ထိုင်း-မြန်မာ နယ်စပ်အခြေစိုက် ကျားဖြန့်အွန်လိုင်း ငွေလိမ်ဂိုဏ်းတွေကနေ လွတ်မြောက်လာသူ ရာနဲ့ချီတဲ့ နိုင်ငံသားတွေကိုနေရပ်ပြန်ခေါ်တဲ့အစီအစဉ်စတင်နေပြီလို့ အင်ဒိုနီးရှားကမတ်လ ၁၈ ရက်နေ့မှာ ကြေညာခဲ့ပါတယ်။
ထိုင်းနဲ့ ထိစပ်ရာ မြန်မာနိုင်ငံဖက်ခြမ်းမှာအခြေစိုက်တဲ့ ကျားဖြန့် ဂိုဏ်းတွေဆီ လှည့်စား လူကုန်ကူး ခံခဲ့ရပြီး အဓမ္မ ခိုင်းစေမှုတွေ၊ညှင်းပန်းနှိပ်စက်မှုတွေ၊ ခြိမ်းခြောက်မှုတွေ ကြုံတွေ့ပြီး ဒုက္ခခံခဲ့ရတဲ့ နိုင်ငံသားတွေကို အသုတ်လိုက် ပြန်လည် ခေါ်ဆောင်နေပြီလို့ အင်ဒိုနီးရှား အာဏာပိုင်တွေက မတ်လ ၁၈ ရက်နေ့မှာ ပြောကြားခဲ့ပါတယ်။
တရုတ်ရဲ့ ဖိအားပေးမှုနဲ့အတူ မြန်မာနဲ့ ထိုင်းပါ ပူးပေါင်းပြီး နယ်စပ် ကျားဖြန့်ဂိုဏ်းတွေကို ဖိအားပေးဖြိုခွင်းခဲ့တဲ့နောက် လွတ်မြောက်လာသူ ကျားဖြန့်ဝန်ထမ်းဟောင်း နိုင်ငံခြားသား (၇၀၀၀) ဝန်းကျင်ဟာ မြန်မာဖက်ခြမ်း၊ နယ်စပ်ဖြစ်တဲ့ မြဝတီ မြို့နယ်ထဲမှာ ပိတ်မိနေခဲ့ပါတယ်။အဲဒီထဲကအများစုဟာ တရုတ်တွေဖြစ်ပြီး နိုင်ငံပေါင်း ၂၂ ခုရဲ့ နိုင်ငံသားတွေ ပါဝင်တယ်လို့ ဆိုပါတယ်။
မတ်လ ၁၈ ရက်နေ့မှာတော့ အင်ဒိုနီးရှား နိုင်ငံသား ၄၀၀ ဟာ ထိုင်းကနေတဆင့် အင်ဒိုနီးရှားကို ပြန်လည် ရောက်ရှိလာခဲ့ပြီလို့ အင်ဒိုနီးရှားရဲ့ နိုင်ငံရေးနဲ့ လုံခြုံရေး ပူးပေါင်းဆောင်ရွက်ရေး ဝန်ကြီး ဘူဒီဂူနာဝမ်က ပြောကြားခဲ့ပါတယ်။ နောက်ထပ် အနည်းဆုံး ၁၅၄ ဦးဟာ မတ်လ ၁၉ ရက်နေ့မှာ အင်ဒိုနီးရှားကို ပြန်ခွင့်ရဖွယ် ရှိတယ်လို့လည်း သူက ဆက်ပြောပါတယ်။
Public Service Announcement
အင်ဒိုနီးရှား၊ ထိုင်းနဲ့ တရုတ် အစိုးရတွေ ပူးပေါင်း ဆောင်ရွက်မှုနဲ့အတူ အင်ဒိုနီးရှား ၅၅၄ ဦးကို ကယ်ဆယ် ရွှေ့ပြောင်းဖို့ စီမံ ဆောင်ရွက်နိုင်ခဲ့တယ်လို့ သူကဂျာကာတာမြို့နိုင်ငံတကာလေဆိပ်မှာ သတင်းထောက်တွေကို အသိပေးခဲ့ပါတယ်။
ကယ်ဆယ်လာမယ့် အင်ဒိုနီးရှား နိုင်ငံသားတွေဟာ အမျိုးသား ၄၄၉ ဦးနဲ့ အမျိုးသမီး ၁၀၅ ဦးဖြစ်ကြောင်း၊ အားလုံးဟာ ကျားဖြန့် ဂိုဏ်းကြီးတွေရဲ့ လူကုန်ကူးမှု သားကောင်ဘဝ ကျရောက်ခဲ့သူတွေဖြစ်ကြောင်းသူကဆိုပါတယ်။
အင်ဒိုနီးရှား နိုင်ငံခြားရေး ဝန်ကြီးဌာနရဲ့ ပြည်သူ့ကာကွယ်ရေး ညွှန်ကြားရေးမှူး ဂျူဒ်ဟာ နျူဂရာဟာကတော့ မတ်လ ၁၉ ရက်နေ့မှာ ပြန်လာမယ့် အင်ဒိုနီးရှား နိုင်ငံသား အရေအတွက်ဟာ ၁၆၁ ဦးထိ ဖြစ်နိုင်တယ်လို့ မှတ်ချက်ပေးခဲ့ပါတယ်။
ပထမအသုတ်ပြန်လာတဲ့အယောက် ၄၀၀ လောက်ကတော့ မြန်မာဖက်ကနေထိုင်းနိုင်ငံဆီ ရွှေ့ပြောင်းပြီးတဲ့နောက် လေယာဉ် သုံးစီးနဲ့ စီးနင်းလိုက်ပါလာခဲ့တာ ဖြစ်တယ်လို့ သူက ဆိုပါတယ်။ အင်ဒိုနီးရှား အယောက် ၂၀၀ လောက် လိုက်ပါလာတဲ့ ပထမဆုံး လေယာဉ်ဟာ မတ်လ ၁၈ ရက်နေ့ မနက်ပိုင်းမှာ ဆိုက်ရောက်လာခဲ့ပါတယ်။
အင်ဒိုနီးရှား အစိုးရဟာ မြန်မာနိုင်ငံမှာ ပိတ်မိနေခဲ့တဲ့ နိုင်ငံသား ၁၄၀ ကိုဖေဖော်ဝါရီလတုန်းကလည်းထိုင်းနိုင်ငံကနေတဆင့် ရွှေ့ပြောင်း ခေါ်ဆောင်ခဲ့ပြီး ဖြစ်ပါတယ်။
ကုလသမဂ္ဂကတော့တရုတ်နိုင်ငံသားအများစု အပါအဝင် လူပေါင်း ၁၂၀၀၀၀ ကျော်ဟာ သူတို့ရဲ့ ဆန္ဒနဲ့ ဆန့်ကျင်ပြီး မြန်မာနိုင်ငံထဲက ကျားဖြန့်ဂိုဏ်းတွေမှာ အဓမ္မ ခိုင်းစေ ခံခဲ့ရကြောင်း ခန့်မှန်း ကြေညာထားပါတယ်။
ကိုးကား- CNA
