ကရင် နယ်ခြားစောင့်တပ် (BGF)ရဲ့ ခေါင်းဆောင် ဗိုလ်မှူးကြီး စောချစ်သူနဲ့ တခြား BGF ခေါင်းဆောင် တချို့ကို ဖမ်းဝရမ်း ထုတ်နိုင်ဖို့အတွက် ထိုင်းအထူးထောက်လှမ်းရေး ဌာန (DSI)က ပိုမို ခိုင်လုံတဲ့ အထောက်အထားတွေနဲ့အတူ ထိုင်းရှေ့နေချုပ်ရုံးဆီ တင်ပြ တောင်းဆိုခဲ့ပါတယ်။
အရင်တုန်းကလည်း DSI ဟာ စောချစ်သူနဲ့ တခြား BGF ခေါင်းဆောင် နှစ်ဦးကို နိုင်ငံခြားသားတွေအပေါ် လူကုန်ကူးတဲ့ ရာဇဝတ်မှုတွေနဲ့ ဆက်နွှယ်ပတ်သက်ကြောင်း စွပ်စွဲပြီး ဖမ်းဝရမ်း ထုတ်နိုင်ဖို့ တင်ပြခဲ့ဖူးပေမယ့် အထောက်အထား မခိုင်လုံလို့ဆိုတဲ့ အကြောင်းပြချက်နဲ့ ပယ်ချ ခံခဲ့ရပါတယ်။
အခုတစ်ကြိမ်မှာတော့ DSI ဟာ ဖမ်းဝရမ်း ထုတ်နိုင်ဖို့ လုံလောက်တဲ့ အနေအထားမျိုး ရှိနေပြီလို့ ယုံကြည် ယူဆခြင်းနဲ့အတူ BGF ခေါင်းဆောင်တွေကို ဖမ်းဆီးခွင့်ပြုရေး အဆိုပြုချက်ကို ရှေ့နေချုပ်ရုံးဆီ မတ်လ ၃ ရက်နေ့မှာ တင်ပြခဲ့တာလို့ Khaosod သတင်းဌာနက ဖော်ပြထားခဲ့ပါတယ်။
စောချစ်သူနဲ့ အပေါင်းအပါတွေကိုဖမ်းဝရမ်းထုတ်ဖို့ရည်ရွယ်ထားရာမှာလက်ရှိဖြစ်ပွားနေတဲ့ ပြည်တွင်း၊ ပြည်ပ လူမှောင်ခို လုပ်ငန်းတွေနဲ့ အဆက်အစပ် ရှိနေတယ်လို့လည်း Khaosodက ဆိုပါတယ်။
Public Service Announcement
DSIရဲ့ လူမှောင်ခို ရာဇဝတ်မှု တိုက်ဖျက်ရေး ဌာနခွဲ ညွှန်ကြားရေးမှူး ဒုတိယ ရဲမှူးကြီး ဆီရီဝတ် ကာဆမ်ဆူယပ်က လက်ရှိ စုဆောင်းထားတဲ့ အထောက်အထားတွေဟာ စောချစ်သူနဲ့ ကြံရာပါတွေကို စွဲချက်တင်နိုင်ဖို့ ဖူဖူလုံလုံ ဖြစ်နေပြီလို့ သဘောထား မှတ်ချက် ပေးခဲ့ပါတယ်။
ဒါပေမဲ့လည်းထိုင်းရှေ့နေချုပ် ရုံးကတော့ဖမ်းဝရမ်းထုတ်ဖို့သင့်၊မသင့် ချိန်ဆ လေ့လာနေဆဲကာလမှာ DSIကတင်ပြထားတယ်ဆိုတဲ့ အထောက်အထားတွေကို မထုတ်ပြန်သေးပါဘူး။
DSI ဟာ စောချစ်သူကိုသာ မကဘဲ တခြား BGF ထိပ်ပိုင်း အရာရှိတွေ ဖြစ်ကြတဲ့ ဒုတိယ ဗိုလ်မှူးကြီး စောမုတ်သုန်၊ ဗိုလ်မှူး စောတင်ဝင်းတို့ကိုပါ ဖမ်းဝရမ်း ထုတ်နိုင်ဖို့ စီစဉ်နေတာ ဖြစ်ပါတယ်။
အိန္ဒိယ နိုင်ငံသား ၈ ဦးကို မြဝတီမြိုထဲကျားဖြန့် ငွေလိမ်ဂိုဏ်းတွေက အဓမ္မ လူမှောင်ခိုကူးခဲ့ကြောင်း စွပ်စွဲချက် တစ်ခုနဲ့ ဆက်စပ်ပြီး စောချစ်သူကို ဖမ်းဝရမ်းထုတ်ဖို့ အဆိုပြုခဲ့တဲ့ DSIရဲ့ ကနဦး အားထုတ်မှုကတော့ စွပ်စွဲချက်အတွက် အထောက်အထား မခိုင်လုံဘူးဆိုတဲ့ အကြောင်းပြချက်နဲ့ ဖေဖော်ဝါရီ ၁၃ ရက်နေ့မှာ ရှေ့နေချုပ်ရုံးရဲ့ ပယ်ချခြင်းကို ခံခဲ့ရပါတယ်။
စောချစ်သူက ထိုင်းဘက်က ပထမအကြိမ်ဖမ်းဝရမ်းထုတ်ဖို့ကြိုးစားတဲ့အခါ သူဟာထိုင်းပြည်သူတွေ နစ်နာအောင် ဘာမှလုပ်မထားဘူးလို့ မီဒီယာတွေကိုဖြေခဲ့ပါတယ် ။ဒါကြောင့်ဖမ်းဝရမ်းထုတ်ဖို့ ကြိုးစားတဲ့အပေါ် စိတ်မကောင်းဘူးလို့ ဆိုခဲ့ပါတယ်။
ကိုးကား-Khaosod
