တောင်သာနယ်မှာ စက်တပ်လေထီးနဲ့ ဗုံးချ လို့ သက်ကြီးပိုင်းအမျိုးသမီး သေဆုံး

ဆိုင်းမင်း/People’s Spring

မန္တလေးတိုင်း ၊ တောင်သာမြို့နယ်ထဲက သာစည်ကျေးရွာကို ဒီနေ့ ဇန်နဝါရီလ ၂၃ ရက်မနက်အစောပိုင်း လူအများအိပ်မောကျနေချိန်မှာ စစ်ကောင်စီတပ်ရဲ့ လူလိုက်ပါတဲ့ စက်တပ်လေထီးနဲ့ ဗုံးချ တိုက်ခိုက်မှုကြောင့် ဒေသခံအမျိုးသမီးကြီး တစ်ဦး သေဆုံးခဲ့ရပါတယ်။

တောင်သာမြို့ အနောက်ဘက်ခြမ်းမှာရှိပြီး တောင်သာမြို့ပေါ်နဲ့ ကားလမ်းအတိုင်း ၁၄ မိုင် ခန့်ဝေးတဲ့ သာစည်ကျေးရွာကို ဒီမနက် ၁ နာရီ ၄၅ မိနစ်ခန့်က ဗုံးချခံရတာလို့ ဒေသတွင်းတော်လှန်ရေးတပ်ဖွဲ့ဝင်တစ်ဦးက အသိပေးပါတယ်။

အဲဒီတိုက်ခိုက်မှုမှာ လူနေအိမ်ပေါ်ဗုံးကျပြီး အသက် ၇၀ အရွယ် ဒေါ်ဇင်ဆိုသူအမျိုးသမီးကြီး သေဆုံးခဲ့ရတယ်လို့သိရပါတယ်။ တောင်သာမြို့နယ်ထဲက ကျေးရွာတွေကို အခုလို စက်တပ်လေထီးနဲ့ဗုံးချတိုက်ခိုက်တာကို အခုရက်ပိုင်းအတွင်း ခပ်စိပ်စိပ်ပြုလုပ်လာတာပါ။

Public Service Announcement

” အဓိကတော့ သူတို့အတွက်လည်း ကုန်ကျစရိတ်နည်းသလို လူထုကိုလည်းခြိမ်းခြောက်လိုတဲ့ရည်ရွယ်ချက်နဲ့ လုပ်လာတာ”လို့ တောင်သာနယ်အတွင်းက တော်လှန်ရေးတပ်ဖွဲ့ဝင်တစ်ဦးကပြောပါတယ်။

လူလိုက်ပါတဲ့ စက်တပ်လေထီးတွေဟာ တောင်သာမြို့နဲ့ မိုင် ၅၀ ခန့်အကွာမှာရှိတဲ့ မိတ္ထီလာမြို့ရှိ လေယာဥ်မောင်းသင်တန်းကျောင်း ကနေ တက်လာတာလို့ ဒေသတွင်းတော်လှန်ရေးအင်အားစုတွေက ယူဆထားပါတယ်။

တိုက်ခိုက်မှုတွေကိုတော့ အလင်းရောင်ကောင်းကောင်းမရခင် ညအချိန်တွေ မှာအများဆုံး ပြုလုပ်တာပါ။

ညအချိန် လူအများအိပ်မောကျနေချိန်မှာ နေအိမ်တွေပေါ်ဗုံးသီးချခံနေရတဲ့အတွက် တောင်သာမြို့နယ်အတွင်းက ကျေးရွာအချို့မှာ ဒေသခံတွေ တိမ်းရှောင်နေရတာတွေလည်းရှိလာပါတယ်။