ဇူလိုင် ၉၊ ၂၀၂၆။မေရီ/People’s Spring
မန္တလေးမြို့မှာ တရုတ်ဘုံကျောင်းက ကြေးစည် ခိုးယူခံလိုက်ရကြောင်း သတင်းရရှိပါတယ်။
မန္တလေးမြို့၊ ချမ်းအေးသာဇံမြို့နယ်၊ ၆၈ လမ်းနဲ့ ၃၂ A လမ်းထောင့်မှာရှိတဲ့ တရုတ်ဘုံကျောင်း (ထောက်ကြည့်တန် ငါးပါးသီလ ဘုရားကျောင်း)မှာ တပ်ထားတဲ့ ကြေးစည်ဟာ ပြီးခဲ့တဲ့ ဇွန်လ ၁၇ ရက် မနက် ၉ နာရီဝန်းကျင်က ခိုးယူခံလိုက်ရတာပါ။
ထွက်ပေါ်လာတဲ့ စီစီတီဗွီမှတ်တမ်းအရ တရုတ်ဘုံံကျောင်းထဲကို အမျိုးသားတစ်ဦးဟာ 125 ဆိုင် ကယ်စီးပြီး ဆိုင်ကယ်စီးဦးထုပ်အဖြူဆောင်းကာ ဝင်ရောက်လာခဲ့ပါတယ်။ အဲဒီနောက် အမျိုးသားဟာ ဘုရားကျောင်း အဆောင်ရှေ့မှာ ဆိုင်ကယ်ကို ရပ်တန့်ပြီး ကျောင်းဆောင်ပေါ် တက်သွားခဲ့ပါတယ်။
Public Service Announcement
အဲဒီနောက် ကျောင်းဆောင်ပေါ်က ကြေးစည်ကို ဆိုင်ကယ်ခွကြားပေါ်တင်ပြီး မောင်းနှင်ထွက်ခွာသွားတာ တွေ့ရပါတယ်။
ကြေးစည်တစ်ခုဟာ ကြေးပိဿာချိန်နဲ့ အရွယ်အစားပေါ်မူတည်ပြီး ငွေကျပ်သောင်းဂဏန်းကနေ သိန်းဂဏန်းထိ တန်ကြေးရှိတယ်လို့ ရောင်းဝယ်သူတွေဆီက သိရပါတယ်။ အလားတူ မန္တလေးမြို့မှာ လမ်းပေါ်ထားတဲ့ မီးစက်တွေ၊ မီးကြိုးတွေလည်း မကြာခဏ ဖြုတ်ယူခိုးခံနေရပြီး လုံခြုံမှုကင်းမဲ့နေတယ်လို့ မြို့ခံတွေက ပြောပါတယ်။
စစ်တပ်အာဏာသိမ်းပြီးနောက်ပိုင်း မန္တလေးမြို့မှာ ခိုးဆိုးလုယက်မှုတွေ၊ ဓါးပြတိုက်မှုတွေ မကြာခဏ ဖြစ်ပွားနေပြီး စစ်တပ်လက်အောက်ခံ ရဲတွေကလည်း ဖမ်းဆီးအရေးယူတာတွေ မရှိဘူးလို့ မြို့ခံတွေက ပြောပါတယ်။
