ငလျင်လှုပ်အပြီးမှာစစ်ကောင်စီက နောင်ချိုကို လေကြောင်းမှဗုံးကြဲ

မတ်-၂၈၊၂၀၂၅။ဒီဒီး/People’s Spring

အင်အားပြင်းငလျင်လှုပ်ခတ်အပြီးမှာ စစ်ကောင်စီက ရှမ်းပြည်နယ်မြောက်ပိုင်း၊ နောင်ချိုမြို့နယ် ကံကြီးကျေးရွာအနီးကို လေကြောင်းကနေ သုံးကြိမ်ဗုံးကြဲတိုက်ခိုက်သွားတယ်လို့ ဒေသခံတွေက လူထုနွေဦးကို ပြောပါတယ်။

ဒီကနေ့(မတ်လ ၂၈ရက်) မွန်းလွဲပိုင်းမှာ အင်အားပြင်းငလျင်လှုပ်ခတ်အပြီး နေ့လယ် ၁နာရီခွဲ နဲ့ ၂ နာရီကြားမှာ စစ်ကောင်စီက ကံကြီးကျေးရွာအနီးကို လေကြောင်းတိုက်ခိုက်ခဲ့တာလို့ ပြောပါတယ်။

လေကြောင်းတိုက်ခိုက်မှုကြောင့် ဒေသခံအချို့ ထိခိုက်မှုရှိတယ်လို့ ကြားသိရပြီး အရေအတွက် အတိအကျကိုတော့ မသိရသေးဘူးလို့ ဒေသခံတစ်ဦးက ပြောပါတယ်။

Public Service Announcement

“အပေါ်က လေယာဉ်၊ အောက်က ငလျင် တကယ့်အတွေ့အကြုံပဲ”လို့ ဒေသခံ တစ်ဦးက ပြောပါတယ်။

ဒီကနေ့မှာ အင်အားကြီးမားတဲ့ငလျင်လှုပ်ခတ်ခံရတာကြောင့် တစ်နိုင်ငံလုံးက ပြည်သူတွေ ထိတ်လန့်တုန့်လှုပ်နေချိန်မှာစစ်ကောင်စီကလေကြောင်းတိုက်ခိုက်ခဲ့တာလို့ နောင်ချိုဒေသခံတွေက ပြောပါတယ်။

စစ်​ကောင်စီက ​မြေငလျင်​ကြောင့် အ​ရေး​ပေါ်အ​ခြေအ​နေ ​ကြေညာတဲ့ဒေသ ၆ ခုထဲမှာရှမ်းပြည်နယ်မှာ ရှမ်း​ပြည်နယ်​မြောက်ပိုင်းကိုထည့်သွင်းထား​ပေမယ့် အဲဒီ​ဒေသက ​နောင်ချိုကို ဗုံးကြဲခဲ့တာဖြစ်ပါတယ်။

အလားတူစစ်​ကောင်စီဟာ အ​ရေး​ပေါ်အ​ခြေအ​နေ ​ကြေညာတဲ့ ပဲခူးတိုင်း ၊ဖြူမြို့နယ် ထဲက စစ်​တောင်းမြစ် အ​ရှေ့ဘက် ကမ်းက ​ကျေးရွာ​တွေကိုလည်း ​မြေငလျင်ကြီး လှုပ်ပြီးနာရီပိုင်းအကြာ မွန်းလွဲ ၂နာရီခွဲ နဲ့ ၃ နာရီအတွင်းမှာ ​လေ​ကြောင်းက​နေ ဗုံးကြဲခဲ့တယ်လို့ ​ဒေသခံ​တွေက​ပြောပါတယ် ။အဲဒီဘက်က ​ကျေးရွာ​တွေကို မတ် ၂၈ ရက်​နေ့ပါဆိုရင် စစ်တပ်က ၃ ရက်ဆက်ဗုံးလာကြဲ​နေတာလို့ ​ဒေသခံ တချို့က​ပြောပါတယ်။

အမေရိကန် ဘူဗိလေ့လာရေးဌာန (USGS)ရဲ့တိုင်းတာချက်အရ ဒီနေ့မွန်းလွဲပိုင်းက မန္တလးမြို့အနီး ကို ဗဟိုပြုပြီး အင်အားကြီးငလျင် နှစ်ခု ၁၂ မိနစ်ခန့်ခြားပြီး ရှေ့ဆင့်နောက်ဆင့် လှုပ်ခတ်သွားတာပါ။

ကနဦးငလျင်က ပြင်းအားရစ်ချ်တာစကေး ၇ ဒဿမ ၇ရှိတဲ့ ငလျင်ကြီးက မန္တလေးမြို့ တဖက်ကမ်း စစ်ကိုင်းမြို့ ၊ ရေခါးအင်းကိုဗဟိုပြုပြီး မြေအနက် ၆မိုင်ခန့် က လှုပ်ခတ်သွားတာပါ။

နောက်ဆက်တွဲ ငလျင်က ၁၂မိနစ်ခန့်သာခြားပြီး မန္တလေးမြို့ ၊တံတားဦးမြို့နယ် ထဲက မန္တလေးလေဆိပ် နားကို ရစ်ချ်တာစကေး ၆ ဒဿမ၄ ပြင်အားရှိတဲ့ ငလျင်ကြီး ထပ်မံလှုပ်ခတ်ခဲ့တာဖြစ်ပါတယ်။

အမျိုးသားညီညွှတ်ရေးအစိုးရ(NUG)က ငလျင်သတင်းထုတ်ပြန်ရာမှာ ငလျင်က စစ်ကိုင်းမြို့ အနီးကို ဗဟိုပြုပြီး လှုပ်ခတ်သွားတာလို့ဖော်ပြထားပြီး စစ်ကိုင်း ၊မန္တလေး ၊ နေပြည်တော်၊ တောင်ကြီး ၊ ပဲခူးတို့မှာ လူသေဆုံးမှုတွေနဲ့ ထိခိုက်ပျက်စီးမှုတွေ ရှိတယ်လို့ ထုတ်ပြန်ထားပါတယ်။

အင်အားပြင်းငလျင်ရဲ့ နောက်ဆက်တွဲ အနေနဲ့ ငလျင်ငယ်တွေ လှုပ်ခတ်နိုင်တာကြောင့် ယိုင်နဲ့သွားတဲ့ အဆောက်အဦးတွေထဲမှာ ဆက်မနေကြ

ဖို့ ၊ငလျင်ကြောင့် ဆည်တာတမံတွေ​ အက်ကွဲမှု ရှိ၊မရှိ ကိုစစ်ဆေးပြီး လိုအပ်ရင် ကြိုတင်ရွေ့ပြောင်းကြဖို့ NUGက သတိပေးထားပါတယ်။