နိုင်ပကောင်း/People’s Spring
ကျားဖြန့် /လူမှောင်ခို နှိမ်နင်းရေးအထူးအဖွဲ့ ဖွဲ့စည်းလိုက်ပြီးနောက် ထိန်းချုပ်နယ်မြေ ရွှေကုက္ကိုလ်မြို့သစ် က တရုတ်နိုင်ငံသားတွေ လုပ်ကိုင်နေတဲ့လုပ်ငန်းခွင်တွေကို ကရင့်နယ်ခြားစောင့်(BGF) က ဝင်ရောက်ရှာဖွေတာတွေ လုပ်ဆောင်နေတယ်လို့ BGF နဲ့ နီးစပ်တဲ့သတင်းရင်းမြစ်ဆီကသိရပါတယ်။
ရွှေကုက္ကိုလ်မှာရှိတဲ့ လုပ်ငန်းခွင်တွေ ၊ အဆောင်တွေကို ဝင်ရောက်စစ်ဆေးတာဖြစ်ပြီး တရုတ်နိုင်ငံသားအပါအဝင် နိုင်ငံခြားသားအများအပြားကိုဖမ်းဆီးကာ ရွှေကုက္ကိုလ်ထောင်အနီးက အဆောက်အဦးတစ်ခုမှာ ထိန်းသိမ်းထားတယ်လို့ အဲဒီသတင်းရင်းမြစ်ကပြောပါတယ်။
ထိန်းသိမ်းထားတဲ့ နိုင်ငံခြားသားဦးရေကိုအတိအကျမသိရသေးမယ့် မကြာခင်ရက်ပိုင်းမှာပဲ ထိုင်းဘက်ဆီ လွှဲပြောင်းပေးဖို့ BGF က စီစဉ်နေပါတယ်။
Public Service Announcement
ကျားဖြန့်လုပ်ငန်းတွေကြောင့် ရွှေကုက္ကိုလ်မြို့သစ် နာမည်ဆိုးနဲ့ ကျော်ကြားလာပြီးနောက် အဲဒီမြို့သစ်ကို ထိန်းချုပ်ထားတဲ့ BGF က ကျားဖြန့်နဲ့ လူကုန်ကူးမှု တိုက်ဖျက်မယ့် အထူးအဖွဲ့ကို ပြီးခဲ့တဲ့ ဖေဖော်ဝါရီ ၁၂ ရက်က ဖွဲ့စည်းခဲ့ပါ တယ်။
မြဝတီမြို့ထဲမှာ ရှိနေတဲ့ ကျားဖြန့် ငွေလိမ်ဂိုဏ်းတွေမှာ အဓမ္မ ခိုင်းစေဖို့ လူမှောင်ခို ကူးခံခဲ့ရတဲ့ ဖြစ်စဉ်ကို အကြောင်းပြုပြီး ဗိုလ်မှူးကြီး စောချစ်သူ အပါအဝင် BGF ခေါင်းဆောင် ၃ ယောက်ကို ဝရမ်းထုတ်ဖို့ ထိုင်းအထူးစုံစမ်းရေး ဌာန (DSI)က ကြိုးပမ်းခဲ့ပါတယ်။
ဒါပေမယ့် လုံလောက်တဲ့ အထောက်အထား မရှိဘူးဆိုတဲ့ အကြောင်းပြချက်နဲ့ ဖမ်းဝရမ်း ကိစ္စကို ရပ်နားထားပါတယ်။
ပြီးခဲ့တဲ့ ဖေဖော်ဝါရီလ ၆ ရက်ကတော့ BGF ဟာ လူကုန်ကူးခံရသူ နိုင်ငံခြားသား ၆၀ ကျော်ကို ထိုင်းအစိုးရ ဆီ လွှဲပြောင်းပေးထားတာရှိပါတယ်။
