး ခမရ(၄၀၅) တပ်ရင်းမှူးအပါအဝင် ၄၀ဦးနှင့်အထက် သေဆုံးပြီးခမရ (၄၀၃)တပ်ရင်းမှူးအပါအဝင် ပျူစောထီးနှင့်စစ်ကောင်စီတပ်သားအများအပြားဒဏ်ရာရသွားသည်ဟု ထားဝယ်ခရိုင်တပ်ပေါင်းစုသတင်းထုတ်ပြန်ထားသည်။
ထို့အပြင် တနင်္သာရီမြို့နယ်အတွင်း စစ်ကောင်စီ နှင့် တော်လှန်ရေးမဟာမိတ်ပူးပေါင်းတပ်များတိုက်ပွဲပြင်းထန်နေ၍ တနင်္သာရီ -မောတောင်လမ်းပိုင်းကို အသုံးမပြုရန် ပြည်သူ့ကာကွယ်ရေးတပ်ဖွဲ့ကသတိပေးချက်ထုတ်ပြန်ထားသည်။
