ကဖေး/People’s Spring
ဧရာဝတီတိုင်း၊ လေးမျက်နှာမြို့နယ်အတွင်း ပုသိမ်၊မုံရွာလမ်းဘေးရှိ ကျေးရွာချို့တွင် စစ်ကောင်စီတပ် နှင့် ပြည်သူ့ကာကွယ်ရေးတပ်ဖွဲ့များ တိုက်ပွဲဖြစ်ပွားပြီး စစ်ကောင်စီက ဒေသတွင်းဆက်စပ်မြို့နယ်များတွင် စစ်ဆေးမှုများကိုတင်းကြပ်ထားသည်။
” ရေကြည်ဘက်ကနေ ပိတ်တယ်။ ဟင်္သာတဘက်ကနေ ဝင်တဲ့လမ်းတွေလည်း အရမ်းစစ်ဆေးနေတယ်။ တိုက်ပွဲက ညက စဖြစ်တာ။ PDF တွေ ဝင်လာတယ်ဆိုပြီး စစ်တပ်ဖက်က စပြီး စစ်ကြောင်းထိုးတာကနေဖြစ်တာ” ဟု လေးမျက်နှာမြို့ခံတစ်ဦးကပြောသည်။
ပုသိမ်၊မုံရွာလမ်းဘေးရှိစက်စက်ယိုရွာနှင့်ချင်းလယ်ရွာပတ်ဝန်းကျင်ရှိ ရိုးမတောတွင်းနေရာအချို့၌ တိုက်ပွဲဖြစ်ပွားခဲ့ခြင်းဖြစ်ကြောင်း ဒေသခံများကပြောသည်။
Public Service Announcement
လေးမျက်နှာမြို့နယ်သည် ဟင်္သာတခရိုင်အတွင်းပါဝင်သည် ။ ထို့အပြင် ရေကြည်မြို့နယ်၊ မြောက်စမ်းရွာရှိ စစ်ကောင်စီအမြောက်တပ်အမတ(၃၄၄)နှင့်လည်း ဒေသချင်းဆက်စပ်နေသည်။
“ချင်းလယ်ရွာကိုဝင်ပြီးဒေသခံတွေကိုအပြင်ထုတ်ခွင့်မပေးဘဲ စစ်ဆေးနေတာရှိတယ်။ဖုန်းတွေလည်းသိမ်းထားတယ်။အထူးသဖြင့်ဒေသခံတွေကို မဲမယ့်အနေအထားရှိတယ်”ဟုPDFများနှင့် နီးစပ်သူတစ်ဦးကပြောသည်။
ရေကြည်မြို့နယ်တွင်းရှိရေနံသာလမ်းဆုံ၊ စက်စက်ယိုလမ်းဆုံတို့ကို စစ်ကောင်စီက မတ် ၁၇ ရက်မနက်ပိုင်းတွင် ပိတ်ခဲ့ပြီးနောက် ရေနံသာလမ်းဆုံကို ပြန်ဖွင့်ပေးသော်လည်း စက်စက်ယိုလမ်းဆုံအားဆက်လက်ပိတ်ထားသည်။ထို့ကြောင့်ဒေသခံပြည်သူများ သတိထားသွားလာကြရန် ရေကြည်မြို့နယ်ပြည်သူ့ကာကွယ်ရေးအဖွဲ့ကမတ်လ ၁၇ရက်တွင် ထုတ်ပြန်ထားသည်။
အမတ(၃၄၄)ကိုလည်း စစ်ကောင်စီက အင်အားထပ်မံဖြည့်တင်းနေပြီးဘန်ကာအသစ်များတူးနေကြောင်း သတင်းရရှိသည်။အမတ(၃၄၄)သည် လက်ရှိတိုက်ပွဲများဖြစ်နေသော သာပေါင်းမြို့နယ်ဘက်သို့ ပစ်ကူပေးနေသည့်အမြောက်တပ်ရင်းဖြစ်သည်။အဆိုပါနေရာကို AA ကပစ်မှတ်ထားတိုက်ခိုက်သိမ်းယူနိုင်ကြောင်း CDM ဗိုလ်ကြီးဇင်ယော်က သုံးသပ်ထားသည်။
ဧရာဝတီတိုင်းတွင်ပြီးခဲ့သည့် ဇန်နဝါရီလက ရွှေသောင်ယံမြို့နယ်၊ သာပေါင်းမြို့နယ်၊ ရေကြည်မြို့နယ်တို့မှ ရခိုင်ရိုးမ နှင့် ဆက်စပ်နေရာများတွင် တိုက်ပွဲများပြင်းထန်ခဲ့သည်။ အဆိုပါတိုက်ပွဲများတွင် စစ်မှုထမ်းဥပဒေဖြင့် စစ်သားစုဆောင်းခံရသူများကို စစ်ကောင်စီကအသုံးပြုခဲ့ပြီး သေဆုံးဒဏ်ရာရသူ ၊ထွက်ပြေးသူများပြားခဲ့သည်။
