စစ်ကိုင်းနဲ့ တနင်္သာရီမှာ စစ်​အာဏာရှင်ဆန့်ကျင်ရေး ဆန္ဒပြ

သုည/People’s Spring

စစ်ကိုင်းနဲ့ တနင်္သာရီတိုင်းက သပိတ်အဖွဲ့တွေ၊ ဒေသခံပြည်သူတွေက စစ်​အာဏာရှင် ဆန့်ကျင်ရေး သပိတ်လှုပ်ရှားမှုတွေ ဒီကနေ့ (ဇန်နဝါရီ ၂၀)မှာ အသီးသီး ပြုလုပ်ခဲ့ကြပါတယ်။

စစ်ကိုင်းတိုင်း ဆားလင်းကြီးမြို့နယ်မှာ တော်လှန်ပုန်ကန်ဒေါင်းတို့အားမာန် သပိတ်စစ်ကြောင်းက ဦးဆောင်ပြီး စစ်အာဏာရှင် ဆန့်ကျင်ရေးသပိတ် ချီတက်ခဲ့ကြပါတယ်။

ယင်းမာပင်မြို့နယ်မှာလည်း ရွာပေါင်းစုံသပိတ် ကော်မတီက ဦးဆောင်ပြီး စစ်အာဏာရှင်ဆန့်ကျင်ရေး တပ်ပေါင်းစုသပိတ် ချီတက်ဆန္ဒပြခဲ့ကြပါတယ်။

Public Service Announcement

ယင်းလူထုသပိတ်ကို ယင်းမာပင်-ဆားလင်းကြီး ရွာပေါင်းစုံ၊ အောင်လံလွှင့်မည်ဒေါင်းသွေးနီ၊ အောင်လံလွှင့်မည်ရွှေရေကြည်၊ ကယ်တင်ရှင်မရှာဒို့ကျေးရွာ၊ ရွှေနွယ်သွေး၊ လူငယ့်အားမာန်၊ အားမာန်သစ်၊ နောက်ပြန်မလှည့်ကြေး၊ ရွှေဥက္ကံ၊ ယင်းမာပင်မြောက်ခြမ်း၊ခေတ်ဟောင်းချိုးဖြတ် ဒေါင်းမျိုးဆက်၊လက်ပံတောင်းတောင်ဒေသ၊ကလေးမြို့လူထုတိုက်ပွဲစတဲ့ သပိတ်ကော်မတီဝင်တွေဟာ လူထုနှင့်အတူ ပူးပေါင်းချီတက်ခဲ့ပါတယ်။

တပ်ပေါင်းစုသပိတ်ထွက်ရာမှာ “ပြည်သူ့အားသာ အခရာ”၊ “အတုအယောင်ရွေးကောက်ပွဲကို ဆန့်ကျင်ကြ”၊ “တော်လှန်ရေးကို ရှေ့ရှုကြ”၊ “မျှော်လင့်ချက်အမှားတွေ ရပ်တန့်ကြ”၊ “လက်တွေ့ကျကျ စုစည်းကြ”၊ “အာဏာရှင်စနစ်မှန်သမျှ တော်လှန်ကြ”၊ “ဘုံရန်သူကို ချေမှုန်းကြ”၊ “လူထုအသံကို နားထောင်ကြ”၊ “အောင်ပွဲကို ချီတက်ကြ” စတဲ့ စာသားတွေ ကိုင်ဆောင်ချီတက်ခဲ့ပြီး သပိတ်ဦးဆောင်သူတွေက နိုင်ငံရေးတရားတွေ ဟောပြောခဲ့ကြပါတယ်။

တနင်္သာရီတိုင်း ထားဝယ်ခရိုင်မှာလည်း ဒီမိုကရေစီအရေးလှုပ်ရှားမှုသပိတ်ကော်မတီ(DDMSC)မှ ဦးဆောင်ပြီး စစ်အာဏာရှင်စနစ်ဆန့်ကျင်ရေး လူထုသပိတ်လှုပ်ရှားမှု ပြုလုပ်ခဲ့ပါတယ်။

စစ်အာရှင်စနစ်နဲ့အတူ အာဏာရှင်ဆန်သမျှ အလုံးစုံချုပ်ငြိမ်းရေးအတွက် လူထုတိုက်ပွဲကို အရှိန်မြှင့်လုပ်ဆောင်ကြဖို့ တိုက်တွန်းလှုံ့ဆော်တဲ့အနေနဲ့ “အာဏာရှင်ဆန်သမျှ ဖီဆန်ကြ၊ လူထုတိုက်ပွဲ အရှိန်မြှင့်ကြ” စာသားပါဘန်နာကိုင်ဆောင်ပြီး ချီတက်ခဲ့ကြပါတယ်။

ဒီကနေ့ပြုလုပ်တဲ့ လူထုသပိတ်လှုပ်ရှားမှုကို ထားဝယ်ခရိုင် လောင်းလုံးမြို့နယ်ထဲမှာ လုပ်ဆောင်ခဲ့တာဖြစ်ပြီး အမျိုးသမီး လူငယ်တွေနဲ့ ဒေသခံပြည်သူများ ပူးပေါင်းပါဝင်ခဲ့ကြပါတယ်။

ဓာတ်ပုံ – စစ်ကိုင်းဒေသသပိတ်အင်အားစု၊ ရွာပေါင်းစုံသပိတ်၊ DDMSC