အနန်းကွင်းရွာ နေအိမ် ၅၀ခန့်ကို စစ်ကောင်စီတပ် မီးရှို့ဖျက်ဆီး

ဟန်နွေ/People’s Spring

ကရင်ပြည်နယ်၊ ကြာအင်းဆိပ်ကြီးမြို့နယ် အနန်းကွင်းကျေးရွာရှိ ဒေသခံများ၏ နေအိမ်များကို စစ်ကောင်စီက မီးရှို့ဖျက်ဆီးရာ နေအိမ် ၅၀ခန့် မီးလောင်ပျက်စီးခဲ့ကြောင်း အနန်းကွင်းဗျူဟာစခန်းကို ပိတ်ဆို့တိုက်ခိုက်လျက်ရှိသည့် နဂါးနီစစ်ကြောင်းစစ်ကြောင်းမှူး ကိုဟိန်းက ပြောသည်။

အနန်းကွင်း စစ်ကောင်စီဗျူဟာစခန်းကို ၂၀၂၄ နွေရာသီကတည်းက ကရင်အမျိုးသားလွတ်မြောက်ရေးတပ်မတော်(KNLA)နှင့် PDF ပူးပေါင်းတပ်များက ပိတ်ဆို့ တိုက်ခိုက်လျက်ရှိရာ တစ်နှစ်နီးပါးကြာပြီဖြစ်ပြီး ဒေသခံများလည်း စစ်ဘေးရှောင်နေကြရသည်။

“အဓိကကတော့ တော်လှန်ရေး တပ်ဖွဲ့တွေ ထိုးစစ်ပြန်စတဲ့အခါ သူတို့ခံစစ် အနေနဲ့ ရှင်းလင်းရေး လုပ်တာပေါ့။”ဟု ကိုဟိန်းက စစ်ကောင်စီတပ်က ပြည်သူ့နေအိမ်များကို မီးရှို့ဖျက်ဆီးနေသည့် လုပ်ရပ်အပေါ် သုံးသပ်သည်။

Public Service Announcement

တော်လှန်ရေးတပ်ဖွဲ့များကလည်း စစ်ကောင်စီ ဗျူဟာကို ပိတ်ဆို့ထားဆဲအခြေအနေဖြစ်ကြောင်းလည်း ၎င်းက လက်ရှိစစ်ရေးအခြေအနေကို ပြောပြသည်။

အနန်းကွင်း ဗျူဟာစခန်းတွင် လက်ရှိတွင် စစ်ကောင်စီတပ် အင်အား ၂၀၀ခန့်ရှိပြီး ဗျူဟာမှူး ၂ဦး ရှိနေသည်ဟုလည်း နဂါးနီ စစ်ကြောင်း စစ်ကြောင်းမှူးက ပြောသည်။

အဆိုပါ ဗျူဟာစခန်းကို တော်လှန်ရေးတပ်များက ပိတ်ဆို့ထား၍ မြေပြင် စစ်ကူပေးရန် အခက်ကြုံနေပြီး ရိက္ခာခဲယမ်းကိုလည်း စစ်ကောင်စီက လေကြောင်းမှ ပို့ဆောင်ပေးနေရသည်ဟုဆိုသည်။ ယခင်ကလည်း မြေပြင်မှ စစ်ကူများ ပို့ဆောင်ခဲ့ရာ တော်လှန်ရေးပူးပေါင်းတပ်၏ တိုက်ခိုက်မှုကြောင့် စစ်ကူတပ်များ သေဆုံးထိခိုက်များပြားခဲ့သည်။