ရန်ကုန်မြို့လယ်ရှိ တရုတ်ဘုံကျောင်းတခုမှာ ရေဘဝဲ (ပြည်သူ့အကျိုးပြု လူငယ်အဖွဲ့အစည်း) မှ “It has been 4 years since the military staged the coup! ” စာတန်းကိုင်ဆောင်ကာ အကြမ်းဖက် စစ်တပ်မှအာဏာသိမ်းခဲ့သည်မှာ ၄ နှစ်ရှိပြီဖြစ်ကြောင်းနှိုးဆော်အသိပေး၍ တကိုယ်တော်ဆန္ဒပြလှုပ်ရှားမှုပြုလုပ်ခဲ့ပါတယ်။
“လေးနှစ်တာကာလတလျောက် နိုင်ငံတော်တဝန်းကြုံတွေ့နေရတဲ့ ကုန်စျေးနှုန်းတက်တာတွေကအစ လျှပ်စစ်မီးမှန်မှန်မရတာတွေ၊ ပေါ်တာဆွဲခံရတာတွေ၊ ပြည်ပထွက်ခွင့်တင်းကျပ်ပိတ်ပင်တာတွေ၊ မိသားစုတွေ ရှင်ကွဲသေကွဲကွဲနေရတာတွေ၊ လေယာဥ်နဲ့ ဗုံးကြဲခံရတာတွေအဆုံး စတဲ့ နိုင်ငံရေး၊ စီးပွားရေး၊ လူမှုရေး၊ ကျန်းမာရေး အထွေထွေဖိနှိပ်ဖျက်စီးမှုတွေကြား ပြည်သူလူထုနဲ့အတူ တသားတည်း ရင်ဆိုင်အန်တုလျက်ရှိပါတယ်။ ဒီလိုအထွေထွေဖိနှိပ်ဖျက်စီးခံနေရတဲ့ အကျိုးတရားတွေဟာ စစ်တပ်ကအာဏာသိမ်းခဲ့တဲ့ အကြောင်းတရားကြောင့်ပဲဖြစ်ပါတယ်။ အခုလည်း စစ်တပ်ဟာ တရုတ်အစိုးရရဲ့ထောက်ပံ့ကူညီမှုနဲ့ တိုင်းရင်းသားတော်လှန်ရေးအင်အားစုတွေကို ဖိအားအမျိုးမျိုးပေးနေသလို၊ သူတို့ပဲမဲပေး သူတို့ပဲအုပ်ချုပ်မယ့် အတုအယောင်ရွေးကောက်ပွဲ စီစဉ်နေတာလည်းအားလုံးအသိပါပဲရှင်” လို့ ရေဘဝဲအဖွဲ့ တာဝန်ရှိသူက ပြောပါတယ်။
ကမ်းကုန်အောင်မိုက်တဲ့ စစ်အာဏာရှင် သက်ဆိုးရှည်လာလေလေ၊ ပြည်သူလူထုရဲ့နေ့စဥ်လူမှုဘဝ စားဝတ်နေရေး၊ အသက်ရှင်ရပ်တည်ရေး ပိုပိုကျပ်တည်းလာဖို့ပဲရှိတာမို့ ဒီစနစ်ဆိုးအမြန်ချုပ်ငြိမ်းဖို့အတွက် နည်းနာပေါင်းစုံ ပရိယာယ်မျိုးစုံအသုံးပြုပြီး ရရာတာဝန်ယူကာ အတူတူ ဆက်လက် အန်တုတွန်းလှန်ကြဖို့ ရေဘဝဲအဖွဲ့က တိုက်တွန်းပါတယ်။
Public Service Announcement
ရုပ်သံ – ရေဘဝဲ(ပြည်သူ့အကျိုးပြု လူငယ်အဖွဲ့အစည်း)
