ရန်ကုန်မြို့၊ တောင်ဥက္ကလာမြို့နယ်တွင်၊ဘုန်းကြီးကျောင်းအတွင်း ကိုယ်ပိုင်ကားဖြင့် အုပ်စု့ဖွဲ၍ ဖုန်းဝင်ခိုးသည့်အဖွဲ့ကို ဒေသခံပြည်သူများက ဝိုင်းဝန်းဖမ်းဆီးခဲ့ရာ တစ်ဦးဖမ်းမိခဲ့ကြောင်း သတင်းရရှိသည်။
တောင်ဥက္ကလာမြို့နယ်၊၃ ရပ်ကွက်၊ ငွေကြာရံကျောင်း၌ ဖေဖော်ဝါရီလ၁၆ရက်နံနက်ပိုင်း၌ သံဃာများ ဆွမ်းခံထွက်နေချိန် လူသုံးဦးထက်မနည်းပါသော အဖွဲ့က ကိုယ်ပိုင်ကားဖြင့်ဖုန်းများဝင်ခိုးခြင်းဟု ဆိုသည်။
“အရင်ကလည်းအဲဒီလိုအခိုးခံရဖူးတယ်။ အခုဝိုင်းစောင့်ပြီးဖမ်းတာ။ တစ်ယောက်ကိုတော့မိတယ်။ ကျန်တဲ့သူတွေထွက်ပြေးသွားတယ်” ဟု ဒေသခံတစ်ဦးကပြောသည်။
Public Service Announcement
အဆိုပါအဖွဲ့စီးလာသည်ကားသည် အုပ်စုဖွဲ့ခိုးသူများပိုင်ဆိုင်သည့် တက္ကစီကားဖြစ်ပြီး စားဝတ်နေရေးအဆင်မပြေ၍မဟုတ်ဘဲ စီးပွားဖြစ်ခိုးနေခြင်းဟု ဝိုင်းဝန်းဖမ်းဆီးခဲ့သူတစ်ဦးက လူမှုကွန်ရက်တွင် ဓာတ်ပုံမှတ်တမ်းများနှင့်အတူရေးသားထားသည်။
ရန်ကုန်မြို့တွင် စစ်ကောင်စီက ပျူစောထီးများနှင့် ပြည်သူ့စစ်အဖွဲ့များကို လုပ်ပိုင်ခွင့်ပေးထားပြီးတရားဥပဒေစိုးမိုးမှုလုံးဝမရှိတော့ကြောင်း၊ ဖုန်းနှင့် ရွှေထည်လုယက်ခံရမှုများမကြာခဏဖြစ်ပွားပြီး ဖမ်းမိသည့်တရားခံများကို ပျုစောထီးအမည်ခံလူမိုက်များက လာရောက်ခေါ်ဆောင်သွားလေ့ရှိကြောင်း မြို့ခံတစ်ဦးကပြောသည်။
“အာဏာသိမ်းပြီးနောက်ပိုင်း ရန်ကုန်က ရန်ပိုများနေပြီ။နေရထိုင်ရတာလုံးဝမလုံခြုံဘူး။ မြို့နယ်တိုင်းမှာ စစ်တပ်ကအခွင့်အရေးပေးထားတဲ့ လူမိုက်အဖွဲ့တွေရှိနေပြီ”ဟုတာမွေမြို့ခံတဦးကပြောသည်။
ယုဇနပလာဇာတွင် ဖုန်းလုယက်ခံရသူတစ်ဦးကသူ့အတွေ့အကြုံပြောရာတွင် အမျိုးသမီးတစ်ဦးပါအဖွဲ့က ၎င်း၏ဖုန်းကိုဆွဲယူသွားပြီး ကျန်အမျိုးသားနှစ်ဦးက ဓား မြောင်နှင့်ထောက်ကာ ခြိမ်းခြောက်ပြီး ဖုန်းကိုအလွယ်တကူယူဆောင်သွားသည်ဟု ပြောပြသည်။
ငွေကြာရံကျောင်းအတွင်းဖုန်းဝင်ခိုးသည့်အဖွဲ့မှ ဖမ်းမိထားသူတစ်ဦးကို ဒေသခံများက စစ်ကောင်စီ၏ တောင်ဥက္ကလာပရဲစခန်းသို့အပ်နှံလိုက်သည်။
