ဧပြီ ၂၁၊၂၀၂၅။ဟန်နွေ/People’s Spring
ချင်းပြည်နယ်၊ တွန်းဇံမြို့ကို စစ်ကောင်စီနှင့် ပူးပေါင်းဆောင်ရွက်နေသည့် ဇိုမီးတပ်(ZRA)က လာရောက်ပစ်ခတ်တိုက်ခိုက်ခဲ့ကြောင်း ချင်းပြည်ကောင်စီအဖွဲ့ဝင် ချင်းအမျိုးသားတပ်ဦး(CNF/CNA) ပြောရေးဆိုခွင့်ရှိသူ ဆလိုင်းထက်နီက ပြောသည်။
ဧပြီလဆန်းတွင် တွန်းဇံမြို့ကို လာရောက်တိုက်ခိုက်ခဲ့သည့် ZRAတပ်က ဧပြီ ၂၀ရက်နှင့် ယနေ့ (ဧပြီ ၂၁ရက်)တွင်လည်း ထပ်မံပစ်ခတ်တိုက်ခိုက်လာ၍ တိုက်ပွဲဖြစ်ခဲ့သည်ဟု ဆိုသည်။
“တွန်းဇံမြို့တွင်းကို ဝင်လာပြီး လာတိုက်တာပါ။ ပြန်ဆုတ်သွားကြတယ်။ သူတို့ ၄ယောက်ကျပြီး ၆ယောက် ဒဏ်ရာရတယ်။ အလောင်း နှစ်လောင်းကို အိန္ဒိယ မဏိပူရ်ဘက်ကို ပြန်သယ်သွားတယ်လို့ သိရတယ်”ဟု ဆလိုင်းထက်နီက ဧပြီ ၂၀ရက် တိုက်ပွဲအခြေအနေကို ပြောသည်။
Public Service Announcement
သို့သော် ဧပြီ ၂၁ရက်တွင် ZRA က အဝေးမှ လာရောက်တိုက်ခိုက်ခဲ့သော်လည်း တပ်ပြန်ဆုတ်သွားကြောင်း ဆလိုင်းထက်နီက ပြောသည်။
စစ်ကောင်စီသည် ZRA ကို လက်နက်တပ်ဆင်ပေးပြီး တွန်းဇံကို ပြန်လည်တိုက်ခိုက်နေခြင်းဖြစ်ကြောင်း ဆလိုင်းထက်နီက ပြောထားသည်။
ZRA အနေဖြင့် စစ်ကောင်စီနှင့် ပူးပေါင်းဆောင်ရွက်နေခြင်းအပေါ် ဝမ်းနည်းကြောင်း ဆလိုင်းထက်နီက ပြောကြားပြီး ထပ်မံ၍ လာရောက်နှောက်ယှက်တိုက်ခိုက်ခြင်းများ မပြုလုပ်စေလိုဟု တိုက်တွန်းပြောကြားသည်။
တွန်းဇံမြို့ကို CNA နှင့် ချင်းဒေသကာကွယ်ရေးတပ်များ ပူးပေါင်းထားသည့် ချင်းပြည်ကောင်စီတပ်များက ၂၀၂၄ မေလတွင် တိုက်ခိုက်သိမ်းပိုက်ထားခြင်းဖြစ်သည်။
