မတ္တရာမြို့နယ်မှာ ငလျင်ဒဏ်ကြောင့် သေဆုံးသူတွေရှိပြီး အကူအညီတွေ လိုအပ်နေ

ဧပြီ ၁၊ ၂၀၂၅။ ရှိန်း/People’s Spring

မန္တလေးတိုင်း၊ မတ္တရာမြို့နယ်မှာ ငလျင်ဒဏ်ကြောင့် သေဆုံးသူတွေရှိပြီး အကူအညီတွေ လိုအပ်နေတယ်လို့ ဒေသခံတွေက ပြောပါတယ်။

မတ်လ ၂၈ရက်က လှုပ်ခတ်ခဲ့တဲ့ ငလျင်ဒဏ်ကြောင့် မတ္တရာမြို့ပေါ် နဲ့ မြို့နယ်အတွင်းက ကျေးရွာတွေမှာ လူသေဆုံးမှုတွေ၊ ပျက်စီးဆုံးရှုံးမှုတွေ ရှိခဲ့တယ်လို့ ‌‌‌‌‌‌‌‌‌‌‌‌‌‌သိရပါတယ်။

“မတ္တရာမြို့ ပေါ်မှာလည်း သေတယ်။ မြွေရွာဘက်မှာလည်း သေတယ်။ လိုင်းမရတော့ သတင်းတွေ မထွက်တာ”လို့ ဒေသခံတစ်ဦးက ပြောပါတယ်။

Public Service Announcement

​သေဆုံးထိခိုက်မှု​တွေကို စာရင်း​ကောက်ယူ​နေဆဲလို့ သိရပြီး အချက်အလက်အ​သေးစိပ်​တော့ မရရှိ​သေးပါဘူး။

ငလျင်ဒဏ်ကြောင့် ပြည်သူတွေ ထိခိုက်သေဆုံးတာကို ပြင်ဦးလွင်ခရိုင်ပကဖ သတင်းတာဝန်ခံကလည်း အတည်ပြုထားပြီး စာရင်း ကောက်ယူဆဲဖြစ်တယ်လို့ ဆိုပါတယ်။

ဒါ့အပြင် ငလျင်ဒဏ်ကြောင့် နေအိမ်တွေ ပြိုကျပျက်စီးတွေလည်း ရှိနေပြီး အကူအညီတွေလိုအပ်နေတယ်လို့လည်း သိရပါတယ်။

မတ္တရာမြို့ကို စစ်တပ်က စိုးမိုးထားပြီး မြွေရွာဟာ တော်လှန်ရေးတပ်တွေ စိုးမိုးထားတဲ့နယ်မြေဖြစ်ပါတယ်။

မတ္တရာမြို့နယ်နဲ့ ကပ်လျက်ဖြစ်တဲ့ ပုသိမ်ကြီးမြို့နယ်မှာတော့ ငလျင်ဒဏ်ကြောင့် လူဦးရေ ရာနဲ့ချီ သေဆုံးခဲ့ပါတယ်။