ဇော်ဂျီ(ဧရာဝတီ)/People’s Spring
ဧရာဝတီတိုင်း၌ တစ်နှစ်ကျော်ကြာပိတ်သိမ်းထားသည့် မြို့အဝင်၊ အထွက်စစ်ဆေးရေးဂိတ်များကို ယခု ဇန်နဝါရီလဆန်းကစ၍ စစ်ကောင်စီကပြန်ဖွင့်ထားပြီး ပျူစောထီးနှင့် ပြည်သူ့စစ်အဖွဲ့ဝင်များဖြင့် စစ်ဆေးမှုများပြုလုပ်နေသည်။
“ဧရာဝတီတိုင်း မြို့တော်တော်များများမှာ စစ် ဆေးရေးဂိတ်တွေပြန်ဖွင့်ထားတယ်။ ခရီးသွားတွေအနေနဲ့ ဒါကို သတိပြုဖို့လိုပါတယ်။ အကြောင်းပြချက်မျိုးစုံနဲ့ဖမ်းဆီး ငွေညှစ်တာတွေရှိနေတယ်။ စစ်ဆေးရေးဂိတ်တွေမှာက ပျူစောထီးနဲ့ ပြည်သူ့စစ်တွေများတယ်”ဟု ဧရာဝတီတိုင်း၊ ဓနုဖြူမြို့မှ ဒေသခံတစ်ဦးကပြောသည်။
စစ်တပ်အာဏာသိမ်းပြီးနောက် ဧရာဝတီတိုင်းတွင် ၂၀၂၁မှစကာ စစ်ဆေးရေးဂိတ်များဖွင့်ခဲ့ပြီး ခရီးသွားကားများ၊ အိမ်စီးကားများအား စစ်ဆေးပြီး သံသယရှိသူများအား ဖမ်းဆီးခဲ့သည့် မြို့အဝင်၊အထွက်စစ်ဆေး ရေးဂိတ်များကို စစ်ကောင်စီက ၂၀၂၃ နှစ်လယ်တွင် ပိတ်သိမ်းခဲ့ခြင်းဖြစ်သည်။
Public Service Announcement
ရန်ကုန်တိုင်းမှ ဧရာဝတီတိုင်းသို့ဝင်ရောက်သည့် ပန်တိုင်စစ်ဆေးရေးဂိတ်တစ်ခုသာ ဆက်ဖွင့်ခဲ့သည်။
ယခုရက်ပိုင်းတွင် ပုသိမ်၊ ဟင်္သာတ၊ မအူပင်မြို့အပါအဝင် ဧရာဝတီတိုင်းအတွင်း မြို့များအားလုံး၏အဝင်၊ အထွက်နေရာများတွင် စစ် ဆေးရေးဂိတ်များ ပြန်ဖွင့်ထားခြင်းဖြစ်သည်။
” ဂိတ်ဖွင့်တယ်။ ပိုက်ဆံတောင်းတယ်။ အရက်သောက်တယ်။ တစ်ရာပေးလည်းယူ နှစ်ရာပေးလည်းယူ၊ သတောင်းစားကမှ သူတို့ထက် သိက္ခာရှိတယ်”ဟု ညောင်တုန်းမြို့ခံတစ်ဦးက ပြောသည်။
လက်ရှိကာလတွင် ရခိုင်ပြည်နယ်နှင့် ဧရာတီတိုင်းနယ်စပ်၊ ဧရာဝတီတိုင်းနှင့် ပဲခူးတိုင်းအနီး မြို့နယ်အချို့တွင် စစ်ရေးတင်းမာနေသည့် အခြေအနေရှိသည်။
ထို့ကြောင့် စစ်ကောင်စီက ဧရာဝတီတိုင်းအတွင်း လုံခြုံရေးတိုးထားခြင်းဖြစ်သည်။
ဧရာဝတီတိုင်းအတွင်း မြို့အဝင်၊အထွက်စစ်ဆေး ရေးဂိတ်များ ပြန်ဖွင့်ထားသလို မြို့တွင်း၌လည်း အရပ်ဝတ် ပျုစောထီးများ၊ယူနီဖောင်းဝတ် ပြည်သူ့စစ်များက ကင်းလှည့်နေသည်။
ထို့အပြင် စစ်မှုထမ်းဥပဒေအကြောင်းပြ၍ ဖမ်းဆီးမှုများလည်း ရှိနေသည်။
