ဟန်နွေ/People’s Spring
ချင်းပြည် (Chinland)ကောင်စီနှင့် ကြားကာလ ချင်းအမျိုးသားအတိုင်ပင်ခံကောင်စီ (ICNCC)တို့၏ ချင်းအမျိုးသားညီညွတ်ရေးသဘောတူညီချက်အပေါ် ဂုဏ်ပြုကြောင်း ကရင်နီအမျိုးသားတိုးတက်ရေးပါတီ (KNPP)က ယနေ့ (ဖေဖော်ဝါရီ ၂၈ရက်)တွင် သဝဏ်လွှာပေးပို့ခဲ့ပြီး ကောင်စီနှစ်ခု ပေါင်းစည်းဖြစ်ပေါ်လာမည့် ချင်းအမျိုးသားကောင်စီနှင့်အတူ လက်တွဲဆောင်ရွက်သွားမည်ဟု အသိပေးသည်။
ချင်းပြည် (Chinland)ကောင်စီနှင့် ကြားကာလ ချင်းအမျိုးသားအတိုင်ပင်ခံကောင်စီ (ICNCC) တို့သည် ချင်းပြည်အတွင်း အမျိုးသားညီညွတ်ရေးကိုရှေးရှု၍ ကောင်စီနှစ်ရပ်ကို ပေါင်းစည်းပြီး ချင်းပြည်အတွင်း “ချင်းအမျိုးသားကောင်စီ” တစ်ရပ်ကို ဖွဲ့စည်းသွားရန် သဘောတူကြောင်း ပူးတွဲကြေညာခဲ့မှုအပေါ် KNPPက ဝမ်းမြောက်ကြောင်း သဝဏ်လွှာပေးပို့ခဲ့ခြင်းဖြစ်သည်။
KNPPအနေဖြင့် ချင်းပြည် (Chinland)ကောင်စီနှင့် ကြားကာလ ချင်းအမျိုးသားအတိုင်ပင်ခံကောင်စီ (ICNCC)တို့၏ ချင်းအမျိုးသားများအကြား စည်းလုံးညီညွတ်ရေးအတွက် နိုင်ငံရေးအမြင်ကြီးစွာဖြင့် ညှိနှိုင်းသဘောတူညီချက်ရရှိအောင် ဆောင်ရွက်နိုင်မှုအပေါ် ဂုဏ်ယူဝမ်းမြောက်မိကြောင်းလည်း ဖော်ပြသည်။
Public Service Announcement
အနာဂတ်ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးတွင် ချင်းအမျိုးသားကောင်စီနှင့် အတူတကွလက်တွဲဆောင်ရွက်သွားမည် ဖြစ်ပါ ကြောင်းလည်း KNPP၏ သဝဏ်လွှာ၌ ပါရှိသည်။
KNPP ကဲ့သို့ အမျိုးသားညီညွတ်ရေးအစိုးရ(NUG)က ချင်းတော်လှန်ရေးအင်အားစု ၂ခု ပေါင်းစည်းနိုင်ရေး သဘောတူညီချက် ရရှိမှုအပေါ် ဝမ်းမြောက်ဂုဏ်ပြုကြောင်း ဖေဖော်ဝါရီ ၂၇ရက်တွင် သဝဏ်လွှာပေးပို့ခဲ့ပြီး အယူအဆသဘောထား ကွဲလွဲမှုများအား ငြိမ်းချမ်းစွာ ဆွေးနွေးညှိနှိုင်း အဖြေရှာခဲ့သည့် ချင်းနိုင်ငံရေး ဦးဆောင်အဖွဲ့ နှစ်ခု၏ နိုင်ငံရေး သဘောထားကြီးမှုသည် ပြည်သူ့နွေဦးတော်လှန်ရေးတွင် ပါဝင်နေသော တော်လှန်ရေးအင်အားစုများအတွက် ဒီမိုကရေစီ အလေ့အကျင့်ကောင်း အဖြစ် အလေးအနက် စံပြုထိုက်ဖွယ်ဖြစ်ကြောင်း ဖော်ပြသည်။
ချင်းတော်လှန်ရေးအင်အားစု နှစ်ခု ညီညွတ်ရေး သဘောတူညီချက် ရရှိမှု၊ ရှေ့ဆက် ပေါင်းစည်းနိုင်ရေး ဆောင်ရွက်မည့် အခြေအနေများနှင့်ပတ်သက်၍ မေးမြန်းရန် ချင်းပြည်ကောင်စီနှင့် ICNCC၊ချင်းညီနောင် တာဝန်ရှိသူများကို ဆက်သွယ်မေးမြန်းထားဆဲဖြစ်ပြီး အဆက်အသွယ်မရသေးပေ။
