ဧပြီ၂၄၊ ၂၀၂၅။ကျော်ဇော/People’s Spring
ပဲခူးတိုင်း၊ ထန်းတပင်မြို့နယ်၊ သောင်ပုချောင် ကျေးရွာကို စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လက်နက်ကြီးများဖြင့် ပစ်ခတ်၍ ဒေသခံပြည်သူတစ်ဦးသေဆုံးပြီး လေးဦးထိခိုက်ဒဏ်ရာရခဲ့ကြောင်း တောင်ငူခရိုင် တပ် ရင်း(၃၅၀၂)မှ ပြန်ကြားရေးတာဝန်ခံက ပြော သည်။
ယနေ့(ဧပြီ ၂၄)နံနက်အစောပိုင်း ၁နာရီ ၁၅ မိနစ်ခန့်က ညောင်ခြေထောက်အခြေစိုက် စစ်ကောင်စီတပ်နှင့် ခလရ(၇၃)တပ်ရင်းတို့မှ လက်နက်ကြီးများဖြင့် ပစ်ခတ်ခဲ့ရာ သောင်ပုချောင်ကျေးရွာအတွင်း နှစ်လုံးကျရောက်ပေါက်ကွဲခဲ့ခြင်းဟု ၎င်းက ပြောသည်။
အဆိုပါ လက်နက်ကြီးကျည်များကျရောက် ပေါက်ကွဲ၍ အသက်(၇၀)ကျော် သက်ကြီးအမျိုး သမီးတစ်ဦးသေဆုံးပြီး (၈)နှစ်အရွယ်ကလေးငယ်အပါအဝင် လေးဦး ဒဏ်ရာရခဲ့ကြောင်း သိရသည်။
Public Service Announcement
ထိခိုက်ဒဏ်ရာရသူလေးဦးတွင် (၈)နှစ်ကလေးငယ်အပါအဝင် သုံးဦးမှာ စိုးရိမ်ရသည့် အခြေအနေဖြစ်ကြောင်း တောင်ငူခရိုင်တပ်ရင်း (၃၅၀၂)က အသိပေးသည်။
“အကြောင်းမဲ့ မဟုတ်ပါဘူး။ ရည်ရွယ်ချက်ရှိရှိ လုပ်ဆောင်နေတာပါ။ တော်လှန်ရေးကိုထောက်ခံရင် ဒီလိုဖြစ်မယ်ဆိုတဲ့ အကြောက်တရားထည့်ပြီး ရက်စက်တဲ့ရည်ရွယ်ချက်ပေါ့”ဟု တပ်ရင်း (၃၅၀၂)မှ ပြန်ကြားရေးတာဝန်ခံက စစ်ကောင်စီ ၏လုပ်ရပ်အပေါ် မှတ်ချက်ပေးသည်။
စစ်ကောင်စီတပ်သည် တိုက်ပွဲဖြစ်ပွားခြင်းမရှိဘဲ ပြည်သူများရှိရာ နေရာများသို့ ရည်ရွယ်ချက်ရှိရှိ ပစ်ခတ်တိုက်ခိုက်လျှက်ရှိရာ ပြည်သူများစွာ ဒုက္ခရောက်နေခြင်းအပေါ် သာယာနေသော၎င်းတို့၏ ရက်စက်ယုတ်မာမှုအတွက် တန်ပြန်ပေး ဆပ်ရမည်ဟု တောင်ငူခရိုင်တပ်ရင်း (၃၅၀၂)က အသိပေး ထုတ်ပြန်ထားသည်။
