ရဲခေါင်/People’s Spring
မကွေးတိုင်း၊ ပခုက္ကူမြို့နယ် အခြေစိုက် ခြေမြန် တပ်မဌာနချုပ်(၁၀၁)မှ စစ်ကောင်စီတပ်သားသစ်နှစ်ဦး ထွက်ပြေးလွတ်မြောက်လာကြောင်း Burma Revolution Rangers တပ်ဖွဲ့က ယနေ့(မတ်လ ၃ရက်) တွင် ထုတ်ပြန်သည်။
တပ်မ(၁၀၁)မှ နှစ်ပွင့်ဗိုလ်နှင့်အတူ KTV သွားရောက်ရာ ၎င်းမူးနေချိန်တွင် ခဲယမ်းများယူဆောင်ပြီး ဖေဖော်ဝါရီ ၂၈ရက်က ထွက်ပြေးလာခဲ့ခြင်းဟု ဆိုသည်။
အဆိုပါဖြစ်စဥ်ကို မဟာမိတ်အဖွဲ့မှ ဆက်သွယ်အကူညီတောင်းလာမှုကြောင့် ထွက်ပြေးလာသူနှစ်ဦးကို ကယ်ထုတ်ခဲ့ကြောင်း ပခုက္ကူအခြေစိုက် Burma Revolution Rangersက အသိပေးသည်။
Public Service Announcement
ကယ်တင်နိုင်ခဲ့သူများသည် (၂၇)နှစ်အရွယ် ပိုင်သူထွန်းနှင့် (၂၅)နှစ်အရွယ် ဘိုရဲတို့ဖြစ်ပြီး ၎င်းတို့သည် ကျည်ခဲယမ်းများ ယူဆောင်လာခဲ့ကြောင်း ဖော်ပြသည်။
ဖေဖော်ဝါရီ ၁၅ ရက်ကလည်း ခလရ(၂၅၄) တပ်ရင်းမှ တပ်ကြပ် စံမိုးဆိုသူကို ကယ်ထုတ် နိုင်ခဲ့ပြီး ၎င်းသည် ပခုက္ကူမြို့နယ်၊ အင်ပင် ကျေးရွာဂိတ်တွင် တာဝန်ကျနေသူဖြစ်ပြီး တပ်တွင်းနှိပ်စက်မှုကြောင့် ထွက်ပြေးလာခဲ့ခြင်းဟု ထွက်ဆိုထားသည်။
စစ်ကောင်စီ၏ အဓမ္မစစ်မှုထမ်းရန်စုဆောင်းခံထားရသူများအနက် သုံးဦးသည် ယခုနှစ်ဆန်းပိုင်းတွင် လက်နက်ခဲယမ်းအချို့သယ်ဆောင်ကာ Burma Revolution Rangersထံ ဘက်ပြောင်းခိုလှုံမှုရှိထားသည်။
ထို့အပြင် စစ်ကိုင်းတံတားတွင် ပေါ်တာဆွဲခံရပြီးနောက် စစ်မှုထမ်းခံရသူတစ်ဦးလည်း တပ်မ(၁၀၁)မှ မတ်လ ၁ရက်တွင် လက်နက်ခဲယမ်းများယူလာပြီး အလင်းဝင်လာကြောင်းမြိုင်မြို့နယ်ပြည်သူ့ကာကွယ်ရေးအဖွဲ့ (ပကဖ) က ထုတ်ပြန်ထားသည်။
၂၀၂၄ ဖေဖော်ဝါရီ ၁၀ရက်က ပြဌာန်းခဲ့သည့်စစ်မှုထမ်းဥပဒေကြောင့် နိုင်ငံတစ်ဝန်း လူငယ်များ အဓမ္မလူသစ်စုဆောင်းခံရပြီး ရာနှင့်ချီသောတပ်သားသစ်များသည် စစ်ကောင်စီလက်အောက်မှ ထွက်ပြေးကာ တော်လှန်ရေးအင်အားစုများထံ အလင်းဝင်လာနေသည်။
