အားလုံးပါဝင်တဲ့ တွေ့ဆုံဆွေးနွေးရေး လုပ်ဆောင်ဖို့ တိုက်တွန်း
မေ-၁၆၊ ၂၀၂၅။ People’s Spring
အရပ်သားပြည်သူတွေ သေဆုံးဒဏ်ရာရစေခဲ့တဲ့ စစ်ကိုင်းတိုင်းရှိ စာသင်ကျောင်းကို စစ်ကောင်စီတပ်ရဲ့ လေကြောင်းတိုက်ခိုက်မှုအပေါ် သြစတြေးလျနိုင်ငံက အလွန်အမင်းစိုးရိမ်ကြောင်း ဒီနေ့ ထုတ်ပြန်ပါတယ်။
သြစတြေးလျနိုင်ငံခြားနဲ့ ကုန်သွယ်ရေးဝန်ကြီးဌာနရဲ့ ထုတ်ပြန်ချက်မှာ စစ်ကောင်စီတပ်ရဲ့ လေကြောင်းတိုက်ခိုက်မှုကို ပြစ်တင်ရှုတ်ချလိုက်ပြီး စစ်ကောင်စီအနေနဲ့ အားလုံးပါဝင်တဲ့ တွေ့ဆုံဆွေးနွေးရေး လုပ်ဆောင်ဖို့နဲ့ အပစ်ခတ်ရပ်စဲရေးကြေညာချက်ကို လိုက်နာဖို့ ဖော်ပြတိုက်တွန်းပါတယ်။
Public Service Announcement
အမေရိကန်နိုင်ငံခြားရေးဝန်ကြီးဌာနနဲ့ ပြင်သစ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူတွေကလည်း စစ်ကိုင်းတိုင်း၊ ဒီပဲယင်းမြို့နယ် အိုးတိန်တွင်းရွာ စာသင်ကျောင်းလေကြောင်းတိုက်ခိုက်မှုအပေါ် အလွန်အမင်းစိုးရိမ်ကြောင်း ထုတ်ဖော်ပြောဆိုခဲ့ကြပြီး စစ်ကောင်စီအနေနဲ့ အကြမ်းဖက်မှုတွေ ရပ်တန့်ကာ ပါဝင်ပတ်သက်သူတွေအကြား တွေ့ဆုံဆွေးနွေးရေး လုပ်ဆောင်ဖို့ တိုက်တွန်းထားကြပါတယ်။
အမျိုးသားညီညွတ်ရေးအစိုးရ NUG အနေနဲ့ တွေ့ဆုံဆွေးနွေးရေးနဲ့ပတ်သက်လို့ မြန်မာ့နိုင်ငံရေးမှာ စစ်တပ်ပါဝင်နေမှုကို အဆုံးသတ်ဖို့၊ ၂၀၀၈ အခြေခံဥပဒေပယ်ဖျက်ဖို့၊ စစ်တပ်ကျူးလွန်မှုတွေအတွက် တာဝန်ယူမှု၊ တာဝန်ခံမှုရှိတဲ့ တရားမျှတမှုရရှိရေးလုပ်ဆောင်ဖို့ အချက်တွေ ပါဝင်တဲ့ ဦးတည်ချက် ၆ရပ်ကို စစ်တပ်က သဘောတူလိုက်နာဖို့ လိုအပ်တယ်လို့ ပြောကြားထားပါတယ်။
ဒါ့အပြင် စစ်တပ်ဟာ ငလျင်အကြောင်းပြ ယာယီအပစ်ခတ်ရပ်စဲရေး ကြေညာထားပေမယ့် နိုင်ငံတဝန်း လေကြောင်းတိုက်ခိုက်မှု၊ လက်နက်ကြီးပစ်ခတ်နေမှုနဲ့ မြေပြင်စစ်ကြောင်းထိုးမှုတွေ ရပ်တန့်ခြင်းမရှိတဲ့အပေါ် ဟန်ပြအပစ်အခတ်ရပ်စဲရေးကြေညာချက်တွေလို့ NUG က ပြောပါတယ်။
စစ်မှန်တဲ့ အပစ်အခတ်ရပ်စဲမှုတွေအတွက် ကျင့်ဝတ်စည်းကမ်း (code of conduct) တွေ၊ သဘောတူညီမှုတွေ လိုအပ်မှာဖြစ်သလို အဲဒီ့ ကျင့်ဝတ်၊ သဘောတူညီချက်တွေကို လိုက်နာဆောင်ရွက်ခြင်း ရှိ မရှိ သေချာစေဖို့ နိုင်ငံတကာ စောင့်ကြည့်လေ့လာမှု (international monitoring mechanism) လိုအပ်မှာဖြစ်ကြောင်းနဲ့ သဘောတူထားတဲ့ ကျင့်ဝတ်၊ သဘောတူညီချက်တွေကို ချိုးဖောက်ခဲ့မယ်ဆိုရင် ချိုးဖောက်သူကို ဘယ်လို အရေးယူမလဲဆိုတဲ့ အရေးယူမှုတွေလည်း ပါဝင်ရမှာဖြစ်တယ်လို့ NUG က ပြည်သူလူထုနဲ့ နိုင်ငံတကာကို သတင်းစကားပါးထားပါတယ်။
