ရဲခေါင်/People’s Spring
မကွေးတိုင်း၊ ငဖဲမြို့နယ်၊ အမ်း – ပဒါန်းလမ်းပိုင်းတွင် စခန်းစွန့်ခွာထွက်ပြေးလာသည့် တပ်မ(၉၉) လက်အောက်ခံ စစ်ကောင်စီတပ်အား တိုက်ခိုက်ရာ သုံးဦးသေဆုံးပြီး လက်နက်ခဲယမ်းအချို့ရရှိကြောင်း အရှိုချင်းကာကွယ်ရေးတပ်က ယနေ့(ဇန်နဝါရီ ၂၀ရက်) ထုတ်ပြန်သည်။
အမ်း – ပဒါန်းလမ်းပိုင်း တနေရာတွင် စခန်းစွန့်ခွာ ထွက်ပြေးလာသည့် တပ်မ (၉၉)မှ စစ်ကောင်စီတပ်ဖွဲ့ဝင် ၁၅ဦးနှင့် အရှိုချင်းကာကွယ်ရေးတပ် (ACDF)မှတပ်စိတ် (၂)စိတ်တို့ ယမန်နေ့ (ဇန်နဝါရီ ၁၉ရက်) ညနေပိုင်းတွင် တိုက်ပွဲ ဖြစ်ပွားခဲ့သည်ဟု ဆိုသည်။
တိုက်ပွဲမှာ ညနေ ၄ နာရီမှ ၅ နာရီ ၁၅မိနစ်အထိ တစ်နာရီကျော်ကြာသည့်အထိ ဖြစ်ပွားခဲ့ကာ စစ်ကောင်စီတပ်သား သုံးဦး သေဆုံးကြောင်းအသိပေးသည်။
Public Service Announcement
ထို့အတူ MA 1 သေနတ် သုံးလက်၊ ကျည်နှင့် ကျည်အိမ်များ သိမ်းဆည်ရမိကာ ACDF ရဲဘော်များမှထိခိုက်မှုမရှိဘဲ အောင်မြင်စွာဆုတ်ခွာနိုင်ခဲ့ကြောင်းလည်း ထုတ်ပြန်ချက်၌ ဖော်ပြသည်။
“ရခိုင်ရိုးမအစပ်က ကာကင်းစခန်းတပ်အလိုက် ဆုတ်လာတာ။လင်းတဲ တို့ စွန်တက်ရွာတွေဘက်က စခန်းက စကစ စစ်သားတွေ”ဟု မကွေး တိုင်းစစ်ရေးသတင်းရင်းမြစ်က ပြောသည်။
အမ်းမြို့အခြေစိုက် အနောက်ပိုင်းတိုင်းစစ်ဌာနချုပ်(နပခ) ဆုံးရှုံးပြီးနောက် ၎င်းနှင့်အနီးစပ်ဆုံးဒေသဖြစ်သော မကွေးတိုင်းကို စစ်မီးမကူးရန် ပဒါန်းမြို့ကို စစ်ကောင်စီက အားဖြည့်နေသည်။
ပဒါန်းမြို့တွင် စစ်ကောင်စီ၏ အမှတ်(၁၄) ကာကွယ်ရေးပစ္စည်းစက်ရုံ (ကပစ – ၁၄) အမြောက်တပ် (၉၀၅)၊(၃၇၅)နှင့် (၄၀၉)တို့ အခြေပြုထားသည်။
အမ်း – ပဒါန်းလမ်းသည် ရခိုင်ပြည်နယ် အမ်းမြို့နှင့် မကွေးတိုင်း ငဖဲနှင့် မင်းဘူးမြို့နယ်တို့ကို ဆက်သွယ်ထားသည်။
အမ်းမြို့ကို အာရက္ခတပ်တော်(AA)က မသိမ်းပိုက်မီ လက်နက်ခဲယမ်း၊ ရိက္ခာနှင့်လူအင်အား ပို့ဆောင်ရာတွင် စစ်ကောင်စီက ထောက်ပို့လမ်းအဖြစ် အသုံးပြုခဲ့သည်။
