ဟန်နွေ/People’s Spring
ကချင်ပြည်နယ် မံစီမြို့နယ်ရှိ စစ်ကောင်စီတပ်ရင်းများကို ကချင်လွတ်လပ်ရေးတပ်မတော်(KIA) မဟာမိတ်ပူးပေါင်းတပ်ဖွဲ့က ဇန်နဝါရီ ၈ရက်တွင် အပြီးသတ်သိမ်းပိုက်ရရှိခဲ့ရာ တိုက်ပွဲအတွင်း သိမ်းရခဲ့သည့် လက်နက်ခဲယမ်းများ မှတ်တမ်းရုပ်သံကို ယနေ့(ဇန်နဝါရီ ၁၀ရက်)တွင် စစ်ရေးသတင်းရင်းမြစ်အချို့က လူမှုကွန်ရက်၌ ဖော်ပြခဲ့သည်။
မံစီမြို့ရှိ စစ်ကောင်စီ၏ လက်ကျန်တပ်များဖြစ်သော ခမရ(၃၁၉)၊ ခမရ(၆၀၁)နှင့် အမြောက်တပ် (၃၅၂)တပ်ရင်းတို့ကို KIA၊ ABSDF၊ KPDF ပူးပေါင်းတပ်က ၂၀၂၄ ဒီဇင်ဘာ ၄ရက်တွင် ထိုးစစ်ဆင်ခဲ့ရာ စစ်ဆင်ရေး တစ်လကျော်အကြာ တွင် တပ်ရင်းအားလုံး သိမ်းနိုင်ခဲ့ခြင်းဖြစ်သည်။
အဆိုပါ တပ်ရင်းများ အပါအဝင် စစ်ကောင်စီတပ်ဖွဲ့များထံမှ လက်နက်ကြီး လက်နက်ငယ်များစွာ သိမ်းရခဲ့ရာ ယနေ့တွင် သိမ်းရထားသည့် လက်နက်များစွာစုပုံထားသည့် ရုပ်သံ ထွက်ပေါ်လာခြင်းဖြစ်သည်။
Public Service Announcement
“ဒါက မံစီက ရတဲ့ လက်နက်ခဲယမ်းတချို့ပါ။ အများကြီးရှိသေးတယ်” ဟု စစ်ရေးသတင်းရင်းမြစ်က ပြောသည်။
KIAနှင့် ABSDFတို့ကလည်း မံစီမြို့သိမ်းပိုက်ရရှိမှု ကို သတင်းထုတ်ပြန်ဖော်ပြထားရာ လက်နက်ခဲယမ်းများစွာ ရရှိဟု အသိပေးထားသည်။
မံစီမြို့သိမ်းစစ်ဆင်ရေးကို KIAက ၂၀၂၄ မေလတွင် အသစ်ဖွဲ့စည်းခဲ့သည့် KIA တပ်မဟာ(၁၁)က ဦးဆောင်တိုက်ခိုက်ခဲ့ခြင်းဖြစ်ပြီး KPDF၊ ABSDFတပ်ဖွဲ့များ ပူးပေါင်းပါဝင် ခဲ့သည်။ မံစီနှင့်အတူ ဗန်းမော်မြို့သိမ်း စစ်ဆင်ရေးကိုပါ တပြိုင်တည်းဖော်ဆောင်လျက်ရှိရာ ဗန်းမော်တွင်လည်း စစ်ကောင်စီတပ်များ အထိနာလျက်ရှိသည်။
