နိုင်ပကောင်း/People’s Spring
ထိုင်း – မြန်မာ နယ်စပ် မြန်မာ ဘက်ခြမ်း မြဝတီမြို့က အွန်လိုင်း ငွေလိမ်းဂိုဏ်း(ကျားဖြန့်) တွေဆီ လျှပ်စစ်မီး ဖြန့်ဖြူးတာကို ထိုင်းဘက်က ဒီနေ့မှာ စတင်ဖြတ်တောက်လိုက်ပြီးနောက် ဒေသခံတွေ ဟာ စက်သုံးဆီကြိုတင်ဝယ်ယူစုဆောင်းတာတွေ လုပ်ဆောင်နေကြပါတယ်။
မြန်မာဘက် နယ်စပ်ဆီ လျှပ်စစ်မီးအပြင် လောင်စာဆီပါ ဖြတ်တောက်ဖို့ ထိုင်းဝန်ကြီးချုပ်က ညွှန်ကြား လိုက်ပြီးနောက် ဒီမနက်မှာ လျှပ်စစ်မီး စတင်ဖြတ်တောက်ခံရတာလို့သိရပါတယ်။
စက်သုံးဆီပါ ဖြတ်တောက်ခံရလာနိုင်တဲ့ သတင်းတွေထွက်လာတဲ့အတွက် မြဝတီမြို့ခံတွေဟာစက်သုံးဆီဆိုင်တွေမှာ ဆိုင်ကယ်၊ ကား တွေကို ကြိုတင် စက်သုံးဆီဖြည့်တင်းလာတာကြောင့် တန်းစီစောင့်ဆိုင်းဝယ်ယူရတဲ့အခြေအနေ ဒီမနက်မှာ ဖြစ်လာပါတယ်။
Public Service Announcement
“ဓာတ်ဆီမရှိဘူး၊ ဒီဇယ်ပဲရတယ်၊ ဝယ်လို့ရတယ်၊ တန်းစီရတယ် ကားများတယ်” လို့ ရွှေ ကုက္ကိုလ်ဒေသခံတစ်ဦးက ဆိုပါတယ်။
ထိုင်း – မြန်မာနယ်စပ်တလျောက် မြန်မာဘက်ခြမ်းမှာ အခြေစိုက်တဲ့ ကျားဖြန့် လုပ်ငန်းတွေ ကို နှိမ်နင်းဖို့အတွက် ထိုင်းအစိုးရဟာ မြန်မာဘက်ဆီ လျှပ်စစ်မီးဖြန့်ဝေရာ နေရာ ၅ ခုကို ဒီမနက်ပိုင်း ထိုင်းစံတော်ချိန် မနက် ၉ နာရီက စတင်ပြီး မီးဖြတ်လိုက်တာပါ။
မီးဖြတ်ခံရတဲ့ နေရာတွေကတော့ မြဝတီမြို့၊ ဘုရားသုံးဆူမြို့နဲ့ တာချီလိတ်မြို့ တို့ဖြစ်ပါတယ်။မြဝတီမြို့မှာတော့ ကျားဖြန့် နာမည်ကြီး နေတဲ့ ရွှေကုက္ကိုလ်မြို့သစ်ပါ ပါဝင်ပါတယ်။
စစ်တပ်လက်အောက်ခံ BGF ထိန်းချုပ်ရာ ရွှေကုက္ကိုလ်မြို့သစ်မှာ မီးဖြတ်တာခံရပေမယ့် မီးစက်တွေကို အသုံးပြုနေကြတယ်လို့ သိရပါတယ်။
ထိုင်းဝန်ကြီးချုပ်က မြဝတီ မြို့မှာရှိနေတဲ့ ကျားဖြန့်ဂိုဏ်းတွေဟာ ထိုင်းရဲ့ လျှပ်စစ်ဓာတ်အားနဲ့ လောင်စာဆီတွေ ရရှိနေတာမျိုး မဖြစ်အောင် ချက်ချင်း တုံ့ပြန် တားဆီးရမယ်လို့ ညွှန်ကြားချက် ပေးခဲ့တာပါ။
နောက်ဆက်တွဲအနေနဲ့တော့ ဒီမနက် မီးဖြတ်ခံရပြီးနောက် မြဝတီမြို့က ပြည်သူ့ဆေးရုံနဲ့ အောက်ဆီဂျင်စက်ရုံလည်ပတ်မှု ရပ်ဆိုင်းသွားရတယ်လို့ မြို့ခံတွေဆီကသိရပါတယ်။
မီးဖြတ်ခံရတဲ့အထဲမှာတဲ့ နယ်စပ်မြို့ ဘုရားသုံးဆူမြို့မှာလည်းဆိုရင်လည်း စက်သုံးဆီဆိုင်တွေမှာ တန်းစီစောင့်ဆိုင်းဝယ်ယူနေရသလို ဆီစျေးဟာလည်း အရင်က တစ်လီတာကို ၃၅ ဘတ်ကနေ ဘတ် ၆၀ အထိ စျေးတက်လာတယ်လို့ မြို့ခံဆီကသိရပါတယ်။
မြဝတီမြို့ကို တွေ့ရစဉ်(ပုံဟောင်း)
ဓာတ်ပုံ – ဝီကီ
