မေ – ၁၆ ၊၂၀၂၅ ၊ နိုင်ပကောင်း/People’s Spring
ထိုင်းနယ်စပ်အနီးမှာရှိတဲ့ စစ်ကောင်စီတပ်ရဲ့ မယ်လစခန်းကို တစ်ရက်တာတိုက်ပြီး ဒီနေ့ (မေလ ၁၆ ရက်) မနက်ပိုင်းမှာ KNU နဲ့ ပူးပေါင်းတပ်က အပြီးသတ်ရှင်းလင်း သိမ်းယူလိုက်ပြီလို့ ကရင်စစ်ရေးသတင်းရင်းမြစ်ထံကသိရပါတယ်။
မယ်လစခန်းကို ဒီမနက်ပိုင်း မြန်မာစံတော်ချိန် မနက် ၅ နာရီခွဲဝန်းကျင်မှာ အပြီးသတ် သိမ်းယူလိုက်နိုင်တာလို့ သတင်းရင်းမြစ်က ပြောပါတယ်။
မယ်လစခန်း (မော်ကွီးလူ) စခန်းဟာ KNU တပ်မဟာ (၇ ) စစ်ရေးလှုပ်ရှားရာနယ်မြေထဲမှာရှိပြီး ထိုင်းနယ်စပ်အနီး လှိုင်းဘွဲ့မြို့နယ် ၊ ဝေလယ်မူး (မယ်လ) ရွာ အနောက်ဘက်မှာ တည်ရှိတယ်လို့သိရပါတယ်။
Public Service Announcement
အဲဒီစခန်းကို မနေ့ (မေလ ၁၅ ရက် ) မနက်ပိုင်း ၄ နာရီခွဲအချိန်မှာ KNU တပ်မဟာ (၇) က ဒရုန်းတွေ သုံးပြီး စတင်တိုက်ခိုက်တာပါ။
စတင်တိုက်ခိုက်တဲ့နေ့ ညပိုင်းမှာ ပဲ မယ်လစခန်းမှာရှိတဲ့ စစ်ကောင်စီ တပ်ဖွဲ့ဝင်တွေဟာ တိုက်ခိုက်မှု ဒဏ်ကိုမခံနိုင်တော့ဘဲ စခန်းရဲ့တောင်ဘက်ကို ဆုတ်ခွာ ထွက်ပြေးသွားရတယ်လို့ ကရင်စစ်ရေးသတင်းရင်းမြစ်က ပြောပါတယ်။
စခန်းကိုအပြီးသတ်ရလိုက်တဲ့ ဒီနေ့ မနက်ပိုင်းမှာတော့ စစ်ကောင်စီလေတပ်က ဗုံးကြဲ တိုက်ခိုက်မှုတွေ လုပ်ဆောင်နေတယ်လို့သိရပါတယ်။
ပြီးခဲ့တဲ့ ရက်ပိုင်း အတွင်း ထိုင်းနယ်စပ်အနီး က တာလယ်ဗျုဟာကိုသိမ်းပြီးနောက်မှာ မယ်လစခန်းကိုဆက်လက်သိမ်းယူဖို့ KNU က တိုက်ခိုက်ခဲ့တာပါ။
ဝေလယ်မူး(မယ်လ)အနီး ဖြစ်ပွားနေတဲ့ တိုက်ပွဲကြောင့် မယ်လအပါအဝင် အနီးအနားကျေးရွာက ဒေသခံပြည်သူ ၄၀၀ ကျော် ထိုင်းဘက်ခြမ်းဆီ ထွက်ပြေးလာကြတယ်လို့ ထိုင်းသတင်းရင်းမြစ်ကလည်းအသိပေးပါတယ်။
လှိုင်းဘွဲ့မြို့နယ် ၊ ပိုင်ကျုံမြို့ ၊ ဒေါနတောင်တန်းအရှေ့ခြမ်း ထိုင်းနယ်စပ်တလျောက်က စစ်ကောင်စီတပ်စခန်းတွေထဲ ပူးလူတူ၊ ခလယ်ဒေး၊ တခေါဘီခီး၊ မော်ဖားသူးစခန်း ၊ တာလယ်ဗျူဟာ နဲ့ မယ်လစခန်းကိုပါ အခုနှစ်အတွင်း KNU တပ်မဟာ (၇) ကသိမ်းယူပြီးဖြစ်ပါတယ်။
လက်ရှိမှာတော့ မော်ဖိုးခီ့(မော်ဖိုးကေ)စခန်း နဲ့ နော်တရာစခန်းတို့ ကျန်ရှိနေပါတယ်။ လက်ကျန်စခန်းတွေကိုလည်း KNU က ဆက်လက်တိုက်ခိုက်ဖို့ ရှိနေတယ်လို့ ကရင်စစ်ရေးသတင်းရင်းမြစ်က အသိပေးပါတယ်။
စစ်ကောင်စီတပ်ဘက်ကတော့ ကျန်ရှိတဲ့ တပ်စခန်းတွေ မကျဖို့ မြေပြင်ကနေ စစ်ကူစေလွှတ်နိုင်စွမ်းမရှိတော့ဘဲ လေကြောင်း ပစ်ကူကိုသာအားပြုနေရတယ်လို့လည်းသတင်းရင်းမြစ်က ပြောပါတယ်။
ထိုင်း – မြန်မာနယ်စပ်မှာ နေရာယူ တပ်စွဲထားတဲ့ မဆုတ်တမ်း ခံစစ်စခန်းတွေ ၊ ခြေကုပ်စခန်းတွေ ဆက်တိုက် ဆုံးရှုံးနေတာနဲ့ပတ်သက်ပြီး စစ်ကောင်စီကတော့ သတင်းအမှောင်ချထားပါတယ်။
နယ်စပ်အနီးဖြစ်ပွားတဲ့တိုက်ပွဲတွေကြောင့် ထိုင်းစစ်တပ်ကလည်း နယ်စပ်မျဉ်းတလျောက် တပ်ဖြန့်ပြီး မြန်မာဘက်ခြမ်းက အခြေအနေတွေကိုအနီးကပ်စောင့်ကြည့်နေတယ်လို့ ထိုင်းမီဒီယာတွေက ဖော်ပြကြပါတယ်။
