ချင်းပြည်နယ်၊ ဖလမ်းမြို့သိမ်းစစ်ဆင်ရေးကို ချင်းညီနောင်နှင့်မဟာမိတ်တပ်များက ဖော်ဆောင်လျက်ရှိရာ ယနေ့ (မတ်လ ၁၂ရက်)တွင် တိုက်ပွဲပြင်းထန်နေကြောင်း ချင်းညီနောင်အဖွဲ့ဝင် ချင်းအမျိုးသားကာကွယ်ရေးတပ်(CNDF) ပြောရေးဆိုခွင့်ရှိသူ ဆလိုင်းတီမီက ပြောသည်။
မင်းတပ်မြို့ကို ၂၀၂၄ နိုတင်ဘာ ၂၃ရက်က လေကြောင်းမှ တိုက်ခိုက်မှုကြောင့် မီးလောင်နေသည်ကို တွေ့ရစဉ်/ ချင်းညီနောင်တပ်ဖွဲ့ဝင်များ/ ဖလမ်းတိုက်ပွဲတွင်စစ်တပ်ထံမှ သိမ်းဆည်းရရှိသောလက်နက်များ နှင့် ဖမ်းဆီးထားသော စစ်သုံ့ပန်းများ။ ဓာတ်ပုံ – CJ ၊CB မင်းတပ်မြို့ကို ၂၀၂၄ နိုတင်ဘာ ၂၃ရက်က လေကြောင်းမှ တိုက်ခိုက်မှုကြောင့် မီးလောင်နေသည်ကို တွေ့ရစဉ်/ ချင်းညီနောင်တပ်ဖွဲ့ဝင်များ/ ဖလမ်းတိုက်ပွဲတွင်စစ်တပ်ထံမှ သိမ်းဆည်းရရှိသောလက်နက်များ နှင့် ဖမ်းဆီးထားသော စစ်သုံ့ပန်းများ။ ဓာတ်ပုံ – CJ ၊CB
မတ်လ ၁၂ရက် နံနက် ၅နာရီကတည်းက တိုက်ပွဲပြင်းထန်နေခြင်းဟု ၎င်းက ဆိုသည်။
“ပြင်းထန်ပြီးတော့ ဂျက်ဖိုက်တာကလည်း မိုးလင်းကတည်းကနေ အခုထိ ပစ်နေတုန်းပဲ။ဂျက်ဖိုက်တာအစီးနဲ့ဆိုရင် ၁၁စီးလောက်ရှိပြီ။ အကြိမ်နဲ့ဆို အကြိမ် ၂၀ကျော်ပြီပေါ့ ”ဟု ဆလိုင်းတီမီက ပြောသည်။
Public Service Announcement
ဖလမ်းမြို့သိမ်းစစ်ဆင်ရေးကို ချင်းညီနောင်မဟာမိတ်များက ၂၀၂၄ နိုဝင်ဘာဒုတိယပတ်က စတင်ခဲ့ရာ တိုက်ပွဲ ၄လကျော်ကြာပြီဖြစ်သည်။
မြို့သိမ်းစစ်ဆင်ရေးအတွင်း ဖလမ်းမြို့အပါအဝင် စစ်ကောင်စီတပ်စွဲရာနေရာများကို ချင်းညီနောင်မဟာမိတ်များက သိမ်းပိုက်ထားပြီး ဖလမ်းတပ်ကုန်းဟုခေါ်ဆိုသည့် ခလရ(၂၆၈)တပ်ရင်းသာ ကျန်တော့သည်ဟု ချင်းညီနောင်က အသိပေးသည်။
မြို့သိမ်းစစ်ဆင်ရေးအတွင်း စစ်ကောင်စီတပ်ဘက်က လေကြောင်းမှ လူအင်အားဖြည့်တင်းမှုများ ရှိသော်လည်း ချင်းညီနောင်၏ ဝိုင်းပတ်ပိတ်ဆို့မှုကြောင့် စစ်ကောင်စီတပ်ဖွဲ့ဝင်များသေဆုံးထိခိုက်မှုများခဲ့ပြီး စစ်သုံ့ပမ်းအများအပြားကို ချင်းညီနောင်ပူးပေါင်းတပ်က ဖမ်းမိခဲ့သည်။
ဖလမ်းတိုက်ပွဲတွင် စစ်ကောင်စီက စစ်မှုထမ်းတပ်သားသစ်များကိုပါ အသုံးပြု စစ်အင်အားဖြည့်တင်းခဲ့ခြင်းဖြစ်ကြောင်း ချင်းညီနောင်က ဖမ်းမိထားသည့် စစ်သုံ့ပမ်း အချို့က ထွက်ဆိုထားသည်။ ထို့ပြင် ကျန် စစ်ကောင်စီတပ်သားများ အခွင့်ရပါက တော်လှန်ရေးတပ်ဖွဲ့များထံ လက်နက်ချ အလင်းဝင်ကြရန်လည်း စစ်သုံ့ပမ်း လူငယ်အချို့က တိုက်တွန်းထားသည်။
ချင်းညီနောင် မဟာမိတ်များသည် ဖလမ်းမြို့သိမ်းစစ်ဆင်ရေးနှင့်အတူ မင်းတပ်မြို့သိမ်းတိုက်ပွဲကိုပါ တပြိုင်တည်းဆင်နွှဲခဲ့သည်။ တိုက်ပွဲရက်ပေါင်း ၄၀ကျော်အကြား ၂၀၂၄ ဒီဇင်ဘာ ၂၁ရက်တွင် မင်းတပ်မြို့ကို ချင်းညီနောင်မဟာမိတ်များက အပြီးသတ်သိမ်းနိုင်ခဲ့ပြီး စစ်သုံ့ပမ်းရာချီနှင့် လက်နက်ခဲယမ်းများစွာ သိမ်းရခဲ့သည်။
မင်းတပ်မြို့ကျပြီးနောက် ကန်ပက်လက်ရှိ စစ်ကောင်စီတပ်များက ဒီဇင်ဘာ ၂၁ရက်ညပိုင်း၌ မြို့ကို စွန့်ခွာသွားရာ ကန်ပက်လက်မြို့ကို ဒီဇင်ဘာ ၂၂ရက်တွင် ချင်းညီနောင်က သိမ်းပိုက်နိုင်ခဲ့သည်။
