မတရားစစ်မှုထမ်းဥပဒေနဲ့ စစ်အာဏာရှင်စနစ်ကို ဆန့်ကျင်ကြဖို့ စစ်ကိုင်းနဲ့ တနင်္သာရီမှာ လှုံ့ဆော် ဆန္ဒပြ

သုည/People’s Spring

စစ်ကိုင်းနဲ့ တနင်္သာရီတိုင်းက သပိတ်အဖွဲ့တွေ၊ ဒေသခံပြည်သူတွေက မတရားစစ်မှုထမ်းဥပဒေနဲ့ စစ်အာဏာရှင်စနစ်ကို ဆန့်ကျင်ကြဖို့ လှုံ့ဆော်တဲ့ သပိတ်လှုပ်ရှားမှုတွေ ဒီကနေ့ (ဇန်နဝါရီ ၂၄)မှာ အသီးသီး ပြုလုပ်ခဲ့ကြပါတယ်။

စစ်ကိုင်းတိုင်း ယင်းမာပင်မြို့နယ်မှာ ရွာပေါင်းစုံသပိတ်ကော်မတီဝင်တွေနဲ့ ဒေသတွင်းသပိတ်အင်အားစုတွေ၊ ပြည်သူလူထုတွေ ပူးပေါင်းကာဆိုင်ကယ်တွေနဲ့ လှည့်လည်ခဲ့ကြပါတယ်။

ယင်းဆိုင်ကယ်သပိတ်က ယင်းမာပင်မြို့နယ်တွင်း ကျေးရွာ ၈ ရွာကိုလှည့်လည်ကာ စစ်အာဏာရှင်ဆန့်ကျင်ရေး ကြွေးကြော်သံတွေနဲ့အတူ လူထုလှုံ့ဆော်ဟောပြောမှုတွေလည်း လုပ်ဆောင်ခဲ့ကြပါတယ်။

Public Service Announcement

အလားတူ ယင်းမာပင်မြို့နယ် ကျေးရွာတစ်ရွာမှာလည်း “ပြည်သူ့အားမာန်” သပိတ်စစ်ကြောင်းဟာ “ဖက်ဒရယ်အတွက်ပြည်သူ့တွဲလက်” သပိတ်စစ်ကြောင်းနဲ့ ပူးပေါင်းပြီး အကြမ်းဖက်စစ်အုပ်စုရဲ့ မတရားတဲ့ စစ်မှုထမ်း ဥပဒေကို အလိုမရှိကြောင်း ချီတက်ဆန္ဒပြခဲ့ပါတယ်။

တနင်္သာရီတိုင်း ထားဝယ်ခရိုင် လောင်းလုံးမြို့နယ်မှာလည်း ဒီမိုကရေစီအရေးလှုပ်ရှားမှု သပိတ်ကော်မတီ(DDMSC)ကနေ ဦးဆောင်ပြီး စစ်အာဏာရှင်ဆန်ကျင်ရေး လူထုသပိတ်လှုပ်ရှားမှု ပြုလုပ်ခဲ့ပါတယ်။

အဲဒီလှုပ်ရှားမှုကို “ကြောက်စိတ်တွေကိုဖယ်ရှား အမှောင်ခေတ်ကို ရဲရဲကျော်လွှား” ခေါင်းစဥ်နဲ့ ပြုလုပ်ခဲ့ကြတာဖြစ်ပြီး အမျိုးသမီး၊ လူငယ်နဲ့ ဒေသခံပြည်သူတွေ ပူးပေါင်းပါဝင်ခဲ့ကြပါတယ်။

ဓာတ်ပုံ – စစ်ကိုင်းဒေသသပိတ်အင်အားစု၊ ရွာပေါင်းစုံသပိတ်၊ DDMSC